Sumqayıt şəhər Gənclər və İdman Baş İdarəsinin təşkilatçılığı ilə Təbiət Elmləri Təmayüllü Gimnaziyanın idman meydançasında "Şahin” hərbi-idman oyununun Quba-Xaçmaz zona birinciliyi keçirilmişdir.
Əvvəlcə Azərbaycan Respublikasının Dövlət Himni səsləndirilmiş, ölkəmizin ərazi bütövlüyü uğrunda canından keçmiş şəhidlərimizin əziz xatirəsi bir dəqiqəlik sükutla yad edilmişdir.
Tədbirdə Azərbaycan Respublikasının Gənclər və İdman Nazirliyinin vətənpərvərlik və vətəndaşlıq tərbiyəsi sektorunun müdiri Əli Məmmədov, şəhər Gənclər və İdman Baş İdarəsinin rəisi Elgün Hümbətov, Vətən Müharibəsi şəhidi Mehrab Niftəliyevin atası Söhrab Niftəliyev çıxış edərək, Vətən Müharibəsində Şanlı Ordumuzun göstərdiyi şücaətlərdən, gənc nəslin xalqa, dövlətə sədaqət ruhunda yetişməsində, onların ordu sıralarına hazırlığında "Şahin” hərbi-idman oyununun əhəmiyyətindən danışmış, komandalara uğurlar arzu etmişlər.
Daha sonra "Şahinlər” müxtəlif sınaq mərhələlərindən keçməklə öz bacarıqlarını nümayiş etdirmişlər.
Yarışın nəticələrinə əsasən, Abşeron, Xaçmaz və Şabran rayonları müvafiq olaraq I, II, III yerlərə layiq görülmüşdür.
Qalib komandalar Gənclər və İdman Nazirliyinin fəxri fərmanları ilə təltif edilmişdir.
Qeyd edək ki, birincilikdə I, II yerləri tutan komandalar oyunların respublika final mərhələsində mübarizə aparacaqlar.
Xəbərdən istifadə edərkən istinad etmək vacibdir.
