Eldar Mahmudov milli təhlükəsizlik naziri təyin edildiyi 2004-cü ildə baş vermiş bir əhvalat uzun illər bu sistemdə işləmiş əməliyyatçıları çox təəccübləndirmişdi.
Əhvalat Mahmudovun təyinatının ilk günlərindən sonra əks-kəşfiyyat işçilərini səhər sıra düzülüşünə, yəni rusların deyimincə, "razvod”a çağırmaq istəyi ilə bağlı idi. Ona başa salıblar ki, bəs, əks-kəşfiyyat işçilərinin üçünün bir araya gəlməsi nizamnamə ilə mümkün deyil - işçi yalnız öz rəhbərini və tabeçiliyində olanları tanıya bilər. 


Eldar Mahmudov - keçmiş milli təhlükəsizlik naziri 

Əməliyyatçılar uzun müddət İqtisadi Cinayətkarlığa Qarşı Mübarizə İdarəsinin, yəni sovet təbirincə deyilsə, "OBXSS”in rəisi işləmiş bir adamın bu quruma təsadüf nəticəsində düşdüyünü düşünürdülər. MTN təmsilçilərinin həmin vaxt Eldar Mahmudova tövsiyyələri o qədər də təsirli olmadı və o, MTN-ni daha əvvəl işlədiyi Daxili İşlər Nazirliyinə (DİN) bənzətmək üçün əlindən gələni etdi. O gələndən sonra MTN işçiləri işə xüsusi formada gəlməyə başladılar. 

Bu, cəmiyyətdə, xüsusi ilə iş adamları arasında MTN xofunu artırdı. MTN əməkdaşlarının sahibkarlardan iri məbləğdə, bəzən milyonlarla dollarla ölçülən rüşvət tələb etməsi barədə söz-söhbətlər yayılmağa başladı. Azərbaycan Respublikası Baş Prokurorluğunun bu gün yaydığı bir məlumat söhbətlərin əsaslı olduğunu ortaya çıxarır. Baş Prokurorluğun məlumatında deyilir: "MTN-nin ayrı-ayrı vəzifəli şəxsləri tərəfindən vəzifə səlahiyyətlərindən sui-istifadə və yol verilmiş digər qanun pozuntuları faktları üzrə Baş Prokurorluqda Cinayət Məcəlləsinin müvafiq maddələri ilə cinayət işi başlanaraq istintaq-əməliyyat qrupu yaradılıb”. 

Prokurorluğun məlumatına görə, MTN-nin 7 vəzifəli şəxsi Cinayət Məcəlləsinin 308.2, 309.1 və 302.2-ci maddələri ilə təqsirləndirilən şəxs qismində həbs ediliblər. Həmin adamların adları açıqlanmasa da KİV-lər tutulan MTN əməkdaşlarının əksəriyyətinin general olduğu vurğulanır. Bu sırada milli təhlükəsizlik nazirinin birinci müavini, general-leytenant Hilal Əsədovun, MTN mərkəzi aparatının rəhbəri general Fərhad Vahabovun, həmçinin MTN-in Monitorinq Mərkəzinin əməkdaşları general-mayor Natəvan Mürvətovanın və general-mayor Teymur Quliyevin, general Akif Çovdarovun, habelə Antiterror Mərkəzinin rəis müavini İlqar Əliyevin adları hallanır. 


Ərəstun Oruclu - MTN-in keçmiş əməkdaşı, kapitan 

MTN-in keçmiş əməkdaşı, kapitan Ərəstun Oruclunun sözlərinə görə, həmin işçilərin əksəriyyəti MTN-ə Eldar Mahmudovun əvvəllər işlədiyi İqtisadi Cinayətkarlığa Qarşı Mübarizə İdarəsindən və ya Daxili İşləri Nazirliyinin (DİN) Narkotiklərlə Mübarizə Baş İdarəsindən gəliblər. "Eldar Mahmudov MTN-ə rəhbər gələndən sonra nazirliyi 100-ə yaxın peşəkar əməliyyatçı tərk etdi. Yerini polisdən gələnlər tutdular. Bundan sonra nazirliyin əməkdaşları MTN-ə heç bir dəxli olmayan fəaliyətlərlə - iqtisadi cinayətlərlə və narkotiklərin qanunsuz dövriyyəsi ilə məşğul oldular ki, bunun MTN-in fəaliyyətinə dəxli yoxdur”,- deyə Ərəstun Oruclu ANS PRESS-ə bildirib. 

Ərəstun Oruclu sözlərinə sübut kimi dövrü mətbuatda MTN tərəfindən mütəmadi yayılan açıqlamaları göstərir: "MTN tərəfindən yayılan açıqlamaların 70-75 faizi əsasən narkoitklərin qanunsuz dövriyyəsi ilə bağlıdır. Bu məsələlərin MTN-ə nə dəxli var? Bu cinayətlərlə mübarizə DİN-in işidir. Deyim ki, polis bu məsələdə MTN-dən daha peşəkar işləyirdi. Çünki polisdən MTN-ə əsasən qeyri-peşəkarlar keçirilib. Əslində, Eldar Mahmudovun MTN-ə təyinatı əvvəldən səhv idi. Heydər Əliyev heç vaxt onu bu vəzifəyə təyin etməzdi”. 

Keçmiş MTN təmsilçisinin sözləri mərhum prezident Heydər Əliyevin 1993-cü ildə keçirdiyi bir müşavirədə Eldar Mahmudovu sərt tənqid etməsini xatırladır. İqtisadi Cinayətkarlığa Qarşı Mübarizə İdarəsinin rəhbəri kimi çıxış edən Eldar Mahmudov korrupsiyaya qarşı görülən işlər əvəzinə rüşvətxorluğun psixologiyasından, onun kökünün kəsilməsi üçün hamının varlandırılmasının vacibliyindən danışmağa başlamışdı ki, bu, Heydər Əliyevi bərk əsəbləşdirmişdi, nağıl danışmaqdansa, görülən işləri sadalamağı tələb eləmişdi. 


Vilayət Eyvazov - daxili işlər nazirinin müavini 

İndi Eldar Mahmudovu kimin əvəz edəcəyi məsələsi gündəmə gəlir. Maraqlıdır ki, bu məsələdə versiya kimi adı hallanan məmurların əksəriyyəti DİN işçiləridir. Onların sırasında Bakının keçmiş polis rəisi, general Məhərrəm Əliyevin, daxili işlər nazirinin müavini, general Vilayət Eyvazovun da adı hallanır. Amma nazir kürsüsündə kimin oturacağını ən doğru bilən ölkə başçısıdır. Bəlkə də bu vəzifəyə indiyə kimi o qədər də populyar olmayan, adı həmişə gizli qalan bir əməliyyatçı gələcək. Yaşayarıq, görərik.(ans press)