Birvaxtlar İsveç milli komandasını qitə birinciliklərində görmək çətin məsələ idi. Amma son dövrlərdə vəziyyət nisbətən fərqlidir. 1992-ci ildə doğma publika qarşısında Avropa çempionatında bürünc mükafat qazanan komanda AVRO-2000-dən etibarən bütün AÇ-lərdə iştirak edib.Bundan 16 il əvvəl yarışa Tommi Soderberq və Lars Laqerbak məşqçi cütlüyünün rəhbərliyi altında yollanan yığma turniri elə qrup mərhələsində başa vurmuşdu. Dörd il sonra isə tandem komandanı 1/4 finaladək daşıya bilmişdi. Ardınca yığmada Laqerbakin tək fəaliyyəti başladı. 2008-ci ildə onun rəhbərlik etdiyi komanda yenə qrupda qaldı. Məhz həmin yarışdan az sonra onu Erik Hamrin əvəzlədi. Düzdür, onun çalışdırdığı komanda da ötən AÇ-də qrupda qalmışdı, amma federasiya ona etimad göstərməkdə davam etdi.

İsveç favorit olmasa da...

Düzdür, Erik Hamrenin komandasını AVRO-2016-nın favoritləri sırasına aid etmək olmaz, ancaq Skandinaviya təmsilçisinin bütün rəqibləri özü ilə hesablaşmağa vadar etməsi qeyd olunmalıdır. Fakt budur ki, heç kim İsveç yığması ilə oyunda asan gəzintiyə ümid etmir. Komandanın lideri şübhəsiz Zlatan İbrahimoviçdir. Digər komanda üzvləri dərhal nəzərə çarpmayan, amma əslində böyük önəm kəsb edən əmək sərf edir. Təsadüfi deyil ki, "göy-sarılar” komanda oyununu yüksək səviyyədə oynamaq bacarığı ilə diqqət çəkir.

Seçmə mərhələni necə adladı?

İsveç milli komandası seçmə mərhələni çətinliklə adladı. Əslində, Skandinaviya təmsilçisinin AVRO-2016 yolunda bu qədər problem yaşayacağı proqnozlaşdırılmırdı. Seçmə mərhələnin ilk dörd matçında maksimum nəticənin əldə olunması da "Tre Krunur”a olan ümidləri artırmışdı. Ancaq sonradan İbrahimoviçin oynamadığı matçlarda Rusiya və Avstriyaya uduzan şimallılar 3-cü yeri itirmək təhlükəsi ilə üz-üzə qalmışdı. Əsas rəqibləri üzərində qələbəsi olmayan İsveç sonda yalnız qrup üçüncüsü oldu. Pley-off mərhələsində isə Danimarkadan üstün olan İsveç adını AVRO-2016-nın iştirakçıları arasına yazdıra bildi. İlk oyunda qələbə topunu vuran İbrahimoviç ikinci matçda isə həm qol vurmaqla, həm də məhsuldar ötürmə verməklə cütün taleyini həll etdi. Yeri gəlmişkən, Zlatan İbrahimoviç qitə birinciliyində yeni rekorda imza ata bilər.Bunun üçün İsveç millisinin kapitanına 1 qol vurmaq kifayət edəcək. Belə ki, ardıcıl üç Avropa çempionatının final mərhələsində fərqlənənlər arasında İbrahimoviç də var. 2004, 2008 və 2012-ci illərdəki Avropa çempionatında rəqib qapılarına yol tapmağa müvəffəq olan Zlatan yenə fərqlənə bilsə, dörd Avropa çempionatında qol vurmuş ilk oyunçu ünvanına yiyələnəcək. Ona karyerasını davam etdirənlərdən yalnız Kriştiano Ronaldo şərik çıxa bilər.

İsveç əvvəlki Avropa çempionatlarında:

1960 – İştirak etməyib

1964 – Final mərhələsinə yüksələ bilməyib

1968 – Final mərhələsinə yüksələ bilməyib

1972 – Final mərhələsinə yüksələ bilməyib

1976 – Final mərhələsinə yüksələ bilməyib

1980 – Final mərhələsinə yüksələ bilməyib

1984 – Final mərhələsinə yüksələ bilməyib

1988 – Final mərhələsinə yüksələ bilməyib

1992 – III yer

1996 – Final mərhələsinə yüksələ bilməyib

2000 – Qrup mərhələsi

2004 – 1/4 final

2008 – Qrup mərhələsi

2012 – Qrup mərhələsi

"23-lüy”ü ən tez açıqlayan milli

İsveç yığma komandası Avropa çempionatının iştirakçıları arasında "23-lüy”ünü açıqlayan ilk komanda idi. Digər AÇ iştirakçıları kimi öncə geniş heyət açıqlamağa lüzum görməyən Erik Hamren birbaşa 23 oyunçunun adını açıqlamışdı.

Qapıçılar: Andreas İsaksson ("Kasımpaşa”, Türkiyə), Robin Olsen ("Kopenhagen”, Danimarka), Patrik Karlqren (AİK)

Müdafiəçilər: Lüdviq Auqustinsson, Erik Yohansson (hər ikisi "Kopengahen”, Danimarka), Pontus Yansson ("Torino”, İtaliya), Viktor Lindelöf ("Benfika”, Portuqaliya) Andreas Qranqvist ("Krasnodar”, Rusiya), Mikael Lüstiq ("Seltik”, Şotlandiya), Martin Olsson ("Norviç”, İngiltərə)

Yarımmüdafiəçilər: Cimmi Durmaz ("Olimpiakos”, Yunanıstan), Albin Ekdal ("Hamburq”, Almaniya), Oskar Hilyemark ("Palermo”, İtaliya), Sebastian Larsson ("Sanderlend”, İngiltərə), Pontus Vernblum (MOİK, Rusiya), Erkan Zengin ("Trabzonspor”, Türkiyə), Oskar Leviçki ("Malmö”), Emil Forsberq ("Leyptsiq”, Almaniya), Kim Çöllstrem ("Qrasshoppers”, İsveçrə)

Hücumçular: Markus Berq ("Panatinaikos”, Yunanıstan), Con Quydetti ("Selta”, İspaniya), Zlatan İbrahimoviç (PSJ, Fransa), Emir Kuyoviç ("Norrköpinq”)

AÇ iştirakçısı bizə qarşı: Ponomaryovu İsveçə yola salanlar

İsveç milli komandası ilə indiyə qədər yalnız 2002-ci ildə Yaponiya və Cənubi Koreyada düzənlənən dünya çempionatının seçmə mərhələsində qarşılaşan Azərbaycan milli komandası hər iki halda "Tre Krunur”a uduzmuşdu. Həmin vaxt uzun illərdir İsveçdə yaşayan İqor Ponomaryovun İsveç qarşısına çıxardığı yığma komandamız Bakıda bir, Stokholmda isə üç cavabsız qolla məğlubiyyətə uğramışdı. Məhz bu yenilgidən sonra komandamızın çalışdırıcısı İqor Ponomaryov vəzifəsindən istefa verərək İsveçə yollandı.

AVRO-2016-da oyunları:

13 iyun. 20:00. İrlandiya – İsveç

17 iyun. 17:00. İtaliya – İsveç

22 iyun. 23:00. İsveç – Belçika

Tural Məmmədov