Ruslan Sabirli: "Bir sumqayıtlı olaraq fəxrlə deyə bilərəm ki, Azərbaycandan olan ilk insanam ki, həm "Odnoklassniki”, həm də "Facebook” sosial şəbəkələrindəki səhifələrimə "Rəsmi Səhifə” statusu verilib”

 Budəfəki müsahibəmiz artıq kifayət qədər tanınan sumqayıtlı kinoaktyor, "CNC Film School”un rəhbəri Ruslan Sabirli ilədir. Bir çox seriallardan ve reklam çarxlarından yaxşı tanıdığımız bu istedadlı aktyor xüsusilə gənc qızların sevimlisidir. Ruslan bəylə rol aldığı filmlərdən, yaratdığı obrazlardan, yaradıcılıq yeniliklərindən, gələcək plan və məqsədlərindən danışdıq. Gənc aktyor hətta gileylərini də bizimlə bölüşdü: bir sumqayıtlı kimi bəzi məqamlarda ona olan diqqətsizliklərdən də söz açdı. Əlqərəz, onunla müsahibəmizi olduğu kimi diqqətinizə çatdırırıq.

- Ruslan bəy, xoş gördük sizi. Artıq Azərbaycanda sevilən, tanınan aktyorsunuz. Belə çətin və şərəfli peşəyə necə gəldiniz?
- Xoş gününüz olsun, Zeynəb xanım. Bu fikri sizdən eşitmək xoşdur. Ümumiyyətlə, hər hansı bir peşənin xüsusi qələmə verilməsinin əleyhinəyəm. Hər bir peşə çətindir. Asan nə var ki?! Bir peşəyə sahiblənmək istəyirsənsə, çətinliklərinə də qatlanacaqsan, öz üzərində çalışacaqsan və onun sirlərinə yiyələnəcəksən! Kinoya gəlməyimi yəqin ki, uşaqlıq illərimin arzusu adlandırmaq olar. Hələ orta məktəbdə oxuyarkən incəsənətlə maraqlanırdım. Orta musiqi təhsilliyəm. 11-ci sinifdə oxuyarkən hələ "Çiçəklərin rəqsi” adlı musiqi kompozisiyamı bəstələmişdim və məktəb tədbirlərində ifa edirdim. Məktəb tədbirlərində həm də illüzionist kimi səhnədə çıxış edirdim. Və elə o vaxtdan daxilən yaradıcı insan olduğumu anlamışdım, əslində. Daha sonra isə məktəb səhnəsini universitet səhnəsi əvəz etdi. Daha sonra isə bəzi Sumqayıt şəhər tədbirlərinə də dəvət alırdım. Universitetin aspiranturasını bitirdikdən sonra dövlət qulluğunda çalışmaq təklifi valideynlərimin arzusu ilə üst-üstə düşdüyü üçün mən də razılaşdım. Lakin bütün bunlarla yanaşı, kinoya çəkilmək həvəsi reallaşmamış qalırdı və bir gün bu həvəs məni üstələdi. İlk dəfə kinoefirə mənim əziz dostum, xətrini dünyalar qədər istədiyim gözəl aktrisamız, xalq artisti Sənubər xanım İsgəndərlinin dəvəti ilə "Qayınana” serialında qonaq aktyor qismində dəvət aldım. Və elə ilk dubldan Sənubər xanımın dedikləri sözlər mənə daha sonrakı fəaliyyətimə stimul verdi: "Ruslan, əla! Mən səndən belə gözləmirdim! Sən bu bacarığınla əsl kinoaktyor olacaqsan!” Beləcə mənim kino karyeram başladı.

- Olubmu ki, çəkildiyiniz seriala baxanda, "... kaş ki, başqa cür oynayardım” - deyəsiniz?
- Mən, əslində, təbiətcə özünükritikəm və əlbəttə ki, bu xüsusiyyətimdən irəli gələrək həmişə oynadığım epizodlardan müəyyən narazıçılıqlarım olur. Hətta birlikdə işlədiyim rejissorlar da təsdiq edə bilərlər ki, dubl çəkildikdən sonra bəyənmədiyim bir şeylər olursa, onu həmən rejissora bildirir və yeni dubl çəkməsini rica edirəm.

