Sumqayıt Tibb Mərkəzi (STM) 2024-cü ildə şəhər əhalisinə göstərilən xidmətlərin statistikasını açıqlayıb.
Xeberle.com xəbər verir ki, Mərkəzin tabeliyində olan tibb müəssisələrinə 2024-cü ildə əhali tərəfindən 1 milyon 488 min 991 müraciət qeydə alınıb. Xidmətlərə gəldikdə isə, əhaliyə 5 milyon 358 min 68 tibbi xidmət göstərilib.
2023-cü illə müqayisədə ötən il göstərilən xidmət sayı 18 faizə yaxın artıb. Belə ki, 2023-cü ildə xidmət sayı 4 milyon 532 min 985 təşkil edib.
Tabeli tibb müəssisələrində icra olunan əməliyyat saylarında da artım müşahidə olunub. Belə ki, ötən il 25 min 84 cərrahi əməliyyat və prosedur həyata keçirilib ki, bu da 2023-cü illə müqayisədə 8 faiz çoxdur. 2023-cü ildə cərrahi əməliyyat və prosedur sayı 23 min 192 təşkil edib.
Qeyd edək ki, tibb müəssisəsinə müraciət edən hər bir ölkə vətəndaşı icbari tibbi sığorta ilə Xidmətlər Zərfinə daxil olan tibbi xidmətlərdən ödənişsiz istifadə edə bilər.
Xəbərdən istifadə edərkən istinad etmək vacibdir.
