Bir neçə gün öncə Sumqayıtdakı 39 - cu məhəllədə yerləşən, əsasən kənd təsərrüfatı məhsullarının satıldığı yarmarka elə bir ciddi səbəb olmadan qapadıldı. Amma, yarmarkanın münasib bir yerə köçürülməsi üçün şəhərin müvafiq orqanları tərəfindən heç bir addım atılmadı. Sadəcə olaraq, yarmarkada ticarət edənlərə icazə verilib ki, onlar öz alverlərini 8-ci mikrorayonun 29 17/18 saylı evin arxasında davam etdirsinlər.

Yarmarka üçün münasib yer olmayan ərazidə kənd təsərrüfatı mallarının satılması təbii ki, xoş qarşılanmayıb. Xüsusilə 29-cü evdə yaşayan sakinlər həftənin iki günü olsa belə evdə rahat otura bilmədikləri üçün şikayətçidirlər. Bu barədə Xeberle.com saytının redaksiyasına müraciət edən sakinlər bildiriblər ki, cürümüş meyvə - tərəvəz qoxusu bir tərəfdən, hay-küydə digər tərəfdən rahatlıqlarını əllərindən alıb.

Kənd təsərrüfatı yarmarkasının yeni məkanına yenicə addımımızı atmışdıq ki, satıcıların bir-biri ilə etdikləri söhbətə necə deyərlər qulaq müsafiri olduq. Sən demə, səhər alıcılardan biri yarmarkadan bir neçə kadr çəkərək hansısa sayta göndərib. Satıcılar narahat halda biz axı neynəyək? "Guya burda alver etmək bizim xoşumuza gəlir” deyə gileylənirdilər. Yaxınlaşıb bir neçəsinin dərdinə şərik olmağa çalışdıq. Dedilər ki, yarmarkaya nə nəzarət edən var, nə də rəhbərlik: "Bizə dedilər ki, bir müddət burda alver edin.Təmir qurtaran kimi yenidən öz yerinizə qayıdacaqsınız.”

Öyrəndik ki, onlara yarmarkanın müvəqqəti də olsa, münasib bir yerə köçürüləcəyi ilə bağlı heç bir məlumat verilməyib. Gənc satıcı isə narahat halda hara şikayət edəcəklərini bilmədiyini qeyd etdi: "İndi yerli kanallardan gəlib çəkəcəklər. Sonra da başlayacaqlar bizi burdan çıxarmağa. Kefimizdən burda durmamışıq ki.”

Sakinlərdən bir xanım deyəsən artıq cana doymuşdu: "Yaz qızım, yaz. Bəlkə buna bir əncam çəkərlər”.

Bir neçə satıcıdan yarmarka bitdikdən sonra meyvə-tərəvəz qalıqlarını yığışdırılması barədə soruşduq. Söylədilər ki, hər dəfə dalandarlara 50 qəpik pul ödəyirik. Bundan başqa zibilləri də təmizləyirik. Amma, sakinlərdən eşitdik ki, burda yarmarkanın olmasından daha çox əziyyət çəkən məhz 8 - ci mikrorayon Mənzil İstismar sahəsinin dalandarlarıdır.

Digər sakinlərbildirdilər ki, burada çalşanlar evlərinə bir parça çörək pulu aparır:"Biz narahat olsaq da şikayətçi deyilik. Həm də bizə də sərf edir. Evə bazarlıq etmək üçün uzağa getmirik.”

Sakinlərdən daha çox narazı qalan elə ticarət işçiləri çıxdı. Onlar tez bir zamanda yarmarkanın yerləşdiyi məkanın təmir olunmasını hamıdan daha çox istədiklərini bildirdilər.

Aytən Əli

Xeberle.com