TƏHMƏZOV PƏRVİN İLQAR oğlu 22 yanvar 1997-ci ildə Sumqayıt şəhərində anadan olub, körpələr evi-uşaq bağçasında tərbiyə alıb.
P.Təhməzov 2004-2015-ci illərdə Sumqayıt şəhər Vaqif İbrahimov adına 35 saylı tam orta məktəbdə oxuyub. 2015-ci ildə Qərbi Kaspian Universitetinin "Filologiya üzrə ingilis dili” fakültəsinə daxil olub.
Ailə: Əslən Ağsu rayonunun Kalva kəndindən olan, bir-birilərinə uzaq qohumluqları çatan İlqar bəylə Əsli xanım Sumqayıt şəhərində ailə həyatı qurublar və bu evlilikdən onların üç övladı dünyaya gəlib: Elvin, Naibə və Pərvin. Sənətini ürəkdən sevən İlqar Təhməzov uzun müddət sürücü işləyib. Neftçi olan Əsli xanım həyatını bütünlüklə ailəsinə və mavi dənizə bağlayıb. Sadə, səmimi, əməksevər ailədə dünyaya gəlməsinə sevinən Pərvin hər zaman valideynləri ilə fəxr edib, qürur duyub. O, onu əzizləyən, qayğısına qalan qardaş-bacısına böyük sevgi bəsləyib, onları özünə arxa-dayaq bilib.
Pərvin uşaqlıqdan sakit təbiətli, səbirli, təmkinli, tərbiyəli, böyüklərə hörmət qoyan, yaşına görə ağıllı, zəkalı uşaq olub. Səliqə-sahmanlı, təmizkar, nizam-intizamlı, ədəb-ərkanlı olması ilə diqqəti cəlb edib. Yaşı az olsa da, mehribanlığı, səmimiyyəti, gülərüzlüyü ilə seçilib. Nümunəvi davranışı və iti yaddaşı ilə fərqlənən Pərvin bütün fənnlərə maraq göstərərək dərslərini həvəslə oxuyub, məktəbin ictimai həyatında fəal iştirak edib.
Pərvin hər zaman böyük-kiçik yeri bilib, bir dəfə də olsun valideynlərinin üzünə ağ olmayıb, heç kimi incitməyib. Qanacaq-mərifəti ilə, xoş ünsiyyəti, incə yumoru, pozitiv olması ilə hər kəs tərəfindən sevilib. Zamanını dəyərləndirməyi bacaran yeniyetmə asudə vaxtlarında kitab oxuyub, türk filmlərini, əsasən də tarixi, döyüş filmlərini izləyib.
Əsli xanım deyir ki, Pərvinin bir fəqrli xüsusiyyəti də olub. Necə deyərlər, "ilanı yuvasından çıxaran şirin dil”in sahibi idi. Asanlıqla hər kəsin "qılığına girməyi” bacarıb, şirin dili ilə hamının qəlbinə yol tapıb. Elə bu gözəl xüsusiyyəti ilə də özünü hər kəsə sevdirib.
Pərvin məktəbdə oxuduğu illərdə "Cüdo”, "Sambo” idman növləri ilə məşğul olub. Şəhər və respublika üzrə keçirilən yarışlarda iştirak edib, qalibiyyət qazanıb, bir çox təltiflərin sahibi olub. Bu gün saysız-hesabsız Fəxri Fərman, Diplom, kubok və medallar Pərvinin uğurlarından xəbər verir. 9 yaşından 17 yaşına qədər idmanla məşğul olmasına baxmayaraq, o, məktəb imtahanlarının, sonradan ali məktəbdə dərs yükünün ağırlığından məşqləri yarımçıq saxlamalı olub.
Pərvinin Cüdo müəllimi, SSRİ İdman ustası, AR Əməkdar məşqçisi, Respublika dərəcəli hakim Sahib Xanəhməd oğlu İsmayılov yetirməsini belə xatırlayır: "Pərvin tamam fərqli idi. Ağıllı, tərbiyəli, hər şeyin yerini bilən, söz deyəndə qıpqırmızı qızaran, mərifət-qanacaq sahibi olan bir uşaq idi. Zəhmətkeş, deyilənlərə əməl edən, heç kimin xətrinə dəyməyən Pərvin yoldaşları, dostları ilə gözəl ünsiyyət qurardı. Dediklərimi həmişə yerli-yerində yerinə yetirərdi. Şəhər birinciliyində, respublika yarışlarında uğurla çıxış edərdi, çox gözəl güləşərdi. Pərvin yoldaşlıqda da etibarlı idi.
