Məlum olduğu kimi, bu gün futbol üzrə Azərbaycan milli komandası AVRO-2016-nın seçmə mərhələsi çərçivəsində səfərdə Norveç yığması ilə qarşılaşacaq. Bu qarşılaşma həm də seçmə komandamızın baş məşqçisi Robert Prosineçkinin millinin "sükanı arxası”nda ilk ciddi sınağı olacaq. Debüt matçında Malta üzərində qələbəyə sevinən xorvatiyalı mütəxəssisin komandası bu dəfə daha güclü Norveçlə oyun gözləyir.

Serbiya ilə oyun göstərdi ki...

Ötən həftənin bazar günü Avstriyada qarşılaşdığı Serbiya milli komandasına 1:4 hesabı ilə məğlub olan Azərbaycan yığmasının sərgilədiyi oyun bugünkü qarşılaşmanın nəticəsi haqqında nikbin düşünməyə əsas vermədi. Düzdü, matç qeyri-rəsmi oyunda qeydə alınan nəticə ciddi önəm kəsb etmir, ancaq oyun komponentində bəzi nüansları ortaya qoymuş oldu. Məsələn, buraxılan dörd qoldan ikisində torumuz standart vəziyyətlərdən sonra silkələndi. Yadınızdadırsa, bugün qarşılaşacağımız Norveçlə Bakıdakı görüşdə də yeganə topu məhz standart vəziyyətdən sonra qapımızda görmüşdük. Bu isə hələ də yığmamızın bu problemi aradan qaldıra bilmədiyini göstərir.

Yeri gəlmişkən, xatırladaq ki, milli komandamızın hazırlıq qarşılaşmasından bir gün sonra skandinaviyalılar da yoldaşlıq matçında qüvvəsini sınamış və öz meydanında yarımadanın digər təmsilçisi İsveçlə qarşılaşmışdı. Oyunun nəticəsi isə qolsuz heç-heçə olmuşdu.

Oyunöncəsi problemlər

Komandaların oyunu ərəfəsində seçmə komandamızın heyətlə bağlı hər hansı problemi gözə dəymir. Düzdür, təlim-məqş prosesinin gedişində zədələnən Toğrul Erat artıq yığmanın düşərgəsində deyil, ancaq milliləşdirilmiş türkiyəli yığmanın aparıcı üzvü olmadığından onu ciddi itki saymağa dəyməz.

Meydan sahiblərində isə cəzalı olan Tarik Elyunussi qarşılaşmanı kənardan izləməli olacaq. Almaniya "Hoffenhaym”ında çıxış edən 27 yaşlı oyunçu ilə yanaşı, "Rusenborq”un müdafiəçisi Stefan Strandberq də yığmanın düşərgəsində deyil. Düzdür, 25 yaşlı mərkəz müdafiəçisinin bugünkü görüşdə meydana çıxması da mümkündür. Hər halda, Norveç mətbuatı Strandberqin millinin düşərgəsinə qoşula biləcəyini istisna etmir. Bundan başqa, Havard Nordtveit və Mohamed Elyunussinin də meydana çıxması sual altındadır.

Prosineçki heyəti erkən açıqladı

Oyunöncəsi maraq doğuran məsələlərdən biri də komandaların matça hansı "onbirlik”lə başlayacağıdır. Azarkeşləri düşündürən bu suala isə dünənki oyunöncəsi mətbuat konfransında aydınlıq gəldi. Prosineçkinin açıqladığı start heyətinə nəzər saldıqda Serbiya ilə matçdakı "onbirlik”də olmayan üç futbolçunun meydanda olacağını görürük. Qapısını Kamran Ağayevin qoruyacağı yığmamızın arxa xətti Rəşad Sadıqov, Bədavi Hüseynov, Maksim Medvedev və Arif Daşdəmirovdan təşkil olunacaq. Dayaq yarımmüdafiəçisi funksiuasını Qara Qarayevlə Rahid Əmirquliyev olacaq. Yarımmüdafiə xəttinin digər "sakin”ləri isə Əfran İsmayılov, Cavid Hüseynov və Dmitri Nazarov olacaq. "Vikinqlər"lə oyunda hücumun sivri ucunda isə xorvatiyalı çalışdırıcının sevimli oyunçularından olan Ruslan Qurbanov forma geyəcək.

Norveç milli komandasının Azərbaycan seçmə komandasına qarşı keçirəcəyi oyunda hansı start heyəti ilə oynayacağına gəlincə, komandanın 4-4-2 taktiki sxeminə üstünlük verəcəyi güman olunur. Qapıda Oryan Nilandın, müdafiə xəttində isə Omar Elabdallaui, Even Hovland, Veqard Forren və Tom Höqlinin forma geyməsi gözlənilir. Orta xəttdə isə Per Çilyan Skyelbred, Stefan Yohansen, Martin Odeqard və Havard Nordtveit çıxış edəcək. Yalnız sonuncunun ilk dəqiqələrdən meydançaya çıxıb-çıxmayacağı məlum deyil. Yüngül zədəsi olan yarımmüdafiəçi oyuna qədər hazır olmasa, onu Qana əsilli Aleksander Tettey əvəz edəcək. Yığmamızla qarşılaşmada baş məşqçi Per-Matias Hoqmonun əsas qol "silahı” hazırda 12 qolla Norveç çempionatına bombardirlik edən Aleks Soderlund olacaq. Ona bunda "Burnemut”un yeni transferi Joşua Kinq kömək edəcək.