- Yaratdığınız obrazlar içərisində hansı xüsusilə fərqlənir?
- Pərəstişkarlarımın sözünə əsaslansam, rollarımın hamısı fərqlənir və sevilir. Amma son işim olan "Sənə inanıram” serialındakı Həmid obrazı daha çox dillərdə qalıb.

- Çəkildiyiniz "Sənə inanıram" serialındakı Həmidin başına gələnləri siz yaşasaydınız, necə hərəkət edərdiniz? Həmid kimi, yoxsa..?
- Əslində, yaratdığım hər bir obraz mənim bir parçamdır. Lakin bununla yanaşı, hər bir rolun özünəməxsus özəllikləri də olur, təbii ki. Bu anlamda Həmid Cavadovla Ruslan Sabirli arasında fərq vardır. Bəzi məqamlarda Həmid kimi hərəkət etməzdim.

- Murad, yoxsa Həmid? Hansı obraz sizə daha yaxındır?
- Əxlaqına, tərbiyəsinə görə Murad, prinsipiallığı və inadkarlığına görə isə Həmid.

- Müxtəlif obrazlar yaratmısınız. Bəs arzusunda olduğunuz rol hansıdır?
- Məmnuniyyətlə, Ceyms Bond tipli ekşn janrında olan bir qəhrəman, həmçinin vampir obrazını canlandırmaq istərdim.

- Çəkiliş zamanı rejissorla və yaxud da aktyorlarla aranızda konflikt yaşanıbmı?
- Bunu birlikdə işlədiyim rejissorlar deyə bilər yəqin. Konflikt deməzdim, amma bəzən müəyyən fikir ayrılıqları olur və bunları müzakirə etməklə həll edirik. Amma ümumiyyətlə isə çəkiliş prosesində ən sevmədiyim və məni əsəbiləşdirən şey zəif təşkilatlanmadır. Bu da özümün dəqiq insan və beynəlxalq sertifikatlaşdırılmış layihə rəhbəri olmağımdan irəli gəlir yəqin. Hər şeyin dəqiq və vaxtlı-vaxtında olmasından xoşum gəlir. Bu xüsusiyyətimə görə mənə yaxın tanışlarım perfeksionist deyirlər.

- Yaratdığınız hansı obraz sizə stimul verib?
- Yaratdığım hər bir obraz və ondan sonrakı tamaşaçı məhəbbəti mənə yaradıcılığımın növbəti addımlarına stimul verir.

- Müsahibələrinizin birində özünüzü rejissor kimi də sınamaq istədiyinizi söyləmisiniz. Sizi rejissor kimi nə vaxt görəcəyik?
- Bəli, artıq bilirsiniz ki, tez-tez aktyorluq və rejissorluq üzrə keçirilən kurslarda iştirak edirəm. Əslində, "Sənə inanıram” serialının qəhrəmanları Həmid və Əminənin yeni il təbriki çarxının ideya müəllifi və rejissoru özüməm. Yaxın gələcəkdə isə öz tamaşaçılarıma yeni bir film təqdim etməyi düşünürəm.

- Bəs əcnəbi rejissorlardan necə, təklif almısınız?
- Azərbaycanda türk rejissoru Naci Çelik Berksoyun "Həyat Varsa” serialının 3 seriyasında fərqli baş rollara təklif almışdım. Bundan əlavə, İngiltərə, Gürcüstan, Latviya və s. xarici rejissorlarla da iş birliyim olub. Yaxın günlərdə Almaniyaya işgüzar səfərim baş tutmuşdu. Səfərimin məqsədi Almaniya prodüserlərindən təklif almağım idi; hazırda bu istiqamətdə danışıqlar gedir. Yeri gəlmişkən, artıq oxucularımıza da məlum olduğu kimi yaxın günlərdə "Facebook” sosial şəbəkəsindəki səhifəmə də "Rəsmi Səhifə” statusu verildi ki, bu da Almaniya ilə aparılan danışıqların bir hissəsidir. Və bir sumqayıtlı olaraq fəxrlə deyə bilərəm ki, Azərbaycandan olan ilk insanam ki, həm "Odnoklassniki”, həm də "Facebook” sosial şəbəkələrindəki səhifələrimə "Rəsmi Səhifə” statusu verilib.

- Aktyorların əksəriyyəti həm də aparıcı kimi fəaliyyət göstərir. Siz necə, özünüzü aparıcı kimi sınamaq istəmirsiniz?
- Məncə, bu, məndə alınar. Tələbə vaxtı bütün universitet tədbirlərinin aparıcısı idim. Sadəcə, hələlik belə bir təklif almamışam. Əgər belə bir təklif gələrsə, dəyərləndirməyə hazıram.