Universitetdə oxuduğu vaxt yaxınlaşdı mənə və dedi: "Müəllim, olar mən bir müddət ara verim? Ali məktəbə daxil olmaq üçün əlavə hazırlığa gedəcəm, vaxtım olmayacaq”. Etik normaları gözləyən, ədəb-əkanlı idi. Pərvin həm də yaxşı güləşçi idi və ehtimal da var idi ki, o, idmanı davam etdirsəydi böyük arenalarda çıxış edərdi, qalibiyyət qazanardı...”.
Qəhrəmanımız həm də çox zəhmətkeş və məsuliyyətli olub. İşdən qorxmayan, sözübütöv, məsləyinə, əqidəsinə sadiq insan idi.
Əsli xanım: "Pərvinin 9 yaşı vardı. Atası Rusiyaya getmişdi, qardaşı isə əsgərlikdə idi. Hansısa avtosalonda kiminləsə danışmışdı, maşın yumaq üçün. Mənim də xəbərim yox idi. Bir də gördüm ki, əlində iki "sapoq” gətirib. Dedim, "bu nədir, a bala?” Dedi, "ana, işə girmişəm”. "İş nədir?”. Dedi, "ana, əmi ilə danışmışam, gedib kömək edəcəm ona”. Doğrusu, əsəbiləşdim və qəti şəkildə bildirdim: "Yox, olmaz! Mən nə vaxt ölərəm, onda işləyərsən! Bunları da apar, qaytar sahibinə!”. Sakitcə dilləndi ki, "ana, onda gedim əmiyə deyim ki, "anam qoymadı”. Yoxsa onun gözü yolda qalar, məni gözləyər. Axı, mən ona söz vermişəm...”. Belə məsuliyyətli uşaq idi Pərvinimiz!”.
Pərvinin hər kəs nazını çəkib ərköyün böyütsə də, o, bu qayğı və nəvazişdən istifadə etməzdi. O qədər əməksevər idi ki, boş-bekar qalmağı sevməzdi. Yay tətillərində, vaxtı boş yerə keçməsin deyə, kafe və restoranlarda çalışardı. Gözütox olduğundan qazandığı pulu son qəpiyinəcən anasına verərdi.
Əsli xanım: "Böyük oğlum çılğındır, özüm kimi. Pərvin isə əksinə idi. Bəzən uşaqlar qısqanclıqla deyirdilər ki, "sən onu bizdən çox istəyirsən”. Pərvinə əsasən bacısı baxıb. Aralarında dörd yaş fərq olub. Deyirdi "birinci, mənəvi anam bacımdır, sən bioloji anamsan”. Sözü-söhbəti, dərdi-səri bacısı ilə idi. O, bacısı ilə dost, sirdaş olmuşdu. Qardaşı böyük olduğundan, Pərvin ona hörmət qoyar, özünə arxa-dayaq bilərdi”.
Pərvinin nə qədər gözəl xasiyyəti, ciddi xarakteri olsa da, onun ən yüksək keyfiyyəti vətənpərvərliyi olub. Uşaqlıqdan qəlbinə hakim olun əvəzolunmaz hiss, duyğu! Vətən sevdalı gənc hər zaman xalqımızın başına gətirilən müsibətləri düşünüb, dədə-baba torpaqlarından, isti ocaqlarından didərgin düşmüş insanların həsrət acısına o da yanıb, kədərlənib. Yaddaşında dərin iz qoyan Xocalı soyqırımını isə heç vaxt unutmayıb və bir gün bütün bu qəddarlığa görə düşməndən qisas alacaq igidlərin sırasında olmaq arzusu ilə yaşayıb...
Pərvin Təhməzov ali təhsilini uğurla başa vurduqdan sonra, 13.07.2020-ci ildə Səfərbərlik və Hərbi Xidmətə Çağırış üzrə Dövlət Xidmətinin Sumqayıt Şəhər İdarəsi tərəfindən müddətli həqiqi hərbi xidmətə çağrılır. O, Vətən qarşısındakı borcunu yerinə yetirmək üçün, Goranboy rayonunun Ballıqaya kəndindəki "N” saylı hərbi hissəyə, daha sonra isə Aşağı Ağcakənd qəsəbəsinə göndərilir.
Hərbi hisssədə kəşfiyyat bölüyündə olan, "manqa başçısı” vəzifəsini icra edən Pərvin az vaxtda müsbət keyfiyyətlərinə, ağlına, savadına və qabiliyyətinə görə, komandanlığın və əsgər yoldaşlarının hörmət və rəğbətini qazanır.
