Üzündəki təbəssüm, danışığındakı şirinlik ünsuyyətdə olduğu hər kəsdə xoş əhval-ruhiyyə, ona qarşı hörmət və məhəbbət yaradardı. Rəssamlıq qabiliyyəti olsa da, hərbiçi olmağa qərar verdi. İllərlə əsarətdə imdad diləyən Qarabağ torpaqlarını mənfur düşməndən azad etmək ən böyük arzusu, amalı oldu. Gənc əsgər məqsədinə doğru inamla addımlıadı və sonunda istəyinə çatdı. Qazalılan Zəfərdə onun da öz payı var. Bir atanın, bir ananın və bir bacının onunla bağlı tükənməz arzuları yarımçıq qalsa da, o, Şəhidliyi ilə sevdiklərini qürurlandırdi, başlarını uca etdi.
Cəmi 20 il ömür yaşasa da, bu ömrə nələri sığışdırmadı qeyrətli Vətən oğlu?! Ömür var mənasız, məntiqsiz, ömür var əsrlərə bərabər. O, öz az ömrü ilə şərəfli həyata imza atdı! O qəhrəmanı bu gün hər kəs tanıyır, xoş xatirələrlə yad edir. Onun adı Nurlan Abdalovdur!
------------------
ABDALOV NURLAN FAİQ oğlu
(Əsgər)
Qısa arayış: ABDALOV NURLAN FAİQ oğlu 12 iyun 2000-ci ildə Sumqayıt şəhərində dünyaya göz açıb. 2006-2017-ci illərdə Sumqayıt şəhər 14 saylı tam orta məktəbdə oxuyub. O, 2012-2015-ci illərdə Sumqayıt şəhər "Dostluq” Mədəniyyət Mərkəzində "Rəssamlıq” kursunu bitirib.
N.Abdalov orta məktəbi bitirdikdən sonra, hərbi xidmətə gedənəcən "bərbər” sənətini öyrənərək, saç ustası kimi fəaliyyət göstərib. 2018-ci ildə, Sumqayıt Şəhər Hərbi Komissarlığının xətti ilə, Sumqayıt şəhər "Sürüclük məktəbi”ni bitirib. Elə həmin il Sumqayıt Şəhər Hərbi Komissarlığı tərəfindən həqiqi hərbi xidmətə çağrılıb.
Uşaq yaşlarından Vətən eşqi, Torpaq sevgisi ilə böyüyən Nurlan Abdalov, Vətən qarşısındakı borcunu yerinə yetirmək üçün, 04.07.2018-ci il tarixdə Ağcabədi rayonunda yerləşən "N” saylı hərbi hissədə xidmətə başlayıb, "Andiçmə” mərasimindən sonra Beyləqan rayonundakı "N” saylı hərbi hissədə xidmətinə davam edib. Burada ixtisas dərəcələrinə bölgüdən sonra, "Baş sürücü” vəzifəsinə təyin olunub. Daha sonra Füzuli rayonunun Haramı düzündə yerləşən "N” saylı hərbi hissədə xidmətinə davam edib.
Xidməti dövründə təlim-tərbiyəsi, nizam-intizamı, bacarıq və qabiliyyəti, verilən tapşırıqları doğru-düzgün yerinə yetirməsi, döyüş hazırlığı ilə seçilən Nurlan Abdalov, az bir zamanda komandanlığın və əsgər yoldaşlarının hörmət və rəğbətini qazanır. Bu müddətdə hərbi hissənin komandanlığı tərəfindən ailəsinə iki dəfə "Təşəkkür məktubu” göndərilir. Oğulları ilə qürur duyan valideynlərin sevincinin həddi-hüdudu olmur.
N.Abdalov 10 yanvar 2020-ci il tarixdə həqiqi hərbi xidmətini ləyaqətlə başa vurub ailəsinin yanına qayıdır.
Vətənə, hərbiyə və hərbi formaya olan xüsusi sevgisi N.Abdalovda hərbiçi olmaq istəyini yaradır. Arzusunu reallaşdırmaq üçün, gənc oğlan Müdafiə Nazirliyinə müraciət edir. Rəsmi dairədən razılıq alan gün o, həyatının ən xoşbəxt anlarını yaşayır.
Beləcə, arzusuna qovuşan gənc əsgər müddətdən artıq həbi qulluqçu kimi, 17 iyun 2020-ci il tarixdə Sumqayıt şəhər H.Z.Tağıyev qəsəbəsində yerləşən "N” saylı hərbi hissədə təlimlərə başlayır, bacarığına və xarakterinə görə, "Baş çavuş” kimi, "Manqa komandiri” vəzifəsini icra edir.
