Sumqayıt Texnologiya Parkında çalışmış Yəhyayev Mehman Kərim oğlu Xeberle.com-a müraciət edərək bildirib ki, 4 aydır ki, SOCAR-dan "Əmək veteranı” kitabçasının verilməsini gözləyir. Şikayətçi bildirir ki, Sumqayıt Texnologiya Parkından ona bunun SOCAR tərəfindən veriləcəyi deyilib. Lakin, 4 ay vaxt keçməsinə baxmayaraq o veteranlıq kitabçasını ala bilmir.
Görəsən, özügedən vətəndaşa "Əmək veteranı” kitabçasının verilməməsinə səbəb nədir?
Məsələ ilə bağlı SOCAR-a sorğu göndərdik. Azərbaycan Respublikası Dövlət Neft Şirkətinin vitse-prezidenti Ziba Mustafayevanın adından sorğumuza cavab verilib. Qeyd edilib ki, M. Yəhyayevin hazırki məsələ ilə bağlı sonuncu iş yerinə müraciət etməyi tövsiyə olunur:
"Vətəndaş Yəhyayev Mehman Kərim oğlunun "Əmək Veteranı” adının verilməsi ilə bağlı Azərbaycan Respublikasının Dövlət Neft Şirkətinə ünvanladığınız müraciətə müvafiq qaydada baxılmışdır. Nəzərinizə çatdırırıq ki, "Müharibə veteranı, silahlı qüvvələr və əmək veteranı adlarının verilməsi qaydası və şərtləri haqqında” Azərbaycan Respublikası Nazirlər Kabinetinin 22 sentyabr 1995-ci il tarixli 216 saylı qərarı ilə təsdiq olunmuş Əsasnaməyə əsasən, yaşa görə pensiya hüququ qazanmış, orden və medallarla təltif olunmuş, uzun illər ictimai əməklə məşğul olan vətəndaşlara sonuncu iş yerlərinə müraciətləri əsasında "Əmək veteranı” adı və vəsiqəsi verilir. Həmçinin bildiririk ki, "Əmək veteranı” adını almaq istəyən şəxs ərizə və həmin adı almaq üçün sözügedən əsasnamədə nəzərdə tutulan təsdiqedici sənədlərlə öz iş yerinə, əgər həmin şəxs işləmirsə , sonuncu iş yerinə müraciət etməlidir. Odur ki, M. Yəhyayevin hazırki məsələ ilə bağlı sonuncu iş yerinə müraciət etməyi tövsiyə olunur”.
Elşən Yəhyayev
Xəbərdən istifadə edərkən istinad etmək vacibdir.
