Sumqayıt şəhər Təhsil şöbəsində Təhsil Nazirliyinin həyata keçirdiyi "Təhsildə İnkişaf və İnnovasiyalar üzrə Qrant müsabiqə”də qalib olmuş "Oxu dostları” klubu layihəsinin təqdimatı keçirilib.
Təqdimatı Sumqayıt Şəhər Təhsil Şöbəsinin metodkabinetinin direktoru Gülbahar Haqverdiyeva açaraq son dövrlərdə təhsil sahəsində aparılan islahatlardan danışıb, bu ilin "Təhsildə keyfiyyət ili” olduğunu vurğulayıb.
Qalib layihənin məqsəd və və vəzifəsinin şagirdlərdə oxu bacarıqlarının inkişaf etdirilməsinin olduğunu bildirib.
G. Haqverdiyeva layihə rəhbəri Sumqayıt şəhəri İ.Qayıbov adına 1 №li tam orta məktəbin Azərbaycan dili və ədəbiyyat müəllimi Aidə Ələkbərovanın müəllimlik peşəsi ilə bərabər, eyni zamanda müxtəlif sahələrdə də fəaliyyət göstərdiyini qeyd edib. Onun həm təlimçi, həm ekspert, həm də mentor olaraq fəaliyyət göstərdiyini diqqətə çatdırıb.
Layihə rəhbəri Aidə Ələkbərova çıxışında qalib layihələrin müxtəlif mövzuda olmasından, bu layihələrin əsas məqsədinin şagirdlərdə bilik və bacarıq səviyyəsini inkişaf etdirmək olmağından danışıb.
Sonra layihənin məqsəd və vəzifələri haqqında ətraflı məlumat verərək qeyd edib:
""Oxu dostları” klubu” layihəsinin əsas məqsədi şagirdlərdə oxu bacarıqlarını təkmilləşdirərək bu sahədə mövcud problemlərin aradan qalxmasına təkan verməkdir. Bu klubda həm oxu, həm yazı, həm də təqdimat bacarıqlarını təkmilləşdirmək üçün fəaliyyət planı nəzərdə tuturuq. Şagirdlər həm kitablarla, həm də onlayn oxu mənbələri vasitəsilə mütaliə edərək bu bacarıqlara yiyələnəcəklər. Mütaliə aparmaqla yanaşı şagirdlərə oxu bacarıqları , debatın aparılması, oxu bacarıqlarının tətbiqi üçün nəzərdə tutulmuş yazı təlimlərinin keçirilməsi , oxuduqları əsərlərdən birinin səhnələşdirilməsi nəzərdə tutulur.Məşğələlər 3 və 8 – ci siniflərin hər biri ilə həftədə 1 dəfə 2 saat olmaqla keçiriləcək.
Layihənin icrası 3 ay müddətində nəzərdə tutulub.
Layihə artıq bir aydır ki, fəaliyyətə başlayıb. Şagirdlərlə psixoloq tərəfindən də diaqnostik test yoxlaması keçirilib. Layihə müddətində şagirdlərin inkişaf dinamikası təlimçi və layihə rəhbəri ilə bərabər psixoloq tərəfindən də izlənilərək monitorinq ediləcək.
Oxu bacarıqları üzrə təlimlər keçirilir, şagirdlər artıq Sumqayıt Şəhər Mərkəzi Uşaq Kitabanasına üzv yazılıb, oxumaq üçün bədii əsərlər seçiblər. Oxuduqları əsərlərin müzakirəsi təşkil edilərək, bu istiqamətdə debatların keçirilməsi nəzərdə tutulub. Növbəti həftələrdə isə şagirdlərə yazı və təqdimat bacarıqları üzrə məşğələlər keçiriləcək.
Yazı bacarıqlarının təkmilləşdirilməsi və seçilmiş əsərin ideya və məzmununu əks etdirən hekayənin yazılması nəzərdə tutulub. Düzgün, savadlı yazı bacarıqlarını formalaşdırmaq üçün uşaq şair yazıçısı Zahid Xəlillə görüş nəzərdə tutulub.
Görüşün Sumqayıt Şəhər Poeziya evində keçirilməsi planlaşdırılıb. "Ən yaxşı” hekayə müəlliflərini müəyyən etmək üçün ekspert olaraq Zahid Xəlil dəvət edilib. Ekspert tərəfindən ən yaxşı müəlliflər müəyyən ediləcək. Seçilmiş hekayələrin kitab şəklində nəşr edilməsi də məqsədlər sırasındadır.
Təqdimat bacarıqarını inkişaf etdirmək üçün şagirdlər rejissorla bərabər seçim əsasında müəyyən ediləcək əsəri səhnələşdirəcəklər.”
Layihənin oxu və yazı bacarıqları üzrə təlimçisi Gülgəz Abasquliyeva isə bu sahədə mövcud olan problemlərdən söz açıb.
Digər çıxış edənlər də layihənin əhəmiyyətindən bəhs edib və icraçılara uğurlar arzulayıblar.
Xəbərdən istifadə edərkən istinad etmək vacibdir.
