Sumqayıtın Hacı Zeynalabdin qəsəbəsi ötən əsrin əvvəllərində salınıb. Hazırda 25 minə yaxın əhalisi olan qəsəbənin əksər yolları keçilməzdir. Sakinlər deyir ki, göydən bir damcı yağış düşən kimi palçıq əlindən gəzmək olmur.
"Biz hazırda Hacı Zeynalabdin qəsəbəsi Sabit Rəhman küçəsindəyik. Yollar bərbad gündədir. Yağış yağanda palçıq olur, keçilməz edir yolları. Bununla yanaşı, işıqlandırma sistemi də zəifdir. İnsanlar axşam vaxtı işdən qayıdanda əziyyət çəkirlər.”
Problemlər məngənəsində boğulan sakinlər yaranmış vəziyyətdən zara gəldiklərini deyirlər: "Hər dəfə də deyirlər ki, düzələcək. Heç nə də yoxdur. Bir sakin kimi utanıram, xəcalət çəkirəm. İstərdim ki, yollarımızı düzəltsinlər. Qəşəng asfalt olunmuşdu. Sonra su üçün çəkdilər. Belə kəsik-kəsik ediblər.”
Qəsəbənin digər küçələrində - Hüseyn Ərəblinski küçəsində də sakinlər eyni problemdən əziyyət çəkir.
Qəsəbə sakini Rəşid Məmmədoğlu deyir ki, küçənin vəziyyəti bərbad gündədir: "Hamilə qadınlar, yaşlı ağsaqqallar, yaşlı ağbirçəklər, uşaqlar və yaxud da ki, təcili tibbi yardım. Yəni burdan yerimək mümkün deyil. Qış ayı oldu daha da bərbad vəziyyət yaranır.”
Digər sakin Zərifə Kərimova da elə düşünür: "Bütün su olur da. Su əlindən mümkün deyil. Mağazaya çörək ala bilmirik, inanırsan oğlum. Yəni bunu deməyin heç bir mənası yoxdur. Neçə nəfərə demişik xeyri yoxdur.”
Problem təkcə məhəllədaxili yollarla bitmir. İşlək yol olan Abdulla Şaiq küçəsində də vəziyyət eynidir.
Sumqayıt şəhər İcra Hakimiyyəti Başçısının Hacı Zeynalabdin qəsəbə inzibati ərazi dairəsi üzrə nümayəndəliyinə Yollandıq. İcra nümayəndəsinin müavini Ramil Əliyev qəsəbə ərazisində olan yollardakı vəziyyətlə bağlı mütəmadi tədbirlər həyata keçirildiyini bildirdi: "Məlumat üçün bildirək ki, hal-hazırda qəsəbəmizdə Səttar Bəhlulzadə küçəsi boyunca asfaltlanma, Qara Qarayev, Abdulla Şaiq, 28 may küçələri, Xətai 1,2 binanın qarşısında asfaltlanma işləri aparılmışdır. Birinci məhəllə küçəsində də müəyyən yerlərdə asfaltlanma işləri aparılacaq. Məlumat üçün bildirək ki, 2015-ci ildə asfalt örtüyü çəkilmişdir. lakin sonradan suyun tenderi ilə bağlı həmin yerlər qazılmış və həmin vəziyyətə düşmüşdür. Buna baxmayaraq həmin yollar asfaltlanacaqdır.”
Ramil Əliyevin sözlərinə görə, tezliklə adı çəkilən bütün küçələrdə yolun asfaltlanması həyata keçiriləcək.
Xəbərdən istifadə edərkən istinad etmək vacibdir.
