20.12.2023-cü il tarixdə, Sumqayıt şəhər H.Z.Tağıyev qəsəbəsində yerləşən 40 saylı tam orta məktəbin 5-ci sinfinə (direktor İlqar Həbibov, sinif rəhbəri Mətanət müəllimə), 2023-cü ilin sentyabr ayında antiterror əməliyyatı zamanı şəhid olmuş Baş leytenant Cavid Mirzəyevin adının verilməsi ilə bağlı, tədbir keçirildi.

Tədbirdə, məktəbin rəhbərliyi başda olmaqla, müəllim və şagird kollektivi, şəhidin valideynləri - Azər və Arzu Mirzəyevlər, Cavid Mirzəyevin sinif yoldaşları və digər qonaqlar iştirak etdilər.

Azərbaycanın himni ilə başlanan tədbirdə Şəhidlərin əziz xatirəsi bir dəqiqəlik sükutla yad edildi. Çıxış edənlər Cavid Mirzəyevi xoş xatirələrlə anaraq, onun həyat və döyüş yoluna nəzər saldılar. Şəhidimizin valideynləri göstərdiyi diqqətə, təşkilatçılığa görə, zəhməti keçən hər kəsə öz təşəkkürlərini bildirdilər, həmçinin gənc nəslə xoş arzularını söylədilər.

Məktəblilərin hazırladıqları müxtəlif kompozisiyalar, səsləndirdikləri vətənpərvərlik şeirləri tədbirə xüsusu rəng qatdı.

Qeyd edək ki, Cavid Azər oğlu Mirzəyev 14 noyabr 1994-cü ildə Siyəzən şəhəri, Gil-gil çay qəsəbəsində anadan olub. 2001-2006-cı illərdə Sumqayıt şəhər 40 saylı, 2006-2012-ci illərdə İ.Qayıbov adına 1 saylı tam orta məktəblərdə oxuyub. O, 5-ci sinifdə oxuduğu vaxtdan idmanın "Qaydasız döyüş” növü ilə məşğul olub.

C.Mirzəyev 2012-2016-cı illərdə Bakı Slavyan Universitetinin "Tərcüməçilik” (İngilis dili) fakültəsində təhsil alıb. O, 2016-2017-ci illərdə Sərhəd Qoşunlarının Yevlax rayonunda yerləşən "N” saylı hərbi hissədə həqiqi hərbi xidmətdə olub.

C.Mirzəyev 2017-ci ildə DSX-nin "Təlim və Tədris Mərkəzi”ndə "Zabit hazırlıq kursu”nu bitirib və "leytenent” rütbəsi alıb. Həmçinin 02.10.2019-cu il tarixdə ASQ-nin TTM-də Ehtiyat Zabit Hazırlıq kursunda "Motoatıcı Taqım komandirləri” ixtisası üzrə təhsil alıb.

C.Mirzəyev 2020-ci ilin iyul ayında Füzuli rayonunda keçirilən təlimlərə cəlb olunub. 44 günlük Vətən müharibəsinin ilk günündən, bölük komandiri kimi, Füzuli, Cəbrayıl, Xocavənd... istiqamətində gedən döyüşlərdə şücaət göstərərək Şuşayacan şərəfli döyüş yolu keçib. Qələbədən sonra, əsas postları Xocavənddə olsa da, o, Şuşada, Qırmızıbazar qəsəbəsində xidmət edib.

C.Mirzəyev Vətən müharibəsindən sonra, Azərbaycan Respublikasının prezidenti İlham Əliyevin müvafiq Sərəncamlarına əsasən, "Vətən müharibəsi iştiakçısı”, "Hərbi xidmətdə fərqlənməyə görə” 3-cü dərəcəli medallarla, həmçinin "Hərbi xidmətlərə görə”, "Füzulinin azad olunmasına görə” və "Xocavəndin azad olunmasına görə” medalları ilə təltif olunub.

Hərbi xidmətdə fərqləndiyinə görə, C.Mirzəyev 2020-ci ildə "Baş leytenant” rütbəsi alıb.

2023-cü ilin sentyabr ayında Azərbaycan Ordusunun erməni təxribat qrupunu zərərsizləşdirmək üçün başlatdığı antiterror əməliyyatı zamanı düşmənin çoxsaylı itkilərinə baxmayaraq, Azərbaycan tərəfindən də itkilər oldu... Cavid Mirzəyev Füzuli-Ağdam istiqamətində düşmənlə üzbəüz ön xəttdə olsa da, 19.09.2023-cü il tarixdə Xocavənd rayonunda şəhidlik zirvəsinə yüksəlir.

Azərbaycan Silahlı Qüvvələrinin Baş leytenantı Cavid Azər oğlu Mirzəyev 21 sentyabr 2023-cü il tarixdə Sumqayıt Şəhidlər Xiyabanında dəfn olunur.

Azərbaycan Respublikasının prezidenti İlham Əliyevin 07.11.2023-cü il tarixli Sərəncamına əsasən, Baş leytenant Cavid Mirzəyev 3-cü dərəcəli "Rəşadət” ordeni və

"Vətən uğrunda” medalı ilə təltif olunub.

Şəhidimiz22.07.2022-ci il tarixdə ailə həyatı qurmuşdu.

Ruhu şad olsun!

Xeberle.com