---------------------

AĞAYEV DAŞQIN ƏLİQULU oğlu

(Kiçik çavuş)

DAŞQIN ƏLİQULU oğluAĞAYEV21noyabr1987-ci ildə Sumqayıt şəhərində anadan olub. 1994-2005-ci illərdə orta təhsilini Sumqayıt şəhəri 29 saylı tam orta məktəbdə alıb. 2006-cı inin yanvar ayında Sumqayıt Şəhər Hərbi Komissarlığından həqiqi hərbi xidmətə çağrılaraq Tovuz rayonunda terləşən "N” saylı hərbi hissəyə göndərilib. Burada o, manqa komandiri vəzifəsini icra edib. Yüksək insani keyfiyyətlərinə, ciddi xarakterinə, bacarıq və qabiliyyətinə görə, az zamanda komandanlığın və əsgər yoldaşlarının rəğbətini qazanıb.

Daşqın Ağayev 2007-ci ilin iyul ayında xidmətini uğurla başa vurub. Boş-bekar qalmayaraq, ailəyə dəstək olmaq üçün, özəl tikinti şirkətlərindən birində mühafizə kimi əmək fəaliyyətinə başlayıb. 2008-ci ilin noyabr ayınadək burada çalışan gənc oğlan, gözəl xasiyyəti, xoş rəftarı, ciddiliyi ilə kollektivin hörmətini qazanıb.

Uşaqlıqdan hərbiçi sənətinə marağı olan Daşqın, hələ orta məktəbdə oxuduğu zamanlarda "Çağırışaqədərki” hazırlıq fənninə maraq göstərib, təlimlərdə həvəslə iştirak edib. Tarixi, döyüş və detektiv filmlərini maraqla izləyib. Həqiqi hərbi xidmətdə olduğu illərdə hərbə marağı daha da artdığından nəhayət, bu yolu tutmağı, arzusuna çatmağı qarşısına məqsəd qoyur.

D.Ağayev arzusuna doğru addım ataraq Müdafiə Nazirliyinə müraciət edir. Müraciətinə müsbət cavab alan gəncin sevincinin həddi-hüdudu olmur.

Azərbaycan Silahlı Qüvvələrinin kiçik çavuşu D.Ağayev 20.10.2008-ci il tarixdən 10.01.2009-cu il tarixə kimi ASQ-nin "Təlim və Tədris Mərkəzi”ndə MAHHXHQ-nin hazırlığı kursunda "Motoatıcı manqa komandiri” ixtisası üzrə təhsil alır, kursu bitirdikdən sonra Sertifikata sahibi olur.

D.Ağayev 2009-cu ildə müddətdən artıq həqiqi hərbi xidmət qulluqçusu olaraq, Qusar rayonunda yerləşən "N” saylı hərbi hissədə xidməti fəaliyyətinə başlayır.

Azərbaycan Ordusunun kiçik çavuşu Daşqın Ağayev 2018-ci ildə ""31 Dekabr – Dünya Azərbaycanlılarının Həmrəylik günü” və "Yeni il” bayramı münasibəti ilə döyüş və ictimai-siyasi hazırlığında, xidməti vəzifələrinin yerinə yetirilməsində əldə etdiyi nailiyyətlərinə görə” komandanlıq tərəfindən Fəxri Fərmanla təltif olunur. D. Ağayev 2019-cu ildə, fəaliyyətinin 10 illiyində "Qüsursuz xidmətə görə” 3-cü dərəcəli medala layiq görülür.

Ailə:Yeddi nəfərdən ibarət olan Ağayevlər ailəsinin öz adət-ənənələri, ailə qanunları olub. Valideynlər üç bacı və iki qardaşdan ibarət olan beş övaldın təlim-tərbiyəsi ilə məşğul olaraq, onları Vətənə layiq, əxlaqlı, vicdanlı, doğrucul... böyütməyə çalışıblar və istəklərinə də çatıblar.

