Bu gün Sumqayıt şəhər N.Nərimanov adına mədəniyyət mərkəzində C.Cabbarlı adına mədəniyyət evinin rəsm dərnəyi üzvlərinin rəsm sərgisi və özfəaliyyət kollektivinin hesabat konserti keçirilib.
Sumqayıt şəhər Mədəniyyət və Turizm idarəsinin mətbuat xidmətindən Xeberle.com-a verilən məlumata görə konsertdə "Gənclik” instrumental ansamblının solistləri Pənah Məmmədov, Ravin Əliyev, Aqşin Mehmanoğlunun ifasında xalq və bəstəkar mahnıları, Azər Mikayılovun sazda ifası tamaşaçılar tərəfindən alqışlarla qarşılanıb. Eləcə də, "Azəri” meyxana qrupunun, "Turan” rəqs qrupunun, "QOİUNPS” estrada qrupunun çıxışları böyük maraq doğurub.
Qeyd edək ki, Sumqayıt şəhər Mədəniyyət və Turizm idarəsinin rəisi Mehman Şükürov tədbirə qatılaraq həm rəsm sərgisini, həm də özfıəaliyyət kollektivinin çıxışını yaxından izləyib. O çıxış edərək kollektivə maraqlı ifalarına görə razılığını və təşəkkürünü bildirib.
O, qeyd edib ki, şəhərdə keçiriləcək daha iri miqyaslı tədbirlərdə iştirak etmək üçün özfəaliyyət kollektivlərinin sıraları genişləndirilməlidir. Xüsusilə rəqs kollektivlərinin üzvlərinin sayının artırılmasının vacibliyini vurğulayan idarə rəisi kollektivə fəaliyyətində uğurlar arzulayaraq, hər bir istedadlı gəncə dəstək verəcəyini bildirib.