"Qarabağ”ı çempionluq münasibəti ilə təbrik edirəm. Məğlub olmağımıza baxmayaraq, komandamızın çıxışından razı qaldım”. Bu sözləri "Qarabağ”la oyundan sonra "Sumqayıt”ın baş məşqçisi Aqil Məmmədov deyib.

Şahin Əliyev, Budaq Nəsirov kimi oyunçuların özlərini yaxşı tərəfdən göstərə bildiklərini qeyd edən gənc mütəxəssis, növbəti mövsüm hansı dəyişikliklərin olacağını deməyib:

"Əgər yaxşı nəticə qazanmaq istəyiriksə, dəyişikliklər etməliyik. Hansı dəyişikliklər olacağını deyə bilmərəm. Konkret məqsədlər uğrunda mübarizə aparmaq istəyirik”.

"Qarabağ”ın baş məşqçisi Qurban Qurbanov isə "Qarabağ” komandasına aidiyyatı olan hər kəsi çempionluq münasibəti ilə təbrik edib. Son turların bir qədər ağır, stressli alındığını bildirən baş məşqçi çətin mübarizədən qalib ayrıldıqlarını qeyd edib:

"Ümumiyyətlə, ağır mövsüm keçirdik. Çətin mübarizədən sonra çempion olduq. Futbolçular layiqli mübarizə apardılar. Düzdür, son iki oyunda enişin olduğu deyilirdi. Biz bunu normal qarşıladıq. Çünki səfərdə iki çətin rəqibə qarşı çıxış etdik. Bütün bu çətinliklərdən sonra çempion olduq. Mübarizə aparan, xarakter nümayiş etdirən oyunçularım nəticə üçün oynamağı bacardılar”.

İzləyicilərinin "İnter” kimi rəqib olduğunu bildirən Qurban Qurbanov "bankirlər”in onları bir an da rahat buraxmamasından "şikayətlənib”: 

"Həmin komanda bizi bir an rahat buraxmadı, nəfəs almağımıza imkan vermədi. "Qəbələ” – "İnter” oyununa baxarkan düşünürdüm ki, "İnter” son saniyələrdə də qol vurmağı bacaran komandadır”.

Azərbaycan kubokunun finalı haqqında da fikir bildirən təcrübəli mütəxəssis belə şansın hər dəfə ələ düşmədiyini deyib:

"İndi qarşıda bizi Azərbaycan Kubokunun finalı gözləyir.  Həmin matça qədər vaxtımız var. Belə bir şans futbolçunun, məşqçinin əlinə həmişə  düşmür. Vəziyyətdən düzgün istifadə etməyi bacarmalıyıq. Transfer məsəli daima problemli mövzudur. İndiki məqamda bu barədə danışmaq istəmirəm. Bir qədər istirahət edək, daha sonra bu barədə ümumi danışarıq. Sadəcə, deyim ki, çempionluqda hər bir futbolçunun əməyi var. Cari çempionluq mənim üçün daha çətin oldu. Hesab edirəm ki, adı qoruyub-saxlamaq onu qazanmaqdan daha çətindir. Çempionluğu necə qeyd edəcəyimizi hələ müəyyənləşdirməmişik. Yəqin ki, belə bir tədbir keçirib, sizi də bu mərasimə dəvət edəcəyik”.  (apasport.az)