Sabahdan başlayaraq rayon qeydiyyatında olan avtomobillərin Bakıya girişinə qadağa qoyulacaq.

Qadağa Sumqayıt və Abşeron qeydiyyatında olan avtomobillərə də şamil ediləcək. Baş Dövlət Yol Polisi İdarəsinin ictimaiyyətlə əlaqələr şöbəsinin rəisi Kamran Əliyev bildirib ki, sentyabrın 15-də Bakı-Sumqayıt xətti üzrə hərəkət edəcək yeni qatarlar istifadəyə veriləcək. Sumqayıt sakinlərinə Bakı şəhərinə gəlmək üçün ən təhlükəsiz nəqliyyat vasitəsi olan dəmiryol xəttindən istifadə etmək tövsiyə olunur.

Belə bir qadağa Sumqayıtdan hər gün paytaxta iş dalınca gələn sakinlər üçün hansı problemlər yarada bilər? Ümumiyyətlə Sumqayıt ictimaiyyətinin bu qadağaya münasibəti necədir?

PR mütəxəssisi Afət Yaqubova yalnız Sumqayıt maşınlarının deyil, ümumiyyətlə rayon maşınlarının tıxaca görə şəhərə buraxılmamasını absurd, buna çəkiləcək xərcləri isə havaya sovrulmuş pullar hesab edir: "Çünki Bakıdakı tıxacın səbəbi rayon avtomobilləri deyil. Zolaqların gözlənilməməsi və yolqırağı parkinqlər tıxaca səbəbdir. Bunlar qaydaya salınmayınca, Bakının öz maşınlarını da şəhərə buraxmasalar, tıxac azalmayacaq."

Liderxeber.az saytının baş redaktoru Səbuhi Vaqifoğlunun fikrincə Sumqayıt sakinlərinin əksəriyyəti Bakıda işləyir və bu qanunun Sumqayıta şamil olunması heç də yaxşı hal deyil: "Digər tərəfdən isə Sumqayıt-Bakı demək olar ki, birləşir. Yəqin ki, DYP bunu nəzərə alar. Amma gərək sumqayıtlılar da bir az bu qanunun icrasına və yollarda hərəkətin tənzimlənməsinə kömək etsin. Məsələn, əgər təcili, yaxud önəmli bir iş yoxdursa, yeni açılan qatarlardan, avtobuslardan istifadə etsələr yaxşı olar."

"Əlil Sahibkarlar Təşkilatı" İctimai Birliyinin sədri Mirzə Məmmədvəliyev deyir ki, Sumqayıt-Bakı meqapolisinin faktiki formalaşdığı bir vəziyyətdə qoyulmuş belə məhdudiyyətin müsbət istiqamətdə özünü doğruldacağı inandırıcı deyil.

"Dünya" TV-nin Xəbərlər departamentinin direktoru Nizami Rəsulov isə bir qədər fərqli düşünür: Öz avtomobilləri ilə Bakıya gedib gələn sumqayıtlıları çox gözəl başa düşürəm. Bu qadağa əgər dövlətimizin qanunları çərçivəsində edilirsə, o zaman atılan addımı düzgün qiymətləndirmək olar.Ümid edirəm bu qadağa çox sürməz."

 ORCTV.az saytının redaktoru Abbasəli Hüseynli bu qadağanı heç də birmənalı qarşılamır: "Düzdür, atılan addım tıxac probleminin həlli üçündür və bu cür praktika xarici ölkələrdə mövcuddur. Amma bizim bunun üçün hələ çox görüləsi çox işlərimiz var. Tutaq ki, mən Sumqayıtdanam və Bakıda öz maşınımla hansısa bir malı paylamaqla məşğulam. Bəs onda nə edim? Taksiyə verəcəyim pul, mənə aylıq maaşımdan baha başa gələr."

 Qaynar.info saytının əməkdaşı Elkin Xəlilov ictimai nəqliyyat normal olduğu təqdirdə bu qadağanı yaxşı hal kimi qiymətləndirir: "İnsanlar rahat avtobus və qatarla işə gedib gələ bilərlər. Bir çox Avropa ölkələrində də belə təcrübə var. Yəni ilk dəfə bu bizdə tətbiq edilmir. Amma söhbət normal ictimai nəqliyyatdan gedir. Vaxtı-vaxtında gedib gələn. Digər bir məsələ isə qeydiyyatla bağlıdır. Bu gün bir çox insan rahatlıqla maşın seriyalarını dəyişə biləcəklər. Yəni pulu olan insan üçün bunun elə də bir qadağa hesab etmirəm. Yerdə qalan insanlar arsında isə bu kimi hallar haqlı narazılıq yaradır.

Ümumilikdə isə düşünürəm ki, qadağa zamanını bir az aşağı salmaq olar. Məsələn, axşam saat 9-dan sonra şəhərə maşınlar buraxılsın."

 "Qurtuluş" TV-nin əməkdaşı Xuraman Aydın qadağanın müsbət hal olmadığını bildirir: "Sumqayıt maşınlarının paytaxta buraxılmamasını əlbəttə ki, pis qarşılayıram. Çünki iş yerimiz Bakıda yerləşir. Marşrutlar rahat olmadığı üçün məcburən taksilərdən istifadə edirik. Bunlar da əlbəttə ki, paytaxta buraxılmalıdır. Hər gün yeni bir qayda çıxarırlar. Belə qadağalardansa ölkədə əhalinin sosial rifahını yaxşılaşdırsınlar. Əmək haqlarını vaxtında versinlər, işsizləri işlə təmin etsinlər. Belə boş və mənasız işlər yığışdırılsa yaxşı olar."

 R. ZEYNALLI

Xeberle.com