Ailə:Əslən Quba rayonundan olan Abdalovlar ailəsinin oğul övladı olanNurlan Sumqayıt şəhərində 6 nəfərlik sadə, zəhmətkeş bir ailədə böyüyüb boya-başa çatmışdı. Ata özəl şirkətlərin birində, ana Səminə xanım səhiyyə sistemində çalışaraq, halal zəhmətləri ilə övladlarını namuslu, vicdanlı, ləyaqətli, vətənpərvər, Vətənə layiq övladlar kimi böyütməyə çalışıblar. Nənə-baba əhatəsində olan Nurlan, onları böyük məhbbətlə sevərdi. Baba-nənə də bu ağıllı, gülərüz, mehriban uşağı hər zaman əzizləyər, onunla ünsiyyətdən doymazdılar. 2011-ci ildə babasının dünyasını dəyişməsi Nurlanı çox üzür və o, nənəsinə sığınaraq, onun sağlam və uzunömürlü olmasını arzulayır.
Abdalovlar ailəsinin öz adət-ənənələri olub. Qarşılıqlı hörmət və ehtiram, böyük-kiçik yeri bilmək, yalan danışmamaq, nizam-intizama, səliqə-sahmana riayət etmək... – ailənin hər bir üzvünün daşıdığı keyfiyyətlər idi. Valideynlər səhər işə gedər, axşamlar isə ailə qayğıları ilə yaşayardılar. Nurlanın "naz”ını çəkən, qulluğunda duran sevimli bacısı Nuranə və nənəsi Məsmə xanım olardı. Nurlan bacısı ilə dost, sirdaş idi. Onların söz-söhbətləri birlikdə olardı...
------
Hələ uşaqlıqdan Vətənə məhəbbət hissi ilə böyüyən Nurlan qəlbindəki istəyi bir xeyli vaxt heç kimə açıb demirdi. O, tarixi və döyüş filmlərini maraqla izləyər, bəzən özünü qəhrəmanların yerində hiss edərdi. Filmin sonunda isə qalib qəhrəman özünü sanardı. Məktəb yoldaşları da Nurlanın həddən artıq vətənpərvər olduğunu bilirdilər. Hətta məktəbdə oxuyanda belə bir hadisə də baş vermşdi: 2016-cı ilin aprel döyüşləri zamanı məktəbin məzunu şəhid olmuşdu. Dərs zamanı müəllim və şagirdlər şəhidlərdən, şəhidlik zirvəsindən danışırdı. Bu vaxt sinif uşaqlarından biri; "Nurlan, sən də şəhid olacaqsan?”deyə soruşur. Nurlan bir söz demədən həmin oğlana baxır. Nurlanın cavabı onun baxışlarından oxunur. Bu baxışlarda Vətən yolunda canını fəda etməyə hazır olan bir yeniyetmənin qüruru, cəsarəti, mərdliyi, qorxmazlığı, igidliyi əksini tapmışdı. O baxış bu gün də Nurlanın sinif yoldaşlarının gözləri önündən getmir...
Nurlan təbiətcə sakit, yeri gələndə şən, yeri gələndə ciddi, mehriban, qayğıkeş, diqqətcil, deyib-gülən, pozitiv enerjili, hər bir hərəkəti, danışığı yerli-yerində olan, şirindilli insan idi. Məktəbdə oxudu illərdə məktəbin ictimai həyatında, tədbirlərdə aktiv iştirak edər, gözəl danışığı ilə diqqəti özünə çəkər, hər bir işində məsuliyyətli və qoçaq olardı.
Ailəcanlı, qohumcanlı olan Nurlan ailə üzvlərinə, yaxın qohumlara, dostlara qarşı diqqətli, ürəyiyanan, mərhəmətli olardı. O, humanist, doğrucul olaraq, hər cür pislikdən, kin-küdurətdən uzaq idi. Nurlu siması ilə könülləri oxşayar, şən zarafatları ilə insanda yüksək əhval-ruhiyyə yaradardı.
Nurlan təbiət vurğunu idi. Dənizi seyr etməyi, yaşıllıqlar qoynunda gəzməyi sevərdi. Asudə vaxtlarında Sumqayıt şəhərini, eləcə də ölkənin digər şəhərlərini gəzməyi, əyləncəyə, kitaba, mədəniyyətə, incəsənətə, həmçinin öz istirahətinə vaxt ayırmağı bacarmışdı. Ev heyvanlarına, quşlara maraq göstərərdi.
Nurlan da, dəblə ayaqlaşan gənclər kimi, öz geyiminə, saç düzümünə diqqət göstərərdi. Elə bu maraqdan irəli gələrək o, bir müddət saç stilisti kimi çalışır.
Müxtəlif maraqlı əl işləri olan Nurlan rəssamlığa xüsusi həvəs göstərərdi. Və bu səbəbdən peşəkar rəssamlıqla məşğul olmağa başlayır. Məktəbin sərgi lövhələri və tədbirlərin dekorasiyaları Nurlanın əl işləri ilə bəzənərdi. (Bu gün də gənc rəssamın çəkdiyi rəsm əsərləri ailəsində xatirə olaraq saxlanılır).
Rənglər dünyasının qəhrəmanı özünə də silinməz bir tablo yaradır...
