Avtobus sürücüsü və əlil.
Bu gün səhərdən böyükdən balacaya qədər hamı populyarlıqda hətta Beynəlxalq Bankın sədrinin istefası barədə xəbəri belə ötən videoçarxın müzakirəsi ilə məşğuldur.
Həm Bank, həm manatın kursunu, eləcə də dünəndən məşhurlaşan Katya adlı müəmmalı qızı belə unudublar.
İş ondadır ki, jurnalistlər sosial eksperiment aparmaq fikrinə düşüb: əlil arabaların qaldırılması üçün pandusla təchiz edilmiş yeni avtobuslarda yol getməyə hazırlaşır. 10-15 dəfə buna nail olur, amma bu barədə geniş publikaya məlum deyil.
Amma etiraz edən sürücülərdən biri o dəqiqə videokameraya çəkilir və internetdə yayılır, bu isə əksəriyyətinin ictimai nəqliyyatdan hələ keçən əsrdə istifadə edən sosial şəbəkə istifadəçilərinin qəzəbinə tuş gəlir.
Mən əminəm ki, bu sürücünü lənətləyənlərin, başına kül ələyənlərin çoxu videoçarxa heç axıra qədər baxmayıblar, sadəcə səs-küylü "Avtobusda biabırçılıq” başlığı ilə kifayətləniblər.
Əlil sərnişini aparmaqdan imtina edən sürücü barədə əhvalatı şişirdərək "cingiltili” sərlövhələr altında yazılar dərc edən KİV də özünü yaxşı tərəfdən göstərməyib, belə ki, həmin yazılara görə sürücü ya edam edilməli və yaxud da başqalarına dərs olsun deyə soyundurulub, ata bağlanılıb (variant kimi avtobus da istifadə edilə bilər) şəhərin bütün küçələrində gəzdirməli idi.
Videoçarxa axıra qədər baxanlar isə anlaşılmaz vəziyyətdə qalırlar. Belə ki, sürücü Eynulla Həşimov onu aparmaqdan imtina etmir, əksinə pandusu endirir və əlili dəfələrlə avtobusa minməyə dəvət edir.
Amma əlilin yanında olan adam səsini yüksəldərək və çox kobud formada sürücünün təcili olaraq maşından düşməsini və əlilə yardım etməsini tələb edir.
Bu tələbin tam absurd olduğunu anlayan Eynulla Həşimov (belə ki, əlilin yanında sağlam və arabanı avtobusa itələyə biləcək adam var) təbii olaraq kəskin müraciətə kəskin də cavab verir. Bu, durduğu yerdə üstünə qışqırılan və hədə-qorxu gəlinən istənilən normal insanın reaksiyasıdır. Bundan başqa, sürücü əsəb keçirirdi, belə ki, avtobuslar ciddi qrafik üzrə hərəkət etdiyi üçün bu söz-söhbət onun dəyərli vaxtını alırdı.
Sərnişinlər də özlərini "yaxşı” tərəfdən göstərdilər, belə ki, münaqişənin qarşısını almaq məqsədi ilə əlilə yardım edə bilərdilər, amma deyəsən bu işə yaramayacaqdı, çünki videoçarxın müəllifinin deyəsən məqsədi məhz sürücünü özündən çıxarmaq və onu ətrafdakılara xəstə insana yardım etməkdən imtina edən yırtıcı bir məxluq kimi göstərmək idi.
Yəqin ki, bu jurnalistlərin eksperimentə sərf edilən vaxta heyfləri gəlirdi və onlar daha asan yola əl atırlar – sadəcə günah keçisi tapmaq lazım idi. Bu ideya uğurla həyata keçdi.
Eynulla Həşimovun işdən azad olunması xəbəri hamı tərəfindən rəğbətlə qarşılandı. Məsələn, məndə elə bir təəssürat yarandı ki, o Bakıda hər ikinci adamın düşməni idi. Dünən artıq əfsanəyə çevrilən Katyanı döyən iki gəncin əməlinə gözüyaşlı reaksiya verən adamlar bu gün orta əsr alimləri kimi "Edam edilməlidir, bağışlamaq olmaz” deyə qərar verirlər.
Və heç kim, ilk növbədə videoçarxın müəllifləri reytinq üçün sensasion material çəkmək arzularının aqibəti barədə düşünmədi.
Nə isə, gənclər, yaxşı işlədiniz – sutkalarla ağır işdə işləyən adamı özündən çıxardınız; baş verənlərdən sonra sutkanın qalan hissəsini əsəbdən titrəyərək sərnişin daşımalı olacağını düşünmədən adamı əsəbiləşdirdiniz; milçəkdən fil düzəltdiniz; "Xaliq Faiqoğlu” MMC-nin rəhbərliyinin sürücünü işdən çıxarmasına nail oldunuz, yeri gəlmişkən o, ailənin yeganə pul qazananı və yetkinlik yaşına çatmayan üç uşaq atasıdır.
Buna nə deməliyəm? Şərəfli iş gördünüz. Əgər siz ümumiyyətlə, şərəfin nə demək olduğunu bilirsizsə ...
(oxu.az)
Xəbərdən istifadə edərkən istinad etmək vacibdir.
