Azərbaycan Respublikasının Mərkəzi Seçki Komissiyası noyabrın 1-nə təyin edilmiş parlament seçkilərinə MDB-dən 147 müşahidəçini, o cümlədən uzunmüddətli əsasda işləyən 12 müşahidəçini akkreditə edib. Bu məlumat AZƏRTAC-a MDB-dən olan müşahidəçilər missiyasının qərargahından verilib. Missiyanın tərkibinə Belarus, Qazaxıstan, Qırğızıstan, Moldova, Rusiya, Tacikistan, Türkmənistan, Özbəkistan, MDB-yə üzv dövlətlərin Parlamentlərarası Assambleyası, Belarus və Rusiya Parlament Yığıncağı İttifaqı, Müstəqil Dövlətlər Birliyi İcraiyyə Komitəsinin nümayəndələri daxildir. Missiyanın formalaşması artıq başa çatıb. Seçki kampaniyasının monitorinqi çərçivəsində MDB İcraiyyə Komitəsi sədrinin birinci müavini, icraçı katib Vladimir Qarkun Azərbaycan Respublikası Prezidenti Administrasiyasında, Nazirlər Kabinetində və Xarici İşlər Nazirliyində seçkiqabağı vəziyyəti müzakirə edib. Məlumatda bildirilir ki, görüşlərdə Azərbaycan tərəfi respublikada ədalətli və şəffaf seçkilərin keçirilməsi üçün lazımi şəraitin yaradıldığını təsdiq edib. V.Qarkun bildirib ki, missiyanın fəaliyyəti ölkənin qanunlarına riayət etməklə siyasi neytrallıq, seçki prosesinə qarışmama prinsipləri əsasında müstəqil və sərbəst həyata keçirilir. MDB-nin uzunmüddətli müşahidəçiləri dairə və məntəqə seçki komissiyalarının işi ilə tanışlığı davam etdirirlər. Onlar Sumqayıt şəhərinin, Abşeron, Qəbələ, İsmayıllı rayonlarının dairə seçki komissiyalarında olublar. Qərargahın məlumatında vurğulanır: "Birlikdən olan müşahidəçilər onların işindəki açıqlığı və şəffaflığı qeyd edirlər. Komissiyalar səsvermə prosesinin təşkili üçün ən uyğun binalarda yerləşdirilib, müasir rabitə vasitələri və təşkilati texnika ilə təchiz olunub, mühüm sorğu-metodik ədəbiyyat, normativ sənədlərlə təmin edilib”. Məlumatda, həmçinin diqqətə çatdırılır ki, yerli icra hakimiyyəti orqanları dairə seçki komissiyaları ilə razılaşdırma əsasında deputatlığa namizədlərin və onların vəkillərinin seçicilərlə görüşlərinin keçirilməsi yerlərini müəyyən edib. Şəhər və kəndlərdə deputatlığa namizədlərin təşviqat materiallarının yerləşdirildiyi məlumat stendləri hazırlanıb. Missiya qərargahı seçki kampaniyasının monitorinqi çərçivəsində seçki kampaniyasında pozuntular barədə şikayət və ərizələrə baxmaq səlahiyyəti olan respublika orqanları ilə birgə fəaliyyət göstərir. Bu məqsədlə Azərbaycan Respublikası Baş Prokurorluğunun, Daxili İşlər Nazirliyinin və Mərkəzi Seçki Komissiyasının rəhbərliyinə seçki prosesi iştirakçılarından daxil olan müraciətləri, onlara baxılması haqqında məlumat təqdim etmək xahişi ilə məktub göndərilib.