Son vaxtlar cəmiyyətdə xüsusilə gənclər arasında enerjili içkilərə meyllənmə halları artıb. Artıq bir çox insanlar bu içkilərdən asılı vəziyyətə düşməklə yanaşı, sözügedən mayeləri qəbul etmədən sanki işlə və ya digər fəaliyyət növləri ilə məşğul ola bilməyəcəklərini düşünürlər. Digər tərəfdən enerji içkilərinin insan orqanizmini təsiri və insanı özündən asılı vəziyyətə salması da insan həyatını məhv edən amillərdəndir. Sözügedən içkilərin insan orqanizminə, psixologiyasına təsiri ilə bağlı açıqlama verən müstəqil ekspert, tibb elmləri doktoru, professor Adil Qeybulla diqqət çəkən məqamlara toxundu. 

Ekspert bildirdi ki, energetik içkilərin tərkibində kofeinlə yanaşı, bir neçə maddələr var. 

Sözügedən içkilərin çox mürəkkəb resept üzrə hazırlandığını söyləyən Adil bəy, "həmin içkilərin əksəriyyəti tonuslandırıcıdır. Bu cür içkilərin uzunmüddətli qəbul edilməsi məqsədə uyğun deyil”, - deyə bildirdi: 

"Əvvəla energetik içkilər insanın ürək döyünütülərinə çox ciddi təsir göstərir. Bunu içən şəxslərdə ürək xəstəlikləri yaranır. Ürək tezliyinin ritmi yüksək olan xəstələrdə isə içkilərin təsiri özünü daha çox göstərir.” 

Adil bəy onu da qeyd etdi ki, uzun müddətli tonuslandırıcı içkiləri qəbul edən şəxslərdə yorulmalar daha tez müşahidə edilir: "Ona görə də hesab edirəm ki, bu cür içkilərdən istifadə etmək elə də məqsədə uyğun deyil. Xüsusilə gənclər çox diqqətcil olmalıdırlar. Sözügedən içkilərin yüksək səviyyədə reklamı da insanlara təsir göstərir. Gənclər bəzi vaxtlar belə içkilərin fərqinə varmırlar.”  (interaztv.com)