Prosineçkinin menyusuna

Prosineçkinin hücum futbolunun tərəfdarı olması, oyunçulardan topa daha çox nəzarət etməyi tələb etməsi müsbət haldır. ancaq xorvatiyalı çalışdırıcı bəzi məqamlarda səhvləri ilə də diqqət çəkir. Məsələn, xorvatiyalı mütəxəssisin həm hazırlıq, həm də rəsmi oyunlarda Əfran İsmayılova sol cinahda yer verməsi, sol cinahda görməyə alışdığımız Ruslan Qurbanova isə əks cinahda oynamağı tapşırması anlaşılmazdır. Məntiqlə onların yerini dəyişsə, hər ikisi üçün rahat olar. Bundan əlavə, Cavid Hüseynovu cinaha çəkmək və Dmitri Nazarova mərkəzdə çıxış etmək imkanı vermək daha effektli ola bilər.

Azərbaycan - Norveç: 14-cü duel

AVRO -2016-nın seçmə mərhələsinin bu gün baş tutacaq Norveç - Azərbaycan qarşılaşması iki ölkə təmsilçilərinin 13-cü dueli olacaq. İndiyədək yığmalar və avrokuboklar səviyyəsində 13 matç baş tutub. Bu oyunların yarısından çoxunda - 7 dəfə skandinaviyalılar qalib gəlib. Bizimkilər isə 4 dəfə qələbə qazanıb, 2 dəfə heç-heçə edib.

Dünya çempionatının seçmə mərhələsi

Əsas yığma

02.06.1996. Norveç - Azərbaycan 5:0

06.09.1997. Azərbaycan - Norveç 0:1

Avropa çempionatının seçmə mərhələsi

U-21

06.10.2011 Azərbaycan - Norveç 0:2

01.06.2012 Norveç - Azərbaycan 1:0

10.10.2013. Norveç - Azərbaycan 1:3

01.06.2014. Azərbaycan - Norveç 0:1

U-19

30.05.2007. Azərbaycan - Norveç 2:1

16.04.2010. Azərbaycan - Norveç 1:1

Avropa klub turnirləri

16.07.2009. "Rusenborq" (Norveç) - "Qarabağ" 0:0

23.07.2009. "Qarabağ" - "Rusenborq" (Norveç) 1:0

18.07.2013. "Tromse" (Norveç) - "İnter" 2:0

25.07.2013. "İnter" - "Tromse" (Norveç) 1:0

Yığmamız üçün uğursuz hakim

AVRO-2016-nın seçmə mərhələsində bu gün keçiriləcək Norveç – Azərbaycan qarşılaşmasını idarə edəcək polşalı Pavel Gil komandalarımız üçün uğursuz hakimdir. Belə ki, 39 yaşlı FİFA referisi indiyədək 2 dəfə təmsilçimizin matçında fit çalıb ki, hər iki qarşılaşmada da qalib təərəf rəqib olub. 2013-cü ildə Çempionlar Liqasının II təsnifat mərhələsinin cavab oyunları çərçivəsində keçirilən "Skenderbeu” (Albaniya) – "Neftçi” matçında fit çalan Gil matçın əsas vaxtında 0:0 hesabı qeydə alıb. Əlavə vaxtda fərqlənən albaniyalılar çempionumuzu mübarizədən kənarlaşdırıb. 0:1 hesablı məğlubiyyət həm də Böyükağa Hacıyevin istefası ilə nəticələnib.

Ötən il isə polşalı Avropa Liqasının qrupunda çıxış edən Azərbaycan çempionu "Qarabağ” üçün uğursuz olub. O, Ukrayna "Dnepr”i ilə 2-ci – Bakıdakı matçda ədaləti qoruyub. Bu matçda qələbə qazanacağı halda, 1/16 finala böyük addım atmaq imkanına malik ağdamlılar meydanı başıaşağı tərk edib – 1:2.

Millimiz üçün 5-ci, yoxsa 6-cı səbət?

Azərbaycan millisinin DÇ-2018-in seçmə mərhələsinin püşkatması zamanı hansı səbətdə yer alacağı FİFA-nın növbəti reytinq siyahısından asılı olacaq. İyulun 25-də Rusiyanın Sankt-Peterburq şəhərində keçiriləcək püşk zamanı Azərbaycan millisi son iki səbətdən birində yer alacaq. Robert Prosineçkinin yetirmələrinin 5-ci, yoxsa 6-cı səbətdə olmasına AVRO-2016-nın seçmə mərhələsinin bu ay keçiriləcək qarşılaşmaları ciddi təsir edəcək. Komandamız bu gün Norveçlə səfər matçında qalib gəlsə, sonuncu səbətdə olmayacağı dəqiqləşəcək. 5-ci səbətdə yerini təmin etmək üçün millimizə heç-heçə də kifayət edə bilər. 1 xal qazanacağı halda, yığmamızın son səbətə yuvarlanması digər oyunlardakı sensasiyalı nəticələrdən asılıdı. Bu ehtimal 0,7 faizə bərabərdir. Osloda qeydə alınacaq məğlubiyyət də komandamızın şanslarına az təsir edəcək. Belə olsa, millimizin 5-ci səbətdə yer almaq ehtimalı 91,5 faiz olacaq. Qeyd edək ki, Azərbaycan yığması 5-ci səbətə düşmək ehtimalı ən yüksək olan komandadır.

Tural Məmmədov