Sumqayıt Regional Mədəniyyət İdarəsi üzrə mətbuatla işin təkmilləşdirilməsi, sosial şəbəkələrin imkanlarından düzgün istifadə etməklə məlumatlandırma, maarifləndirmə və təbliğat işinin yenidən təşkil edilməsi məqsədilə İşçi qrupu yaradılıb. İşçi qrupun ilk iclası 25.01.2022-ci il tarixində Sumqayıt Regional Mədəniyyət İdarəsinin rəisi Rəşad Əliyevin rəhbərliyi ilə keçirilib.
İclası giriş sözü ilə açan İdarə rəisi Rəşad Əliyev müasir dövrdə sürətlə inkişaf edən texnologiyaların həyatımızın böyük bir hissəsinə sirayət etdiyini, hazırda planetimizin dörd bir tərəfindən müxtəlif insanların bir-biriləri ilə ünsiyyət qurduqları sosial şəbəkələrin populyarlığının artdığını və onların öz intibah dövrünü yaşadığını bildirib.
Sosial şəbəkələr üzərindən fəaliyyətini qurmuş çoxsaylı səhifələrin, yayım kanallarının dünyada baş verən hadisələri kiçik zaman kəsiyində milyonların, həm gənc, həm də yaşlı nəslin nümayəndələrinin müzakirə mövzusuna, düşüncə hədəfinə çevirə bildiyini qeyd edən idarə rəisi, bu kontentlərin dövlət səviyyəsində yüksək qayğı ilə əhatə olunan Azərbaycan mədəniyyətinin təbliğinə geniş imkanlar açdığını vurğulayıb.
İclasda mətbuat və sosial şəbəkələrlə işin hazırkı durumu geniş müzakirəyə çıxarılıb.
Daha sonra İşçi qrupun üzvlərinin fikirləri və təklifləri dinlənilib, qarşıda duran vəzifələrin həyata keçirilməsi üçün ictimai əsaslarla mətbuat qrupunun yaradılması qərara alınıb. İclas iştirakçılarına fəaliyyət istiqamətlərinin müəyyənləşdirilməsi və bu sahədə görülə biləcək işlər haqqında təkliflərin verilməsi həvalə olunub.
İclasda, həmçinin, İşçi qrupunun qarşısında duran vəzifələrin icrası ilə əlaqədar növbəti addımlar müəyyən olunub və həyata keçiriləcək mədəniyyət tədbirlərinin məzmununun və miqyasının artırılması, müəssisələrarası koordinasiyanın gücləndirilməsi və beynəlxalq əməkdaşlıq əlaqələrinin qurulması ilə bağlı müvafiq tapşırıqlar verilib.
Yekunda, hazırlanacaq ümumi təkliflərin müzakirəsi və müvafiq iş bölgüsünün aparılması məqsədilə növbəti iclasın keçirilməsi qərara alınıb.
Xəbərdən istifadə edərkən istinad etmək vacibdir.