Qəhrəmanımız 2013-cü ildə könlünə hakim olan, sevib-seçdiyi Ayşən xanımla ailə həyatı qurur. Bu evlilikdən iki övlad dünyaya gəlir: Kamran və Səma.

Daşqın ailənin sonbeşiyi olub. Uşaq vaxtı çox dəcəl olsa da, onun bu dəcəlliyində də bir şirinlik olub. Xasiyyətcə zarafatcıl, şən, deyib-gülməyi sevən insan idi. Ailəsinə bağlı olan gənc, hər zaman onlara vaxt ayırmağa çalışıb, diqqət göstərib. Böyüklərə hörmət, kasıb və kimsəsizlərə əl tutmaq onun müsbət keyfiyyətlərindən idi. Heç vaxt kimsənin xətrinə dəyməz, barışdırıcı mövqedə durmaqla insanlara pozitiv, müsbət enerji ötürərdi.

Ailəcənlı, qayğıkeş, ailəsinə hörmət qoyan və dəyər verən Daşqın, işdən sonra boş vaxtlarını ailəsi ilə mənalı keçirməyə çalışardı. O, ailəsi ilə gəzintiyə çıxar, axşamlar isə bir yerdə film izləməyi sevərdi...

Vətən müharibəsi.2020-ci ilin iyulunda baş vermiş Tovuz hadisələri zamanı zabitlərin həlak olması Daşqını çox kədərləndirir. O, hərbiçi olmasına görə çox sevinir. Bilir ki, müharibə olarsa öndə gedən birincilərdən olacaq. "Torpaqdan pay olamz!” deyən Daşqın, qələbənin yalnız müharibə yolu ilə qazanılacağına inanırdı. Güclü Ordu və son model texnika ilə yalnız QƏLƏBƏyə imza atmaq olardı! Ən vacibi isə, insanlarda olan yüksək döyüş əhval-ruhiyyəsi, ruh yüksəkliyi idi. Hər kəs ön cəbhəyə can atırdı...

2020-ci ilin sentyabrın 11-dən 25-cən D.Ağayev iki həftəlik məzuniyyətdə olur, sentyabrın 25-i isə xidmətinə qayıdır.

Sentyabrın 27-si 2020-ci ildə Ali Baş Komandan İlham Əliyevin əmri ilə düşmənə qarşı əks-hücum əməliyyatının - II Qarabağ savaşının başlanması Azərbaycan xalqının illərlə qəlbində aşıb-daşan intiqam hissini daha da alovlandırdı. Hər kəs böyük ruh yüksəkliyiy ilə cəbhəyə can atırdı. İllərin torpaq həsrətinə son qoyulacaq, Vətənin azadlığı və bütövlüyü yolunda canlarından keçən şəhidlərimizin qisası alınacaq, Xocalı qatillərinin cavabı veriləcəkdi. Hər bir azərbaycanlı QƏLƏBƏ əzmi ilə savaşa hazır olur.

Ürəyi Vətən sevgisi ilə çırpınan Daşqın Ağayev də düşmən tapdağı altında inləyən torpaqlarını düşməndən təmizləmək üçün silaha sarılır. Yaxın-doğmalar nə qədər əziz olsa da, Vətən darda olanda, xoşbəxt gələcəkdən söhbət gedə biməzdi!

Daşqın Ağayev xidmət etdiyi hərbi hissədən ilk öncə Ağcabədi rayonundakı hərbi hissəyə göndərilir. Oradan da Füzuli-Cəbrayıl istiqamətində gedən döyüşlərə qatılır. Füzuli istiqamətində qızğın döyüşlər gedir. Bir çox kənd və qəsəbələrin, yüksəkliklərin alınmasında igidimizin misilsiz şücaəti olur. Döyüşlərin birində kiçik çavuş və silahdaşları düşmənə qarşə ağır zərbələr endirərək 3 postu ələ keçirirlər. Qəhrəmanımız həmşəhərliləri ilə birlikdə sonuncu posta "Sumqayıt” adını qoyurlar.

