Sumqayıtda yaşayan Məhəmməd Əhmədov İslam oğlu Asiya.az-a müraciət edərək başına gələn olaylarla bağlı ölkə başçısı İlham Әliyevə müraciət edib.
O, yazır ki, hərbi xidöətdə olduğu zaman evi müsafirə edilib: 
"Mən 24 yanvar 1994-cü il tarixdə Qusar şəhərində anadan olmuşam. 2 yaşında atamı, 8 yaşında yeganə bacımı, 14 yaşında isə anamı itirdiyimdən, Sumqayıt şəhərində 2-ci məhəllə, ev 5/28, mənzil 56 ünvanda yaşayan xalam Ağayeva Həqiqət Əliheydər qızı məni 2008-ci ildə qəyyumluğa götürüb. Mənzil ikiotaqlı olmaqla xalamın xüsusi mülkiyyətində olub. 18 yaşım tamam olduqdan sonra, yəni 24.01.2012-ci il tarixdə xalam məni özünəməxsus mənzilə qeydiyyata salıb. Xalam xəstə olduğu üçün (şəkər, hipertoniya, piylənmə və s.) mən ona qulluq edirdim, birgə yaşayış dövründə birgə təsərrüfat aparırdıq. Bizə qonşular çox köməklik göstərirdi. Mən Sumqayıt şəhərində Zəngilan rayon 15 saylı orta məktəbində təhsil almağıma baxmayaraq fərdi işlərdə çalışmaqla çörək pulu qazanaraq təqaüddə olan xalamın dərmanları, müalicəsi və qidalanması üçün sərf edirdim...Bizim həyatımız, problemimiz bütün təəssüratı ilə qonşulara məlum idi. Mənzilin notarial qaydada mənim adıma sənədləşdirilməsi üçün 2012-ci ilin avqust ayında xalam ərazi üzrə 2 saylı MİS-dən mənim adıma arayış almış, lakin həmin ərəfədə xəstələndiyi üçün məqsədini həyata keçirə bilməmişdir. 29.09.2012-ci il tarixdə xalam vəfat etdi. O, vəfat edərkən binanın qonşuları, o cümlədən, onun çox etibar etdiyi 53 saylı mənzildə yaşayan Məmmədova Tamilla Mustafa qızı yanında olmuşdur. Xalam ölüm yatağında ikən evin sənədlərini Tamilla xalaya verərək, evini və ona məxsus digər əşyaları mənə vəsiyyət etdiyini, birinci həyat yoldaşından olan İradə adlı qızına isə heç nəyini halal etmədiyi söyləyib. Çünki xalam birinci həyat yoldaşından boşandığı üçün hər iki tərəfin razılığı əsasında 2 yaşlı qızı İradəni atasına vermiş, qız ata və analığı ilə birgə yaşamış onların tərbiyəsini alıb. Sonradan ailə həyatı quran İradənin iki uşağı olub. Xalam Həqiqət qızı İradəni heç zaman öz övladı hesab etməyib. Bunu həyətdə bütün qonşular bilir və 32 ailə bunu təsdiq edir. Sağlığında xalamı axtarmayan qızı İradə və onun əri tez-tez üstümə hücum edərək, evdən çıxmağımı və evin sənədlərini onlara verməyimi tələb edirdi, köməksizliyimdən və gəncliyimdən istifadə edərək məni döyüb-söyürdülər.
2013-cü ilin iyul ayında ordu sıralarına çağırılmışam. Vətənimi, torpağımı, dövlətimi qoruyurdum. İradə isə ərinin qohumlarının vəzifəli tanışlarının hesabına məni məhkəmələrə verib. Mənə çatan məlumatlara görə, Sumqayıt şəhər məhkəməsinin hakimi İlyas Mahmudova 2000 min verib məni evdən çıxarmaq üçün qərar alıb. Lakin Sumqayıt Apelyasiya məhkəməsi mənim yaşayış hüququmu təmin edib. Ali Məhkəmənin hakimi Qəhrəman Allahverdiyev isə 5 min manata apelyasiya məhkəməsinin qərarını ləğv edərək, yaşayış hüququmdan məhrum edib. Küçəyə atıb. Əgər mənim Azərbaycanda yaşayış hüququm yoxdursa mən Azərbaycanı niyə qoruyurdum? İndi məni gecə-gündüz bir sual düşündürür".
Şikayətçi yazır ki, 2015-ci ilin yanvar ayının 5-də orduda xidməti başa vurub geri qayıdıb: "Hazırda küçələrdə skameyka üstündə nə vaxta qədər yatacağam. Hərbi xidmət keçərkən Sizə Heydər Əliyev Fondunun sədrinə qulluq etdiyim hərbi hissənin tabe olduğu FHN-nə Ali Məhkəməyə 4 məktub 1 teleqramla müraciət etdim. Heç bir faydası olmadı, heç cavab verəndə tapılmadı. Mən bilirəm ki, İradənin əri Etibar Pirverdiyevin xalası oğludur. Onların pulu çoxdur. Onlar bu işi pul hesabına həll etmək istəyirlər. Ancaq "Quran”da da yazılıb ki, yetimin haqqını tapdalamayın. Yetimi incitməyin. Demək mən səngərdə bu rüşvətxor məmurları, hakimləri qoryurdum. Onlar isə arxada məni evsiz-eşiksiz qoyurlar. Yaşayış hüququndan məhrum edirlər. Çox hörmətli Prezident! Siz də atasınız. Sizin də övladınız var. Axı mən Sizi və Sizin övladlarınızı qoruyurdum. Mənim 18 yaşınadək puç olmuş hayatımı gözünüz önünə gətirin. İndi iş yenidən Ali Məhkəmədədir. Bəlkə bu fironları Siz dayandırasınız. Bu məktubu yazarkən gözlərimdən damla-damla yaş axırdı. Bir anlıq dünya başıma fırlandı. Sizdən imdad gözləyirəm".  (asiya.az)