Pərvin fürsət düşdükcə ailəsi ilə tez-tez əlaqə saxlayır, əzizlərinə narahat olmamağı, hər şeyin yaxşı olduğunu söyləyirdi.
Sentyabrın 18-i anasına zəng edən Pərvin, artıq Goranboyda başqa hərbi hissədə olduğunu bildirir. Ana oğluna özündən muğayat olmağı tapşırır və sağollaşırlar. Hər dəfə oğlunun gümrah səsini eşidəndə, onun necə sevinclə, yüksək əhval-ruhiyyə ilə danışdığını dinləyəndə ana oğlu ilə qürur duyurdu.
Bir neçə gün Pərvindən heç bir xəbər olmur. Bütün ailə üzvləri narahat olur. Pərvin bir də sentyabrın 25-də anasına zəng edəndə, Əsli xanım narahatlığını gizlətmir: "Ay bala, haralardasan? Biz burada nigarançılıqdan öldük ki...”. Pərvin deyir: "Ay ana, mən Kəlbəcərin harasından sənə zəng edim? Kəlbəcərin dağlarında, meşələrində işıq yox, rabitə, əlaqə yox... Özüm də şəhid düşürtmüşəm. Əsgər yoldaşım şəhid olub...üst-başım qan içindədir...”.
Əsli xanım əlində telefon, qəlbi qan ağlayır. O, şəhidin anasının nələr yaşayacağını bir anlıq beynindən keçirir, ailənin əzab və iztirabı kino lenti kimi gözləri önündə canlanır. Ananı dəhşət bürüyür. Oğlunu dinləyərək qəlbində dua edir ki, Allah balasını, bütün əsgərləri qorusun, düşmənin cavabını versin...
Artıq 4-5 gün idi ki, Pərvindən səs-soraq yox idi. Yenə də ailə narahat günlərini yaşayırdı... Nəhayət, sentyabrın 30-u gündüz saat 11-45 və axşam saat 17-30 radələrində Pərvin ailəsinə zəng edir və bildirir ki, artıq onları Goranboya, Ballıqayaya gətiriblər, narahat olmağa əsas yoxdur, hər şey yaxşıdır. "Düşmənin kökünü kəsirik!” deyərək, o, sevincini gizlətmir.
Az zaman ərzində, sentyabrın 27-dən başlanan II Qarabağ müharibəsində Vətən, Torpaq uğrunda gedən Haqq savaşında mərdlikə sinəsini qabağa verən, düşmənin gözünün içinə dik baxan qorxmaz igidimiz bir çox istiqamətlərdə - Kəlbəcər, Ağdərə, Suqovuşan uğrunda gedən döyüşlərdə iştirak edir. O ərəfədə Kəlbəcər-Ağdərə-Tərtər yolunu nəzarət altına almaq və strateji əhəmiyyətli yüksəkliyi ələ kecirmək üçün hazırlanmış plan həyata keçirilməliydi.
Oktyabrın 1-i 2020-ci il tarixdə Pərvingilin dəstəsi Ağdərə istiqamətində, Suqovuşan, Gülüstan ətrafında "Ağucuq” deyilən ərazidə düşmən tərəfindən hazırlanmış pusquya düşür. Döyüş yoldaşları ilə birlikdə mühasirəyə düşən Pərvin düşmənə qarşı amansızcasına savaşır. O, yaralanmış və şəhid olmuş yoldaşlarını döyüş meydanından bir qədər kənara çıxaran zaman düşmənin snayperindən aldığı 5 güllə yarasından həlak olaraq gözlərini əbədi yumur. Cəsur döyüşçü Allah dərgahında ən uca məqama – Şəhidlik Zirvəsinə ucalır. Qəlbi arzularla dolu bir gəncin əlçatan arzu-ümidləri əlçatmaz olur... Lakin Azərbaycanın igid, qorxmaz, mərd oğlu Pərvin Təhməzov milyonların arzuladığı, hər kəsə nəsib olmayan "ŞƏHİD” adının sahibi olaraq adını ZƏFƏR qazanan bir ölkənin ŞANLI TARİXinə Qızıl hərflərlə yazır! Budur ən şətrəfli ölüm və ən şərəfli AD!!!
Oktyabrın 5-nəcən Pərvindən xəbər tuta bilməyən valideynlər onunla əlaqə saxladıqları nömrələrə zəng edirlər. Zəng çatmır. Oktyabrın 5-dən oktyabr ayının 14-dək ana bütün aidiyyəti qurumlara müraciət edir, getmədiyi idarə, qapını çalmadığı ünvan, görüşmədiyi insanlar qalmır... "Pərvini gördüm” deyən olmur...
