Sumqayıt şəhər Gənclər və İdman Baş İdarəsinin təşkilatçılığı ilə 2 iyul 2014-cü il tarixində “VİP İnternet Kafe” internet klubunda Kompüter Oyunları üzrə IX Azərbaycan Milli Çempionatının zona (Abşeron zonası üzrə) seçim turu keçirilib. 

Yarışın Əsasnaməsinə uyğun olaraq keçirilən zona mərhələsində Sumqayıt şəhərini, Abşeron və Xızı rayonunu təmsil edən komandalar və fərdi oyunçular iştirak ediblər.

Yarışmada Azərbaycan Respublikası Gənclər və İdman Nazirliyinin məsul işçisi Böyükağa Abdullayev, Azərbaycan Kiber İdman Federasiyasının prezidenti Ramil Əliyev, şəhər Gənclər və İdman Baş İdarəsinin Gənclərlə iş sektorunun müdiri Rüstəm Sadıqzadə Çempionatın məqsəd və vəzifələrindən, keçirilmə qaydalarından danışmış, iştirakçılara uğurlar arzu ediblər.

Gərgin keçən mübarizədən sonra “DOTA 2” oyunu üzrə Sumqayıt şəhərindən “Sumgait Gaming” komandası, Xızı rayonundan “FİFA 2014” oyunu 

üzrə Sənan Əliyev, “Super Street Fighter IV Arcade Edition 2012” oyunu üzrə isə Eyvaz Nəcəfov və Ənvər Mustafayev Çempionatın Bakı şəhərində keçiriləcək final mərhələsinə vəsiqə qazanmışlar. Qaliblərə Azərbaycan Kiber İdman Federasiyasının Diplomları təqdim edilib.

Sumqayıt şəhər Gənclər və İdman Baş İdarəsinin 

Gənclərlə iş sektorunun baş məsləhətçisi Ceyhun Hüseynov