- Çəkilişdən sonra yaratdığınız obrazın təsiri sizdə qalırmı?
- Xeyr, onlar elə çəkiliş meydançasında da qalır. Amma... Amma yaratdığım obrazlar qismən elə mənim özüm olduğu üçün onların hər biri mənim içimdədir.

- Sumqayıtda doğulmusunuz, hazırda isə Bakı şəhərində yaşayırsınız. Sumqayıtlı günləriniz üçün darıxırsınız?
- Bəli, Sumqayıt şəhərində doğulmuşam və böyümüşəm. Baxmayaraq ki, hal-hazırda tək Azərbaycanda deyil, işimlə bağlı hətta tez-tez Almaniyada və Gürcüstanda qalmalı oluram, Sumqayıt üçün hər zaman darıxıram. Sumqayıt mənim uşaqlıq və gənclik illərimin şəhəridir. Sumqayıt mənə nostalji çəkdirən şəhərdir. Onun küçələri, ağacları, dəniz kənarı mənə çox doğmadır. Amma Azərbaycanda olduğum müddətdə Sumqayıta tez-tez gəlirəm. Mənim orada dostlarım yaşayır. Fürsətdən istifadə edib mənim üçün önəmli olan bir məsələni vurğulamaq istərdim. Təəssüflər olsun ki, bu gün Sumqayıtın heç bir tədbirinə dəvət almıram. Çox istərdim ki, doğma şəhərim tək mən deyil, mənim kimi Sumqayıtda yetişib müxtəlif sahələrdə məşhurluq qazanan insanlara sahib çıxsın, bizləri bir arada toplasın. Biz həmişə Sumqayıtın adını ucaldırıq!

- Sumqayıt haqda düşüncələriniz, təəssüratlarınız maraqlıdır. Sizə görə, Sumqayıtı digər Azərbaycan şəhərlərindən fərqləndirən əsas xüsusiyyət nədir; həm ümumi, həm də mədəni mühit baxımından?
Mənim üçün Sumqayıt həmişə öz elm və təhsili ilə seçilən, məxsusi bir mədəniyyəti, ənənsi olan şəhər olub. Kiçik analogiya aparsaq, "sumqayıtlıyam”, - demək, "amerikalıyam”, - demək kimi bir şeydir. Yəni Sumqayıt sonradan salınmış bir şəhər olduğu üçün beynəlmiləl olub. Sənaye şəhəri olduğundan Azərbaycanın bütün bölgələrindən çıxan savadlı abituriyentlər paytaxt universitetinin məzunları olaraq Sumqayıta təyinat alıblar. Və xüsusilə də bu məzunlar sırasında texniki fənlər üzrə ixtisaslaşanlar çoxluq təşkil etdiyi üçün Sumqayıt əhalisi riyazi təfəkkürə malik insanlardan ibarət olub. Təbii ki, bu da sonrakı nəslin geninin formalaşmasında böyük rol oynayıb və bu gün öz təzahürünü ölkənin təhsil sahəsində göstərilən ən yüksək nəticələrin Sumqayıt şəhərinin adı ilə bağlı olmasında tapır. Bu gün bununla yalnız fəxr etmək olar. Sumqayıt vaxtilə bilikli, savadlı və təbii ki, mədəni insanların məskunlaşdığı bir şəhər olaraq formalaşdırılıb.

- Əsla! Mən hələ tələbəçilik illərində universitet səviyyəsində tanınırdım, şəhərin mədəni-kütləvi tədbirlərində iştirak edirdim və qismən də olsa, buna alışmışdım. Əksinə, tanınmış olmaq mənim həyatımın ayrlılmaz bir hissəsidir. Sevinirəm ki, insanların yaddaşında qala bilir və yaratdığım obrazlarla özümü onlara sevdirə bilirəm.

- Müsahibəyə görə çox sağ olun. Sizə işlərinizdə uğurlar arzulayırıq.
- Mən də sizə müsahibəyə görə və barəmdə olan yenilikləri saytınızda yaydığınıza görə öz minnətdarlığımı bildirir, auditoriyanızın daha da artmasını və işlərinizin uğurla müşayiət edilməsini arzulayıram.