Bildiyimiz kimi Azərbaycan Respublikası Prezidenti İlham Əliyevin Sərəncamı ilə 2 sentyabr 2015-ci il tarixində Zakir Fərəcov Sumqayıt şəhərinin icra başçısı təyin olunub. Bu sərəncamdan 10 gün keçməsinə baxmayaraq İcra Hakimiyyətinin saytı (http://sumqayit-ih.gov.az/) yeni başçı haqqında heç bir informasiya yerləşdirməyib. Sadəcə ad,soyad və atasının adını yazmaqla işi bitmiş hesab edib.

Ərazi idarəetmə və yerli özünüidarəetmə orqanları ilə iş şöbəsinin müdiri Coşqun Cəbrayılov işindən ayrılmasını saytı idarə edənlər deyəsən həzm edə bilmir və onu hələ də vəzifə başında göstərir.

Sumqayıt şəhər icra hakimiyyətinin saytında ən diqqətçəkən məsələlərdən biri də yerləşdirilən informasiyaların dolğunluğu ilə bağlıdır. Sumqayıt Şəhər İcra Hakimiyyətinin rəsmi saytına yerləşdirilən sonuncu xəbər iyul ayının 7-nə təsadüf edir. Həmin xəbərdə Sumqayıtda gənc rolik sürənlərin ənənəvi yarışı keçirildiyi qeyd olunur. Belə təsəvvür yaranır ki, son 2 ayda Sumqayıtda heç bir hadisə baş verməyib.

Saytların əksəriyyətində "İcra hakimiyyəti” bölməsinə daxil olunduğu zaman yalnız şəhər icra hakimiyyətinin yerləşdiyi ünvan və əlaqə telefonları ilə qarşılaşırıq. "İnfrastruktur” bölməsində isə "Poçt və Rabitə”, "Banklar” haqqında məlumatlar yer alıb. Şəhərin idarə və müəssisələri haqqında məlumat yerləşdirməyi isə artıq iş hesab ediblər. "Şura” və "Fəaliyyət” alt bölməsində isə heç bir məlumata rast gəlinmir. "Bələdiyyələr” alt bölməsində isə yalnız bələdiyyələrin adını görə bilərsiniz. Bələdiyyələrin fəaliyyəti haqqında isə məlumat yoxdur.

İnformasiya texnologiyaları üzrə ekspert Emin Hüseynzadə bildirdi ki, Sumqayıt ölkənin ən böyük şəhərlərindən biridir, amma saytı heç informativ deyil:

"Elektron xidmətlər adlı bölməsi olsa da ümumiyyətlə boşdur. Elektron müraciət bölməsində isə bir işçinin adı və telefon nömrəsi göstərilib. Saytda Sumqayıt daxili nəqliyyat və istiqamətlər haqqında heç bir məlumat yoxdur. Şəhərdəki dəyişikliklər, yenilliklər, tədbirlər, yol tikintiləri və s. haqqında gündəlik məlumatlar yoxdur və yenilənmir. Gənclər şəhərinin onlayn səhifəsi də gənclərin tələbinə uyğun və ən müasir və bütün tələbləri ödəyən ola bilər."

 

Məlumat üçün bildirək ki, "İnformasiya əldə etmək haqqında” Qanun olsa da, "İKT” ilə bağlı prezident sərəncamı olsa da, dövlət qurumlarının saytı ləng işləyir.

Sonda onu da qeyd edək ki, yerli icra hakimiyyətlərinə məxsus saytların ən ciddi qüsurlarından biri də onların yalnız Azərbaycan dilində təqdim olunması ilə bağlıdır. Bu qüsur Sumqayıt şəhər icra hakimiyyətinə də aiddir. Halbuki Nazirlər Kabinetinin 16 fevral 2007-ci il tarixli "Dövlət orqanlarının və bələdiyyələrin internet informasiya ehtiyatlarının yaradılması Formaları və Qaydaları”nın təsdiq edilməsi haqqında qərarının 12.9-cu maddəsində qeyd olunur ki, internet saytları dövlət dilində və tələbatdan asılı olaraq, ən azı bir geniş yayılmış xarici dildə tərtib olunmalıdır. Təəssüf ki, bu gün yerli icra hakimiyyətlərinə məxsus saytlardan əcnəbilər istifadə edə bilmirlər. Necə deyərlər, "özümüz yazıb, özümüz oxuyuruq”.

Ancaq ümid edirik ki, heç olmazsa, bu yazını özümüz yazıb, özümüz oxumayacağıq. Qeyd olunan nöqsanlar tezliklə ortadan qaldırılacaq.

"Açıq hökumət” təşəbbüsünün həyata keçməsində hər kəs öz vəzifəsinin öhdəsindən gəlməli olsa da, bir çoxlarının buna laqeyd münasibəti göz önündədir.

 

Ruslan, Xeberle.com

Xəbərdən istifadə edərkən istinad etmək vacibdir.