"İnformasiya, informasiyalaşdırma və informasiyanın mühafizəsi haqqında” Qanunda dəyişikliklər qəbul edilib.
Xeberle.com xəbər verir ki, bununla bağlı Milli Məclisin bu gün keçirilən plenar iclasında layihə müzakirəyə çıxarılıb. Müzakirələrdə Dövlət Təhlükəsizliyi Xidmətinin rəis müavini İlqar Musayev də iştirak edib.
Dəyişikliklərə əsasən, Qanuna yeni fəsilin əlavə edilməsi təklif olunur. Bununla qanunvericiliyə "kritik informasiya infrastrukturu” anlayışı gətirilir.
Layihə haqqında məlumat verən İnsan hüquqları komitəsinin sədri Zahid Oruc qeyd edib ki, kritik informasiya infrastrukturunun kibertəhlükəsizliyinə prioritet məsələ kimi baxılmasının zərurətini nəzərə alaraq və Azərbaycan Respublikasında kritik informasiya infrastrukturunun və onun tərkibinə daxil olan informasiya sistemlərinin, informasiya-kommunikasiya şəbəkələrinin və avtomatlaşdırılmış idarəetmə sistemlərinin təhlükəsizliyinin gücləndirilməsi məqsədilə Azərbaycan Respublikası Prezidenti tərəfindən 17 aprel 2021-ci il tarixində "Kritik informasiya infrastrukturunun təhlükəsizliyinin təmin edilməsi sahəsində bəzi tədbirlər haqqında” Fərman imzalanıb.
Qeyd olunan qanun layihəsində kritik informasiya infrastrukturu, onun obyekti və subyekti, digər anlayışlar, kritik informasiya infrastrukturunun təhlükəsizliyinin təmin edilməsi sahəsində səlahiyyətli orqan, habelə kritik informasiya infrastrukturunun təhlükəsizliyinin təmin edilməsi qaydasının hüquqi əsasları müəyyən edilir.
Sənəd deputatların müzakirəsindən sonra səsə qoyularaq, qəbul olunub.
Xəbərdən istifadə edərkən istinad etmək vacibdir.
