Yaşma bağları susuz qalıb.
Bu barədə adıçəkilən ərazinin sakinləri bildiriblər. Şikayətçilərin sözlərinə görə, artıq 5-ci gündür ki, yaşayış massivində su yoxdur: "Bundan öncə də massivdə bənzər problem yaşanıb. 3 həftə ərzində ardıcıl olaraq suyumuz kəsilirdi. Etiraz əlaməti olaraq sakinlər Bakı-Quba yolunu bağlamağa cəhd etdilər. Deputat Müşfiq Məmmədli də Milli Məclisdə məsələ qaldırıb. Bundan sonra problem müəyyən qədər həll edildi. Lakin sonradan yenə eyni vəziyyət yarandı”.
Sakinlərin sözlərinə görə, bununla bağlı şikayətlərinə cavab olaraq Ceyrabatan su anbadında su səviyyəsinin azaldığını deməklə kifayətlənirlər. Amma sakinlər buna inanmırlar. Səbəb isə ətrafda olan istixanalara, plantasiyalara qeyri-qanuni yolla suyun tam həcmdə verilməsidir. Melorasiya idarəsi yeni xətt çəkib. Bundan sonra problemlər daha da ciddiləşib.
Sakinlər deyirlər ki, eyni problem qış aylarında da yaşanır. Ancaq havalar soyuq, yağışlı olduğu üçün bu o qədər də ciddi hiss edilmir: "Mart ayından isə vəziyyət daha da acınacaqlı hal alıb. Yayın istisində massivdə yerləşən onlarla ev susuz qalıb. Pandemiya ilə əlaqədar "evdə qal” çağırışlarının edildiyi dövrdə isə susuz qalmaq daha ağırdır. Massivin sakinlərinin tələbi heç olmasa, gün ərzində müəyyən qrafiklə su verilməsidir. Səhər və axşam saatlarında müəyyən saatlarla su verilsə, ehtiyatımızı götürə bilərik".
Yayın qızmarında məişətdə, həyətdə işlətməyə su tapmayan sakinlər həyat mənbəyini pulla almağa məcbur olurlar. Yüz manata aldıqları bir maşın su isə cəmi 3-4 günə qurtarır.
"Meliorasiya və Su Təsərrüfatı" ASC-nin nümayəndəsi Dilqəm Şərifov isə sakinlərin dedikləri ilə razılaşmır. O, verdiyi açıqlamada adıçəkilən massivdə 4 yox, 2 gün su probleminin olduğunu, onun da ötən gündən aradan qaldırıldığını deyib: "Sabahdan isə suyun təzyiqi artacaq”.
D.Şərifoun sözlərinə görə, problem çalışdığı qurumla yox, orada yaşayanların daxili xətləri ilə bağlıdır:
"Sakinlər boruları özləri çəkiblər və keyfiyyətli materiallardan isifadə edilməyib. Bir küçədə xətdə problem olan kimi su axıb israf olmasın deyə, təmir edilənə kimi məcburən xətlər bağlanır. Bundan isə istər-istəməz başqa ərazilərin məlumatı olmur. Ara xətlər bizim balansımızda deyil. Biz sadəcə suyun verilməsinə cavabdehik”.
O bildirib ki, artıq Sumqayıt İcra Hakimiyyətinə də xətlərin köhnəldiyi və dəyişməsinin lazım olması barədə rəsmi məlumat verilib:
"İnsanlar elə düşünürlər ki, problem ancaq bizlikdir, amma bu belə deyil. Camaat ümumi şəkildə yığılaraq xətlərini yeniləməlidir ki, problem olmasın. Orada köhnə, xarab xəttlər olduqca belə hallarla rastlaşmalı olacaqlar və davamlı problem yaranacaq".
Maraqlıdır ki, ASC rəsmisi suyun verildiyini desə də, qəsəbə sakinləri hələ də suyun onlara gəlib çatmadığını bildirirlər.
Sumqayıt şəhər İcra Hakimiyyətindən isə "ola bilsin ki, kanalda suyun səviyyəsi aşağı düşüb” deməklə kifayətləndilər. Şikayətlə bağlı araşdırma aparacaqlarına da söz verdilər...(bakupost.az)
Xəbərdən istifadə edərkən istinad etmək vacibdir.
