Sumqayıt şəhəri, Hacı Zeynalabdin qəsəbəsi sakinləri bankomatların azlığından əziyyət çəkirlər.
Sakinlər Xeberle.com-a qəsəbə ərazisində marketlərdən birinin qarşısında yalnız iki bankomatın olduğunu deyirlər. Onlar qəsəbə ərazisində bankomat sayının artırılmasını istəyirlər.
Sumqayıt şəhər İcra Hakimiyyəti Başçısının Hacı Zeynalabdin qəsəbə İnzibati Ərazi Dairəsi üzrə Nümayəndəsi Lalə Hacıyeva Xeberle.com-a mövcud problemi belə şərh edib: "Qəsəbə sakinləri bu problemlə müraciət etməkdə haqlıdırlar. Qəsəbənin ərazisi böyük, bankomat isə, yalnız bir yerdə və yol kənarındadır. Sakinlər Sumqayıta gedib ordan təqaüdlərini almağa məcburdurlar. Mən təqaüdlərin ödənilən vaxtlarında həmin bankomatın qarşısında yaranan növbəni görüb şəhər rəhbərliyinə bu haqda müraciət ünvanlamışdım. Müraciətə baxılıb, yeni bankomatlar quraşdırılacağı bildirilmişdi. Lakin bildiyiniz kimi, pandemiyanı yayılması bu məsələnin həllini ləngitdi. Mən yenidən şəhər rəhbərliyinə sakinlər adından müraciət ünvanlayacam və bu problem qısa zaman ərzində öz həllini tapacaq".
Xədicə Səxavətqızı
Xeberle.com
Xəbərdən istifadə edərkən istinad etmək vacibdir.
