2 aylıq körpənin oğurlanması işində adı hallanan telejurnalist Elgiz Əkbər Teleqraf.com-a açıqlamasında bildirib ki, bu xəbəri eşidəndə hədsiz dərəcədə üzülüb.    

Onun sözlərinə görə, hadisə ilə bağlı polislər ANS televiziyasına müraciət edib: “İstintaqçılar  uşağı oğurlayanı tapmaq üçün “Adam İçində” verilişinin video-yazısına baxmaq istədiklərini bildirdilər. Həqiqətən Aysel Əhmədova bir müddət öncə köməksiz vəziyyətdə bizim verilişə müraciət etmişdi. Biz əlimizdən gələni etdik ki, onun hüquqları bərpa olunsun. Qadının aliment problemi də vardı. Həyat yoldaşından ayrıldığı üçün aliment tələb edirdi. Bu məsələlərdə ona yardımçı olduq.    Həmin xanım verilişimizə gələndə 8 aylıq hamilə idi. Sonra onu doğum evinə göndərdik, həkimlərin təmənnasız köməyi nəticəsində ana oldu. Çox təəssüf edirəm ki, bir dələduz qadın uşağı oğurlayıb. Biz indi onu aydınlaşdırırıq”.  

Teleaparıcı bildirib ki, uşağı oğurlayan qadın da verilişə gəlibmiş: “Uşağı oğurlayan həmin qadın da tamaşaçı qismində  bizim verilişə gəlib. Çox böyük ehtimalla həmin qadın uşaq alverçisidi. Həmin qadın iki gün verilişə gəlib, amma içəriyə daxil olmayıb. ANS televiziyasının tələblərinə uyğun olaraq onların şəxsiyyət vəsiqəsi götürülür və qeydiyyat aparılır. Qadının əvvəldən belə bir fikirinin olduğu hiss olunur. Bilib ki, şəxsiyyət vəsiqəsi qeydiyyata alınacaq, bu baxımdan içəri girməyib.    Aysel Əhmədova hələ hamilə olan dövrdə həmin oğru qadın  onun qarşısnı kəsirmiş. Əlimizdən gələn köməkliyi edəcəyik ki, körpə tapılsın. Ümid edirəm ki, o, sağ-salamatdır”.