Yanacağın pərakəndə satış qiymətlərinin artmasından sonra yanacaqdoldurma məntəqələrində satılan məhsulun keyfiyyəti ilə əlaqədar yoxlamalar aparılır. APA TV-nin xəbərinə görə, bunu Standartlaşdırma, Metrologiya və Patent üzrə Dövlət Komitəsinin sədri Ramiz Həsənov bildirib: "Hər gün yoxlamalar aparılır. Bu gün mən şəxsi göstəriş vermişəm ki, yanacaqdoldurma məntəqlərində hamısında keyfiyyətlə əlaqədar yoxlamalar aparılsın".

Komitə sədri deyib ki, öncədən bildirilmədən məntəqələrə gedərək nümunələr götürüləcək: "Sumqayıt şəhərində müasir tələblərə cavab verən laboratoriya fəaliyyət göstərir. Götürülən nümunələr burada yoxlanılacaq. Bu günə qədər belə bir problem olmayıb".

Ramiz Həsənov bildirib ki, Azərbaycanda orta məktəblərin bufetlərində isti yeməklərin verilməsi üçün tətbiq olunan standartlarla bağlı monitorinqlər aparılır. Monitorinqlər nəticəsində bir çox yerdə çatışmazlıqlar aşkarlanıb. Komitə sədri deyib ki, gələn ilin yanvar ayından belə bir problemlər olmayacaq.