Bu gün dünya valyuta birjalarında ticarət aktivliyinin artacağı gözlənilir
Amerikanın inflyasiyasına dair mənfi işarələr çərşənbə günü dolların dünya valyuta birjalarında qiymətinin ucuzlaşmasına səbəb olub. Bu gün isə maliyyə bazarlarında önəmli iqtisadi göstəricilər açıqlanacaq və bunun fonunda dünya valyuta birjalarında güclü hərəkətliliyin şahidi ola bilərik. Avro və funtun məzənnələri üzrə kəsilə biləcək önəmli qiymət səviyyələrini nəzərə almaqla, bazarların istiqamətini müəyyənləşdirmək mümkün olacaqdır.
Çərşənbə günü Amerikanın idxal və ixrac qiymət indekslərinin gözlənilənlərdən də pis çıxmasından sonra dolların dünya valyuta birjalarında qiyməti sürətlə ucuzlaşmağa başladı. İdxal və ixrac qiymət indekslərinin mənfi açıqlanması Amerikanın inflyasiyasınının təzyiq altında olduğuna işarədir. Amerikanın avqust ayı üzrə inflyasiya səviyyəsi isə sabah Bakı vaxtı ilə saat 16:30-da açıqlanacaq.
Bu gün isə Bakı vaxtı ilə saat 13:00-da Avrozonanın inflyasiya səviyyəsi yayımlanacaq. Eyni zamanda, saat 12:30-da Böyük Britaniyanın pərakəndə satış dövriyyəsi, saat 15:00-da Böyük Britaniya Mərkəzi Bankının uçot faiz dərəcəsəi və saat 16:30-da Amerikanın istehsalçı qiymət indeksi və pərakəndə satış dövriyyəsi ilə bağlı statistik məlumatlar açıqlanacaq.
Avronun dollara nisbətən qiymətinin önəmli dəstək səviyyələri 1.1200 və 1.1122$, önəmli müqavimət səviyyələri isə 1.1327 və 1.1366$-dır. Funtun dollara nisbətən qiymətinin önəmli dəstək səviyyəsi 1.3137$, önəmli müqavimət səviyyəsi isə 1.3444$-dır.

Xəbərdən istifadə edərkən istinad etmək vacibdir.