Xeberle.com-un məlumatına görə, hadisə şəhərin 43-cü məhəlləsində, Ağa Quliyev küçəsində yerləşən Sumqayıt Dövlət Universitetinin məcburi köçkünlər yaşayan yataqxanasında qeydə alınıb.

Yanğın beşmərtəbəli yaşayış binasının dəhlizində və mətbəxində başlayıb, sonra digər ərazilərə keçib.

Hadisə zamanı 114 ailənin yaşadığı binadan 40 nəfər təxliyyə olunub. Onlardan 8-i yerli, qalanı isə məcburi köçkün ailələrindən olub.

Əraziyə FHN-nin çox sayda yanğınsöndürən maşını cəlb olunub və yanğın söndürülüb.

Sumqayıt şəhər İcra Hakimiyyəti başçısının birinci müavini Faiq Kərimov, Qubadlı rayonunun İcra hakimiyyətinin başçısı Malik İsaqov və digər rəsmi şəxslər hadisə yerinə gəliblər.

Hadisə zamanı yataqxana sakinləri arasında zəhərlənənlər olub.

Zərərçəkənlər Sumqayıt şəhər Təcili Tibbi Yardım Xəstaxanasına yerləşdiriliblər. Zəhərlənənlər arasında FHN və polis əməkdaşları da olub. Bir sıra KİV-lərdə ölənlərin olduğu bildirilsə də, Sumqayıt şəhər İcra hakimiyyətindən bu məlumatı Xeberle.com-a təkzib ediblər.

Sumqayıt şəhər Təcili Tibbi Yardım Xəstəxanasının növbətçi-terapevti Kamil İbadov Xeberle.com-a açıqlamasında bildirib ki, yanğın zamanı xəstəxanaya 16 nəfər gətirilib. K. İbadov qeyd edib ki, zərərçəkənlərə tibbi yardım göstərilib və ağır vəziyyətdə olan xəstə yoxdur.

Məlumat ücün bildirək ki, yataqxanada 1993-cü ildən qacqın və məcburi köckünlər məskunlaşıb, hazırda Sumqayıt Dövlət Universitetinin heç bir tələbəsi yataqxanada yaşamır.

Xeberle.com