Ötən gün futbol üzrə Azərbaycan yığması 2014-cü ildə növbəti yoxlama oyununa çıxdı. Berti Foqtsun çalışdırdığı komandamızın rəqibi Özbəkistan yığması oldu. Özbəkistan Azərbaycan üçün kifayət qədər tanış rəqibdi. Belə ki, millimiz tarixi ərzində bu komanda ilə 9 dəfə qarşılaşmışdı. 10-cu - yubiley matçı ərəfəsində Azərbaycanın özbəklər üzərində 4 qələbəsi vardı. Özbəkistan yığması millimizi iki dəfə üstələyə bilmişdi. Daha 3 oyunda da tərəflər meydanı sülhlə tərk etmişdilər. Bir qayda olaraq yoxlama oyunlarında qarşılaşmış komandaların oyunlarında bu qarşılaşmayadək bütövlükdə 21 qol vurulub ki, bunlardan 11-i yığmamızın aktivindəydi. Qalan 10 qolu isə özbəklər vurmuşdular. Bu oyunda isə tərəflər çox çalışsa da, qapıya yol tapa bilmədilər və «İdman – Azərbaycan» telekanalı ilə nümayiş olunan qarşılaşma sülhlə başa çatdı.

 Oyundan sonra Özbəkistan milli komandasının baş məşqçisi, vaxtilə SSRİ - nin gənclərdən ibarət yığmasının tərkibində dünya çempionu olmuş Mircalal Kasumov 168saat.com üçün eksklüziv müsahibə verib.

 - Dünya Çempionatının bir addımlığında idiniz. Ancaq alınmadı. İndiki vəziyyətdə Özbəkistan millisinin perspektivini necə görürsünüz?

  - Bura gələn oyunçular millinin ehtiyyat oyunçularıdır. Ancaq əksəriyyəti artıq oyunlara çıxıb. Komandamızda perspektivli oyunçular çoxdur. Sadəcə indiki futbolçular öz üzərində işləmirlər. Əvvəllər, bizim dövrümüzdə futbolçular üçün müəyyən çətinliklər var idi. Ya geyim olmurdu, ya meydançada problem olurdu. Ancaq indi futbolçular üçün hər bir şərait yaradılıb. Təəssüflər olsun ki, 18 – 22 yaşlı oyunçular azacıq şöhrət qazanan kimi öz üzərilərində işləməyi unudurlar. Ona görə də biz məşqçilərin əsas məqsədi bu yaşda oyunçulara düzgün istiqamət verməkdir. Bu gün millimizdə perspektivli futbolçular kifayət qədərdir. Əlimizdən gələni edirik ki, xalqımız millimizin oyunundan narazı qalmasın.

 - Özbəkistanın bir vaxtlar ulduzlardan ibarət komandası var idi -  «Paxtakor». Fyodorov, An, Çurkin... Komanda aviaqəzaya düşəndən sonrakı illərdə Özbəkistan futbolunda bir durğunluq gönəmi başladı. Daha sonra isə sizin nəsil gəldi. Bəs bu gün Özbəkistan futbolunun ulduzları kimlərdir?

  - Yaxşı legionerlərimiz var: Server Cəfərov, Adil Əhmədov, Vitali Denisov, Aziz Heydərov və başqalarının adlarını çəkə bilərəm. Bununla yanaşı, yeni çağırılan gənclərimiz də gələcəyin perspektivli futbolçuları olmağa namizəddirlər. Camşid İsqandarova, Sardar Raşidova, İqor Sergeyevə ümidlərimiz böyükdür.

  - Azərbaycan futbolu haqqında nə deyə bilərsiniz?

  - Azərbaycanla bağlı həmişə xoş təəssüratlarım olub. «Neftçi» klübunun oyunçuları yadıma gəlir. İsgəndər Cavadov, Vəli Qasımov kimi yaxşı futbolçular olub sizdə. Daha sonra Nazim Süleymanovu tanıdım. Nazim həqiqətən adı böyük hərflərlə yazılar futbolçuydu. Biz onunla «Alaniya» klubunun şərəfini qoruyurduq. Yüksək texnikaya sahib, sürətli oyunçu idi. Arif Əsədov, Vladislav Kadırov kimi oyunçular Azərbaycan futbolunun  simaları olub. Mən Ariflə və Vladislavla gənclərdən ibarət SSRİ yığmasının tərkibində dünya çempionu olmuşam. Azərbaycanlılar daha çox texniki oyuna üstünlük verirlər. Bugünkü komandanızda da yaxşı oyunçular var. Ümumilikdə komanda perspektiv vəd edir.

 Ancaq sox təəssüfləndiyim bir hal oldu. Bura gələndə öyrəndim ki, Nazim də, Arif də, Vladislav da bu gün işsizdirlər. Məncə, onların zəngin təcrübəsindən bəhpələnmək lazımdır. İnanıram ki, Azərbaycan futboluna veteran futbolçuların verə biləcəyi çox şey var.

 Söhbətləşdi: Elşən Allahverdiyev,168saat.com