Yay aylarında insanlar kütləvi şəkildə dəniz və digər ümumi istirahət mərkəzlərinə üz tuturlar. Bu kimi məkanlarda nələrə diqqət edilməlidir? Mövsümlə əlaqədar ən çox hansı xəstəliklərə rast gəlinir?
Səhiyyə Nazirliyinin mütəxəssis-eksperti, infeksionist Təyyar Eyvazov Xeberle.com-a bildirib ki, yay aylarında əsasən müxtəlif səbəbli bakterial, virus mənşəli mədə-bağırsaq infeksiyalarına rast gəlinir:
"Daha çox bağırsaq çöplərinin və rotavirusların törətdiyi ümumi halsızlıq, hərarətin yüksəlməsi, ürəkbulanma və qusma, ishal, qarında sancı şəkilli ağrıların olması ilə özünü büruzə verən xəstəliklər yayılır. Bu xəstəliklər əsasən 5 yaşındadək uşaqlar üçün təhlükəlidir. Belə əlamətlər olarsa, dərhal həkimə müraciət edilməlidir”.
Müsahibimizin sözləringə görə, belə infeksiyalara tutulmamaq üçün yalnız icazə verilən çimərliklərdə istirahət etmək, qida qəbulundan öncə əlləri yumaq, meyvə-tərəvəz və s. ərzağı dəniz suyunda yumamaq, dənizdən çıxdıqdan sonra duş qəbul etmək, çimərkən dəniz suyunun ağıza dolmamasına çalışmaq, müxtəlif xəstəlik əlamətləri olan digər insanlarla birgə istirahət etməmək tövsiyə olunur:
"Nəm qumda göbələklər ola billdiyindən istirahət zamanı qum hissəciklərinin gözlərə və ağıza düşməməsinə çalışmaq lazımdır”.
Xəbərdən istifadə edərkən istinad etmək vacibdir.
