Bu gün Bakıda dindarlar arasında “Ləzgi məscid”i kimi tanınan Aşurbəy məscidində polislə dindarlar arasında mübahisə olub. 

Avropa.info-nun ərazidə olan əməkdaşının verdiyi xəbərə görə, Cümə namazını qılmaq üçün məscidə gələn insanların sayı həddən artıq çox olduğundan dindarların bir qismi məscidə daxil ola bilməyib. Dindarlar cümə namazını məscidin çölündə qılmaq istəyiblər. Polis namaz qılan şəxslərin yolu bağladığını əsas gətirərək buna icazə verməyib. Nəticədə tərəflər arasında qarşıdurma yaranıb.

Qarşıdurma uzun çəkməyib və polislə dindarlar ortaq məxrəcə gəliblər. Namaz qılan şəxslər yolun bir hissəsini açıq qoyub namaz qılıblar. Nəticədə onların ibadəti ərazidə gediş-gəlişə mane olmayıb. Qeyd edək ki, Aşurbəy məscidi sələfi dindarların ibadət etdiyi məsciddir. Məscid əhli bir neçə gün öncə Qafqaz Müsəlmanları İdarəsinin Aşurbəy məscidini qeydiyyatdan keçirmədiyinə görə mətbuat konfransı keçirmişdilər.