2009-cu ilin noyabr ayında BƏƏ-də təşkil olunan turnir çərçivəsində mübarizə apardığımız və iki cavabsız qolla qalib gəldiyimiz cari seçmə mərhələdə isə bir dəfə qarşılaşdığımız və səfərdə 0:0 hesabı ilə heç-heçə oynadığımız Çexiya millisi bizim üçün yad rəqib sayılmır. Deməli, iki komanda arasında indiyə qədər keçirilmiş oyunlardakı qazandığımız təcrübəyə və "Narodnı tim”in cari seçmə mərhələdəki çıxışına əsasən müəyyən nəticələrə gələ bilərik. Məhz bu səbəbdən bugünkü matçda lehimizə və əleyhimizə işləyəcək məqamlara ayrı-ayrılıqda aydınlıq gətirməyə çalışacağıq.
 
Lehimizə olan amillər
* Bugünkü oyunda milli komandamızın doğma  meydanda çıxış etməsini lehimizə olan məqam kimi qiymətləndirə bilərik. Artıq uzun illərdir komandamızın doğma publika önündə daha rahat oynadığı danılmazdır. Üstəlik, milli yığma komandamızın seçmə mərhələdə nisbətən uğurlu nəticələrə imza atması azarkeşlərin seçmə komandaya olan inamını artırıb. Təbii ki, "onikinci oyunçu”nun milliyə münasibətinin yaxşı mənada dəyişməsi xeyirimizə işləyə bilər.
* Çexiya ilə matç kapitan Rəşad Sadıqovun millidə son oyunudur. Məhz bu amil də milli üzvləri üçün stimul ola bilər. Nə də olsa, "14 nömrə”ni zəfərlə yola salmaq hamının arzusudur.  Bununla yanaşı,  San-Marino böyükhesablı qələbənin belə demək mümkünsə, epizodik uğur olmamağını göstərmək üçün daha güclü Çexiyadan 3 xal alınmalıdır.
* Karel Yarolimin "drujinası"nın Dünya çempionatına qatılmaq imkanlarını itirməsi də önəmli faktorlardandır. Düzdür, rəqib komanda istənilən halda, millimizə qalib gəlməyə çalışacaq. Amma rəqibin qarşısında yüksək tapşırıqların həllinin durmadığı da unudulmamalıdır. Üstəlik, qrup mırhələsində cəmi 9 xal toplayan çexlər heç də yaxşı günlərini yaşamır.
*   Bu gün keçiriləcək qarşılaşmada rəqibin Teodor Gebre Selassi, Patrik Şik və Tomas Kalas kimi oyunçularından faydalana bilməməsi də bizim üçün əlavə üstünlük ola bilər.
 
Əleyhimizə olan amillər
* Milli seçmə komandamızın baş məşqçisi Robert Prosineçkinin millimizdəki gələcək taleyinin sual altında olması əleyhimizə olan məqamlardandır. İlin sonunda müqaviləsi başa çatacaq xorvatiyalı mütəxəssisin motivasiyasının əvvəlki kimi olmadığı gün kimi aydındır.
* Yığma komandamızda Səlahət Ağayevin zədə səbəbindən ümumiyyətlə milliyə dəvət edilməməsi, bugünkü  matçı buraxacağı dəqiqləşən Araz Abdullayevin  yığmanın düşərgəsinə "Anortosis"dən zədəli halda qoşulması, Maksim Medvedevin isə eyni səbəbdən yığmanın düşərgəsindən ayrılması məşqçilər korpusunu çətin duruma salan məqamlardandır.
* Heyətlə bağlı daha bir problem isə milli komandamızın əksər üzvlərinin oyun praktikasından əziyyət çəkməsidir. Bu gün start heyətində meydana çıxacaq Kamran Ağayevin "Mlada Boleslav”da, Rahid Əmirquliyev və Əfran İsmayılovun "Qarabağ"da, Ruslan Qurbanovun isə "Qəbələ"də mütəmadi çıxış etməməsi qabardılmalı nüanslardandır.  
* Milli komandamızın indiyə kimi  rəqiblərinə qarşı "bir nömrə altında” oynamaması bizə üstünlük qazandırırdısa, hazırda  yığmamız nisbətən ciddi rəqib kimi qəbul olunur ki, bu da komandamızın işini çətinləşdirir.
Tural  Məmmədov
Xeberle.com
 

Xəbərdən istifadə edərkən istinad etmək vacibdir.