Peşəkar boks üzrə sabiq dünya çempionu Nikolay Valuyev Bakı 2015-ə görə Qərb dövlətlərini tənqid edib.
Valuyev I Avropa Oyunlarının Açılış Mərasiminə Avropa ölkələrinin gəlməməsini dəyərləndirib. O bildirib ki, mərasimdə nə İngiltərənin, nə Fransa, nə də Almaniyanın yüksəkvəzifəli nümayəndələri iştirak etməyib:
"Niyə? Sadəcə Avropa Birliyində Azərbaycana qarşı bir çox suallar var, həmçinin Rusiyayla "yanlış" əməkdaşlıq da bu münasibətdə rol oynayır. Bu mövqe, Rusiyada futbol üzrə dünya çempionatına olan münasibətə oxşayır. Kim Qərbin qaydaları ilə oynamırsa, ona iqtisadi və siyasi təzyiq göstərirlər. İndi isə bu, idmana qədər gedib çatıb", - deyə sabiq çempion söyləyib.
Nikolay Valuyev bildirir ki, ikili standartın tətbiqi onu heyrətləndirir: "İndi Qərb insan hüquqların pozulmasına görə Azərbaycanı ittiham edir. Amma ittihamçıların bu səs-küyü 2,5 il əvvəl, nə vaxt ki, Bakı Avropa Oyunlarının keçirilməsi hüququnu qazananda niyə yox idi? Bu bahalı tədbiri keçirməyi başqa arzu edənlər faktiki olaraq yox idi. Bəs 2012-ci dekabrdan bu yana Azərbaycana qarşı münasibət niyə belə sürətlə dəyişdi? İnsan hüquqları haqqında məsələyə gəldikdə isə deyə bilərəm ki, London Olimpiadasına hazırlıq zamanı Britaniya qoşunları İraqa girmişdi. Ancaq o zaman heç kimi bu utandırmırdı. Ümumiyyətlə, bütün bu baş verənlər çox iyrəncdir", - deyə N.Valuyev əlavə edib. (anspress.com)
Xəbərdən istifadə edərkən istinad etmək vacibdir.
