“Siyasilərin elmi fəaliyyəti” rubrikasından növbəti yazı Milli Məclisin vitse-spikeri Bahar Muradova haqdadır. 8-ci sinifdən sonra Yüngül Sənaye Texnikumunda təhsil almış B.Muradova sonralar iki ali məktəbi bitirib: 1990-cı ildə Azərbaycan Dövlət Universitetinin filologiya fakültəsini, 2000-ci ildə isə Azərbaycan Universitetinin hüquq fakültəsini. 

Aktiv siyasi həyata qoşulsa da, 2009-cu ildə o, Dövlət İdarəçilik Akademiyasında siyasi elmlər üzrə fəlsəfə doktoru elmi dərəcəsini alıb. Beynəlxalq münasibətlərin və qlobal inkişafın siyasi problemləri ixtisası üzrə dissertasiya müdafiə edir. Dissertasiyanın adı – “Ermənistan-Azərbaycan, Dağlıq Qarabağ münaqişəsinin nizama salınmasında ATƏT-in rolu”.

B.Muradovanın elmi rəhbəri tarix elmləri doktoru, professor Əli Həsənov, rəsmi opponentləri tarix elmləri doktoru, professor M.Qasımlı və siyasi elmlər namizədi H.Məmmədov olub.

Hazırda siyasi elmlər üzrə fəlsəfə doktoru olan Bahar Muradova Modern.az-a elmə olan maraq və sevgisini bu cür açıqlayıb:

“Universitetdə oxuduğum vaxtlarda Azərbaycan tarixi, fəlsəfə, ədəbiyyatşünaslıq elmi məni çox maraqlandırırdı. Bunların arasında seçim aparırdım. Fəlsəfədən dərs keçən müəllimlər təklif edirdilər ki, bu sahəni davam etdirim. Tarix, ədəbiyyatşünaslıqdan dərs keçən müəllimlər də elə idi. Bu gün də həmin müəllimlərimi minnətdarlıqla xatırlayıram. Çünki onlar tələbənin nəyə qadir olduğunu bilirdilər və mühüm tövsiyələr verirdilər. Tələbəlik illərim 80-ci illərin sonunda baş verən hadisələrə düşdüyündən Azərbaycan tarixinə xüsusi maraq var idi. Universitetin axşam fakültəsində oxumağıma baxmayaraq, hörmətli alimimiz Süleyman Əliyarova yaxınlaşdım. Dedim: “Azərbaycan tarixi ilə bağlı mövzular məni maraqlandırır. bununla bağlı hansı tövsiyələri verərsiniz?”. 
O da mənə bir neçə elmi məqalə işləmək üçün tapşırıq verdi. Lakin sonradan mövqeyim dəyişdi. Düşündüm ki, ədəbiyyatşünaslıq mənim üçün daha məqbuldur. Buna da həvəsi ədəbiyyat tarixindən dərs keçən müəllimlərim oyatdı. Onlar mənə tapşırıqlar verib deyirdilər ki, mütləq bu sahədə özünü sınamalısan. Qədim orta əsrlər ədəbiyyatı üzrə mütəxəssis Əliyar Səfərli kafedra müdiri idi. Onun tövsiyəsi ilə diplom işi götürdüm. Onu davam etdirmək üçün yenidən mövzunu təsdiq elətdirdim. Həmin mövzunu işləyib müəyyən hala qədər gətirdim. Lakin Qarabağ məsələsi gündəmə gələndən sonra Qarabağ məni daha çox maraqlandırmağa başladı. Siyasi fəaliyyətim elmi axtarışları bir az arxa plana atdı. 2000-ci illərin əvvəllərində “ATƏT-in Azərbaycan-Ermənistan  Dağlıq Qarabağ problemi həllində rolu ” mövzusunda dissertasiya götürüb işlədim və müdafiə etdim. Bu gün siyasi elmlər üzrə fəlsəfə doktoruyam”.