Hələ 1969-cu ildə hakimiyyətə gəldiyi vaxtdan Heydər Əliyev azərbaycançılıq ideyasını prioritet vəzifə kimi qarşıya qoymuşdu. Onun bu yöndə atdığı addımlar bu gün də bəhrəsini verməkdədir. Dünya azərbaycanlılarının birləşdirməsi, onların qurultayını keçirməsi bu ideyanı ideoloji əsas səviyyəsinə qaldırıb.
Məlumdur ki, birlik, həmrəylik olmadan hədəfləri vurmaq mümkün deyil. 90-cı illərin əvvəlinə nəzər salsaq, görərik ki, xalq təsadüfən hakimiyyətə gələnlərin səriştəsiz, ambisiyalı olduğunu bilərək tam əmin olmuşdu ki, onlar heç vəchlə birliyə nail ola bilməzlər. Xalq belələri ilə gələcəyin mümkünsüzlüyünü görürdü. Ona görə də təkidlə tələb etdi ki, ulu öndər gəlib xilaskarlıq missiyasını yerinə yetirsin. Tezliklə bu, baş tutdu və Heydər Əliyevin rəhbərliyi ilə birliyimizi təmin etməklə məqsədimizə doğru inamla irəlilədik. Ölkədə xalq-iqtidar birliyi bərqərar oldu. Xalqın, millətin ümummilli liderə sevgisi hədsiz idi.
"Mənim üçün hər şeydən əziz mənim xalqımdır, mənim Vətənimdir, mənim torpağımdır", - söyləyən ulu öndər onu da bildirmişdir ki, mənim üçün xalqın mənə göstərdiyi etimada və etibardan yüksək mükafat yoxdur. Xalq-Heydər Əliyev birliyi, həmrəyliyi Azərbaycanın dünyaya sözünü daha qətiyyətlə deyə bilməsini şərtləndirən başlıca amil idi.
Elə 44 günlük Vətən müharibəsində tarixi Qələbəmizdə də xalq-Prezident birliyi əsas rol oynadı. ulu öndərin ideyalarının gözəl davamçısı olan cənab İlham Əliyevin müəllifliyi ilə Azərbaycanın "Dəmir yumruq" əməliyyatı dünyaya səs saldı. Ərazilərimiz işğaldan azad edildikdən sonra öz gücümüzə aparılan genişmiqyaslı quruculuq-bərpa işləri də hərtərəfli təqdirini tapdı. "Xarıbülbül" festivalı bərpa olundu və ilk konsertdə səhnə müxtəlif xalqların nümayəndələrinə öz istedadlarını nümayiş etdirmək imkanı verdi. Bu, həmçinin Azərbaycanın ərazi bütövlüyü uğrunda talış, ləzgi, avar, hətta rus əsilli vətəndaşlarımızın da canlarını "uf" demədən qurban vermələri bizim necə tolerant, multikultural bir toplum olduğumuzu göstərən fərəhli faktdır.
bütün bunların əsasında, kökündə məhz dünya şöhrətli siyasətçi, unudulmaz dahi şəxsiyyət Heydər Əlirza oğlu Əliyevin uzaqgörən və müdrik siyasət xətti dayanır.
Ulu öndərin bizləri tərk edərək əbədiyyətə qovuşmasından 18 il ötür. amma bir gün belə olmayıb ki, onun ideyaları bizi yönləndirməsin, yolumuza işıq saçmasın. Yüz il, iki yüz il sonra da belə olacağına tam əminik.
Hikmət XƏLİLOV,
YAP fəalı, Azərbaycan Silahlı Qüvvələrinin ehtiyatda olan zabiti, Masallı rayon sakini.
Xəbərdən istifadə edərkən istinad etmək vacibdir.