Oktyabrın 14-ü Əsli xanım Bərdə rayonuna yola düşür. Və burada ona oğlunun itkin düşdüyünü deyirlər. "Gedin, gözləyin” deyilsə də, ana bir yerdə qərar tutmayıb bütün döyüş bölgələrində, xəstəxanalarda oğlunun axtarışına çıxır. Bu dəfə də "Pərvini görmüşəm” deyən tapılmır.
Sözügedən qanlı döyüş ərazisi əlçatmaz mövqedə - yüksəklikdə olduğu üçün Şəhidimizin nəşini döyüş bölgəsindən çıxarmaq mümkün olmur. Yalnız...
5 Dekabr 2020-ci il tarixdə Təhməzovlar ailəsinə zəng gəlir. "Övladınız şəhiddir...”... Bu sözlərdən sarsılan valideynlərin o an nələr yaşadığını təsəvvür etmək çətin deyil. Lakin Təhməzovlar özlərində güc taparaq başlarını dik tutdular, dağ kimi vüqarlı Şəhidin vüqarlı da valideynləri oldular!
Azərbaycan Ordusunun mübariz əsgəri, cəmi 2 ay 10 gün hərbi xidmətdə olan, lakin bu az vaxtda şərəfli döyüş yolu keçərək şücaəti ilə hər kəsin yaddaşında və qəlbində dərin iz qoyan qəhrəman oğul Pərvin Təhməzov noyabrın 7-si 2020-ci ildə Sumqayıt Şəhidlər Xiyabanında dəfn olunur.
Bu ğün Təhməzovla ailəsinin Pərvinlə bağlı o qədər deyiləsi sözü var ki... Bu söz-söhbətlər heş vaxt bitib-tükənməz... Və bu ürək sözlərindən gənc qəhrəman haqqında hələ çox əsərlər yazılacaq, rəvayətlər, əfsanələr qoşulacaq...
İlqar bəy: "Vətən, Torpaq uğrunda şəhid oldu oğlumuz. Bütün şəhidlər bizim ovladlarımızdır. Şükürlər olsun ki, Şəhidlərimizin qanı yerdə qalmadı və düşmənin layiqli cavabı verildi, Vətən torpaqları yağıdan tam azad oldu!”.
Əsli xanım: "Pərvinlə bağlı arzularım böyük idi. İstəyirdim ki, magistraturaya daxil olsun, sonra isə Polis Akademiyasında oxusun. Diplomunu şəhidlikdən sonra verdilər. Sevdiyi qız da vardı, bacısı ilə bölüşürdü sirrini... Hər dəfə Pərvin haqqında yaxşı sözlər eşidəndə ağlayıram. Az qalır ürəyim yerindən çıxsın... Yenə də güc toplayıb özümüzü ələ almağa çalışırıq. Çünki oğlumuz şərəfli adı ilə bizi də şərəfləndirdi! Bu gün Pərvinin qanının töküldüyü Azərbaycanın hər qarış torpağında alnıaçıq, üzüağ gəzirik. Bu, bizə bir təskinlikdir...”.
Vətən üçün doğuldu, Vətən üçün canından, qanından keçdi və arzusuna çatdı Pərvin Təhməzov, Vətən torpağını mənfur düşməndən təmizləməklə, ZƏFƏRƏ imza atmaqla, Azad Azərbaycanın hər qarışında üçrəngli Vətən bayrağını dalğalandırmaqla!!!
Bu günün gəncləri, sabahın nəsilləri Pərvin kimi qəhrəmanları tanıyacaq, qəlblərində, yaddaşlarında daima yaşadacaqlar!
Azərbaycanın ərazi bütövlüyünün təmin edilməsi uğrunda döyüş əməliyyatlarına qatılan və hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirdiyi üçün, Azərbaycan Silahlı Qüvvələrinin mərd, cəsur, qorxmaz əsgəri, 23 yaşlı Pərvin İlqar oğlu Təhməzov ölümündən sonra, Azərbaycan Respublikasının prezidenti İlham Əliyevin müvafiq Sərəncamlarına əsasən, 3-cü dərəcəli "Vətənə xidmətə görə” ordeni, həmçinin "Vətən uğrunda”, "Cəsur döyüşçü” və "Suqovuşanın azad olunmasına görə” medalları ilə təltif olunub.
Ruhun şad olsun, 27 yaşı Cənnətdə tamam olan qəhrəman Şəhidimiz!!!
Aygün Hacıyeva,
AJB, AYB və AAB-nin üzvü
Xəbərdən istifadə edərkən istinad etmək vacibdir.