Oktyabrın 20-si Daşqın ailəsinə zəng vurur, hər şeyin yaxşı olduğunu, düşmənin qaçaraq geriyə çəkildiyini bildirir, əsgər və zabitlərin igidliyini qeyd edir. Həyat yoldaşı Ayşən xanımla danışanda uşaqları üçün çox darıxdığını söyləyir, onlardan muğayat olmağı tapşırır. "İnşallah, tezliklə zəfər çalıb qayıdacağıq. Bir az da səbirli olun”söyləyərək sağollaşır.

2020-ci il sentyabrın 27-də Azərbaycan Silahlı Qüvvələri tərəfindən düşmən tapdağı altında olan ərazilərin azad olunması, Vətənimizin ərazi bütövlüyünün bərpa olunması başlanan II Qarabağ müharibəsində iştirak etmiş Daşqın Ağayev Füzuli, Cəbrayıl, Xocavənd rayonlarının işğalçılardan azad olunmasında şücaət göstərir. Oktyabrın 21-də Xocavənd rayonunun Düdükçü kəndi uğrunda gedən döyüşlərdə qəhrəmancasına həlak olan igidimiz Şəhidlik Zirvəsinə yüksəlir. Vətən oğlu elə sevdiyi Vətəni yolunda da canından, qanından keçməyə hazır oldu. Cəsur döyüşçü qanıyla adını doğma diyarın Şanlı Tarixinə Qızıl hərflərlə yazdı və Allah dərgahında ən ali zirvəyə ucaldı!

Uşaqlıqdan hərbiçi olmaq arzusu ilə yaşayan, arzusuna doğru gedərək istəyinə qovuşan, hərbi formasını sevən və qoruyan, formasına da layiq xidmət göstərən, Azərbaycanın qeyrətli, namuslu, vicdanlı oğlü, şir ürəkli qəhrəmanımız Daşqın Ağayev noyabrın 17-si 2020-ci ildə Sumqayıt Şəhidlər Xiyabanında dəfn olunur.

13 illik hərbi staja malik olan igidimiz təcrübəsi, peşəkarlığı ilə hər zaman seçilib. Bacardığı qədər bildiklərini gənc əsgərlərə öyrətməyə çalışan kiçik çavuş, bir ata, qardaş olaraq, onlara qarşı diqqətcil olub, qayğılarını çəkib, qorumağa çalışıb. Belə desək daha doğru olar, əsl böyüklük göstərib. Onun sadəliyi, səmimiliyi heç kəsin diqqətindən qaçmayıb. Bəlkə, elə bu səbəbdəndir ki, qəhrəmanımızı əsgərlər "dayı” deyə çağırırdılar. Bu ləqəb zabitlərin də dilinə düşmüşdü. "Dayı” döyüş meydanında neçə-neçə yoldaşını ölümdən xilas etmiş, yaralıları qan çanağından uzaqlaşdırmış, şəhid yoldaşlarının nəşinin düşmən əlinə keçməsindən xilas etmişdi. Bu "dayı” belə bir DAYI idi!!!

Bu gün igidimizin iki övladı Azərbaycan xalqına bir əmanətdir. Bu əmanəti qorumaq, palaq gələcəklərini təmin etmək isə bizlərin borcudur!

Azərbaycan Silahlı Qüvvələrinin 32 yaşlı cəsur döyüşçüsü, kiçik çavuş Daşqın Əliqulu oğlu Ağayev ölümündən sonra, "Vətən uğrunda”, "Füzulinin azad olunmasına görə”, "Cəbrayılın azad olunmasına görə” və"Xocavəndin azad olunmasına görə” medalları ilə təltif olunub.

Ruhun şad olsun, Cənnətməkan Şəhidimiz!!!

Aygün Hacıyeva,

AJB, AYB, AAB-nin üzvü