2014-cü ilin iyununda Suriya sərhəddini keçərək İraqa daxil olan "İslam Dövləti” (İŞİD) terroçu qruplaşması Bağdaddakı şiə hökumətindən narazı qalan sünni əhalisinin yardımı ilə geniş ərazilər zəbt etdi.
Bu hadisə "İslam Dövləti”nə Bəşər Əsəd hakimiyyətinə qarşı vuruşan çoxsaylı müstəqil silahlı dəstələrdən biri kimi deyil, öz ərazisi və hərbi gücü olan yeni qlobal təhlükə mənbəyi kimi baxılmasını tələb edirdi.
İraq və Suriya ordusunun inadlı müqavimət göstərə bilmədiyi "İraq-Şam İslam Dövləti” ən ciddi zərbəni yerli kürd birləşmələrindən aldı.
Xüsusən, Suriyanın Türkiyə ilə sərhəddəki Kobani şəhəri uğrunda gedən 2 aylıq qanlı döyüşlər hərbləşmiş kürd dəstələrinin kifayət qədər güclü qüvvə olduğnu sübut etdi.
Maraqlıdır ki, bu dəstələrdə qadın döyüşçülərin sayı 10-40% arasında dəyişir. Şərqdə qadınların daim kişiyə tabe olan və hərbi işlərdən uzaq biri olması ilə bağlı qəlibləşmiş təsəvvürlər kürd qadınları tərəfindən alt-üst edilir.
Suriyadakı ən böyük kürd partiyası (Demokratik İttifaq) nəzdində yaradılan "xalq özünümüdafiə dəstələri”, Kürd İşçi Partiyasının (PKK) qadınlardan ibarət hərbi dəstələri və Türkiyə Marksist-Leninist Partiyasının sıravi üzvləri, İraq Peşmərgə ordusunun qadınlardan ibarət bütöv batalyonları bu hərbi qüvvənin əsasını təşkil edir.
Qərb fotoreportyorlarının İraq və Suriyada kürd qadınlarının döyüş hazırlığını göstərən fotolarını təqdim edirik. (modern.az)
Xəbərdən istifadə edərkən istinad etmək vacibdir.
