Bildiyimiz kimi, Nazirlər Kabineti "Yeni növ koronavirus (COVID-19) infeksiyası ilə mübarizə tədbirlərində iştirak edən tibb işçilərinin sosial müdafiəsinin gücləndirilməsi haqqında” Azərbaycan Respublikası Prezidentinin 2020-ci il 18 mart tarixli 1947 nömrəli Sərəncamının icrasını təmin etmək məqsədilə qərar qəbul edib. Bu qərara əsasən tibbi profilaktik tədbirləri həyata keçirən işçilərə, təcili tibbi yardım xidməti göstərən, həmçinin bioloji materialın müayinəsi ilə məşğul olan laboratoriya işçiləri, Məhkəmə Tibbi Ekspertiza və Patoloji Anatomiya Birliyinin və Azərbaycan Qida Təhlükəsizliyi İnstitutunun işçilərinə, pasiyentlərə stasionar tibbi xidmət göstərən bütün tibb işçilərinə qanunla nəzərdə tutulmuş qaydada 2020-ci il martın 1-dən iyunun 1-dək olan müddət üçün müvafiq məbləğ ödəniləcəyi barədə sizə məlumat vermişdik. Bu günə olan məlumatalara əsasən artıq şəhər və rayonlarda bu ödəmələr tibb işçilərinin hesablarına köçürülməsi başlanılıb.

 

Sumqayıt şəhər səhiyyə işçiləri bu ödəmələrin gecikməsindən narahatdır.

Mövcud problemlə əlaqədar olaraq İcbari Tibbi Sığorta Agentliyi ilə əlaqə saxladıq. Agentlikdən Xeberle.com-a bildirildi ki, mart ayı üzrə ödəmələrə artıq başlanılıb. "Ödəmələr yalnız xəstəxana tərəfindən bizə siyahı göndərildikdən sonra həyata keçirilir. Bakı şəhərində ötən həftənin beşinci gününə olan məlumata əsasən artıq 122 xəstəxanadan siyahı gəlmişdi və hamısına da ödəniş edildi. Əgər ödəniş gecikirsə, deməli xəstəxana tərəfindən bizə siyahı daxil olmayıb. Tibb müəssisəsi tərəindən bizə tibb işçilərinin siyahısı göndərilməlidir. Bu siyahı iki sənəd əsasında hazırlanır, biri prezidentin sərəncamı, digəri isə bu sərəncam əsasında Nazirlər Kabineti tərəfindən qəbul olunmuş qərar. Bunun əsasında tibb müəssisəsinin rəhbərliyi koronovirusla mübarizə tədbirlərində iştrak edən tibb işçilərinin sayını, neçə gün işlədiklərini, işlədikləri müddətin maaşlarını hesablayıb göndərir və bunun əsasında da biz ödəmə edirik. Ötən həftə 122 dövlət müəssisəsi, 5 digər rayon və kəndlərdə yerləşən tibb müəssisəsindəki işçilərə, ümumilikdə isə artıq 7698 nəfərə ödəmə edilib. Bunlardan 2489 nəfəri həkim, 4478 nəfəri orta tibb işçisi, qalanı isə digər sahələrdə çalışanlardır. Siyahı hər gün artır. Mart ayı üzrə ödəmə hələ bitməyib, çünki bizə hesabatlar təqdim olunmayıb. Əgər tibb müəssisələri siyahını göndərməsə, hansı əməkdaşın nə qədər iş günü olduğunu bilə bilmərik”, - deyə İcbari Tibbi Sığorta Agentliyindən münasibət bildirildi.

Məlumat üçün qeyd edək ki, bugünlərdə Sumqayıt şəhər Səhiyyə Şöbəsindən Xeberle.com-a bununla bağlı hesablamalar aparıldığı barədə məlumat verilmiş, məlumatda bildirilmişdir ki, hazırda səhiyyə şöbəsinin mühasibatlığında əmrə əsasən müvafiq sənədləşmə işləri aparılır, say tərkibi müəyyənləşdirilir deyə proses nisbətən uzanır. Sənədləşmə işləri bitdikdən sonra əmrə əsasən ödəmələr veriləcək və bu barədə işçilər məlumatlandırılmışdır.

Ümid edirik ki, Sumqayıt şəhər Səhiyyə şöbsəsinin mühasibatlığında aparılan hesablamalar tez bir vaxtda yekunlaşar və tibb işçilərinin ödəmələri həyata keçirilər.

Xədicə Səxavətqızı

Xəbərdən istifadə edərkən istinad etmək vacibdir.