Avqustun 31-də paytaxtın Nizami rayonunda yerləşən "Neolit” şadlıq evində müğənni İzzət Bağırovun işçilərinin döydüyü şəxsdən xəbər var. Həmin gün İzzət Bağırovun Elçin adlı prodüseri məclis iştirakçılarından olan Aslanov Novruza "beşbarmaq”la zərbələr endirib.
Xeberle.com xəbər verir ki, N.Aslanovun ailəsi Femida.az-a mətbuatda yayılan məlumatların bir qisminin həqiqəti əks etdirmədiyini deyib.
Hadisə baş verən günü Novruz Aslanovun övladının yox, yaxın qohumlarının ali məktəbə daxil olması münasibətilə məclis təşkil edilib. Həmin məclisdə operator müğənnini yox, qonaqları çəkdiyi üçün gərginlik yaşanıb. Bu zaman İzzət Bağırov "Niyə tərbiyəsizlik edirsiniz? Sənətkarı çəkmirsiniz” deyib. Bu isə məclis təşkilatçılarının xoşuna gəlməyib. Elməddin Nəbiyevin İzzət Bağırova "Niyə mənə tərbiyəsiz dediniz?” sualına görə müğənni ilə aralarında gərginlik yaranıb. Gərginliyin artdığını görən ailə üzvləri davaya müdaxilə ediblər. Həmin anda Novruz Aslanov "beşbarmaq”la İ.Bağırovun prodüseri Elçin tərəfindən vurulub. Məclis iştirakçıları ilə İzzət Bağırov arasında yaranan gərginlik daha sonra kütləvi davaya çevrilib. Restoranın mühafizəçiləri də davaya qoşulub.
Ailə üzvlərinin sözlərinə görə, hazırda 3 saylı şəhər xəstəxanasının reanimasiya şöbəsində müalicə alan Novruz Aslanovun vəziyyəti ağır olaraq qalır.
"Bəs, İzzət Bağırov hadisədən sonra sizinlə əlaqə saxlayıbmı?” sualını cavablandıran ailə üzvləri bildirib ki, müğənninin xanımı dəfələrlə onlarla telefon əlaqəsi yaradıb.
"Hadisədən sonra İzzət Bağırovun həyat yoldaşı bir dəfə bizimlə telefonda danışıb. Telefonda dedi ki, İzzət hadisə ilə bağlı üzr istəməyə hazırdır. Hətta bir neçə müğənnini - Firuzə İbadova, Cavanşir Məmmədov, Zöhrə Abdullayeva və başqalarını üzrxahlıq üçün yanımıza göndərdilər. Həmin gün İzzət Bağırovun həyat yoldaşı da gəlmişdi. İzzət Bağırov bu günə kimi xəstəxanaya gəlməkdən qorxurdu. Qohumlarımızın ondan qisas alacağını düşünürdü. Bizsə bunun tam əksini onlara çatdırdıq. Bu gün İzzət özü də xəstəxanaya gəlmişdi. Hadisəyə görə ailəmizdən üzr istədi. Onlar bizə müəyyən məbləğdə pul təklif etsələr də, qəbul etmədik. Bütün xəstəxana xərclərini, vəkil pulunu özümüz ödəmişik”.
Ailə üzvlərinin iddialarına görə, Novruz Aslanovun başına zərbələr endirən Elçin polis tərəfindən sərbəst buraxılıb.
"Novruzun başına küt alətlə zərbələr endirən Elçini xəstəxananın həyətində gördük. Onun azadlığa necə buraxıldığını başa düşə bilmirik”, - ailə üzvləri bildiriblər.
Xatırladaq ki, faktla bağlı Nizami Rayon Polis İdarəsində cinayət işi başlanıb, araşdırmalar davam etdirilir. DİN isə bu barədə rəsmi məlumat yaymayıb.
Xəbərdən istifadə edərkən istinad etmək vacibdir.
