Qarabağ və türk dünyası ilə bağlı konfranslar keçirmək və 24-cü Beynəlxalq Şeir gecələrində iştirak etmək üçün Türkiyədə səfərdə olan millət vəkili Qənirə Paşayeva bu ölkənin ən qədim vilayətlərindən biri Elazığa gəlib.
Millət vəkili Elazığın bölgə valisi Çətin Oktay Kaldırım, bələdiyyə başqanı Mücahid Yanılmaz və türk millət vəkilləri ilə görüşüb.
Q.Paşayeva bir neçə il öncə Elazığ haqqında yazdığı böyük yazıda bu bölgəni "Türkiyədəki Azərbaycan” adlandırdığını qeyd edib:
"Çünki buranın ən böyük kəndlərindən biri bu gün Ermənistanın işğalı altında olan Dağlıq Qarabağımızın paytaxtı Xankəndinin adını daşıyır. Bu adamlar on illər öncə zülmdən qaçaraq gəlib bura sığınanlardır. Bundan başqa, Azərbaycanın böyük şairi və böyük faciələr yaşamış Almas İldırımın gəlib qoynuna sığındığı yerdir Elazığ. Məhz onun xahişini nəzərə alaraq böyük Mustafa Kamal Atatürk buradakı gölə Xəzər gölü adını verib. Burada Almas İldırım, Bəxtiyar Vahabzadənin adını daşıyan küçələr var. Azərbaycanın adı burada əbədiləşdirilib, Sara Xatun məscidi var. Bir sözlə, Elazığ Azərbaycana çox yaxındır”.
Millət vəkili bələdiyyə başqanına müraciət edərək Elazığın ən böyük parklarından birinə Qarabağ adının verilməsini, orada qoyulan abidədə Azərbaycanda şəhid olmuş elazığlı şəhidlərimiz, Çanaqqalada şəhid olmuş azərbaycanlılar və Qarabağ şəhidlərimiz haqqında məlumatların əks olunmasını təklif edib.
Q.Paşayevanın təklifləri alqışla qarşılanıb və bələdiyyə başqanı Mücahid Yanılmaz qısa zamanda həmin təkliflərin reallaşacağını bildirib.
Deputat həmçinin son günlər qardaş Türkiyədə terror aktları zamanı və ya terrorla mübarizədə həyatını itirən qardaş-bacılarımıza Allahdan rəhmət, ailələrinə səbr diləyib.(Axar.az)

Xəbərdən istifadə edərkən istinad etmək vacibdir.