Öz bacarıq, qabiliyyət və istedadına görə seçilən, Azərbaycan gəncliyinin patlaq nümunəsi olan Nurlan Abdalov həyatını sağlam, dolğun və düzgün yaşamaqla, dəyərləndirməyi, mənalı etməyi bacarmışdı. Həyat eşqli gəncin hər cür şərati, müxtəlif sahələr üzrə savad və bacarığı olmasına baxmayaraq, o, hərb yolunu seçməyə qərar verir. Və bu yolda ölümə belə getməyə hazır olur!
27 Sentyabr 2020-ci il tarixdə Ali Baş Komandanın əmri ilə, Vətənimizin igid oğulları "Bütöv Azərbaycan” deyib ay ağa qalxır, rəşadətli Ordumuz düşmənə qarşı əks-hücum əməliyyatına başlayır. 44 günlük Vətən mü ha ri bəsi 30 illik həsrətə son qoyur, şanlı tariximiz yenidən yazılır.
Azərbaycan Ordusunun məğrur, qorx maz döyüşçüsü Nurlan Abdalov da minlərlə cəsur, igid Vətən oğulları kimi, bu döyüşlərdə düşmənə qarşı mərd liklə savaşır. O, Azərbaycanın azadlığı və bütövlüyü uğrunda gözünü qırpmadan belə, canından keçməyə hazır olur və 37 gün ərzində Füzuli, Cəbraıl, Hadrut, Zəngilan, Xocavənd uğrunda gedən döyüşlərdə iştirak edir.
Nurlanın ilk döyüş yolu Füzuli rayonunun azad olunmasından başlanır. Döyüş meydanında düşmənə göz açmağa belə, imkan verməyən, düşmənə qarşı amansız olan igidimiz, hər zəfər qazananda sevincini gizlədə bimir, ailəsinə zəng edərək şad xəbəri çatdırmağa çalışır.
Noyabrın 3-ü 2020-ci ildə Xocavənd rayonunun azad olunması uğrunda gedən qızğın döyüşlərdə 20 yaşlı gənc əsgər Nurlan Abdalov da iştirak edir. O, düşmənə qarşı mərdliklə mübarizə aparır, yaralı yoldaşlarına yardım edirdi. Döyüşün qızğın yerində qolundan xəsarət alan cəsur döyüşçü, hərbi anda sadiq qalaraq, bir addım da geri çəkilmir və son nəfəsinəcən döyüşə davam edir. Əsgərlər manqa komandirinə "geri dur”desələr də, o, inadından dönməyərək "mən sonacan vuruşacam!”söyləyir və son damla qanınacan sonacan savaşır. Düşmənə qarşı mübarizədə qəhrəmancasına həlak olan mətin döyüşçü elə savaş meydanında gözlərini əbədi yumaraq ən uca məqama – Şəhidlik Zirvəsinə yüksəlir.
Vətən üçün doğuldu, Vətən uğrunda döyüşdü, Vətən naminə də Şəhidlik şərbətini içdi vətənpərvər igidimiz. Azərbaycanın Zəfər taixinə adını Qızıl hərflərlə yazaraq, adını könüllərə həkk etdi ŞƏHİDİMİZ!!!
Hər zaman hara və niyə getdiyini dəqiq bilən qəhrəman oğul hər zaman deyərdi: "Şəhidlik elə bil zirvədir ki, hər adama qismət olmur və onsuz da onun yeri Cənnətdi”.
Manqa komandiri olan Baş çavuş Nurlan Abdalovun ən böyük arzularından biri gizir olmaq idi. Bunun üçün o, qardaşTürkiyə dövlətində "Gizirlik kursu”nda oxumaq istəyirdi. Ananın isə ən böyük arzusu oğlunu evləndirmək, oğul toyunu görmək, "Vağzalı” havasının sədaları altında evinə gəlin gətirmək idi...Bu arzular kerçəkləşməsə də, Vətən sevdalı oğul Allah tərəfindən seçilərək layiq olduğu ŞƏHİDadıyla valideynlərini ən hörmətli insanlar edir. Bu gün Abdalovlar ailəsinin hər bir üzvü kimi, bütün Azərbaycan Nurlanla fəxr edir, qürur duyur!
Azərbaycan Ordusunun cəsur əsgəri Nurlan Abdalov 5 noyabr 2020-ci il tarixdə Sumqayıt Şəhidlər Xiyabanında dəfn olunur.
Azərbaycan Silahlı Qüvvələrinin 20 yaşlı cəsur, məğrur əsgəri, manqa komandiri Nurlan Faiq oğlu Abdalov ölümündən sonra, Azərbaycan Respublikasının prezidenti İlham Əliyevin müvafiq Sərəncamlarına əsasən, "Vətən uğrunda” və "Xocavəndin azad olunmasına görə”, "Füzulinin azad olunmasına görə”, "Laçının azad olunmasına görə” medallarıilə təltif olunub.
Ruhun şad olsun, Cənnətməkan Şəhidimiz!
Aygün Hacıyeva,
AJB, AYB, AAB-nin üzvü
Xəbərdən istifadə edərkən istinad etmək vacibdir.
