Gəl xeyir-duanı ver, bəlkə bir az kama çatım,

Ay ömür pasibanım, göz bəbəyim, Sumqayıtım…

Neçə möhnətlərə mərdliklə sinə gərdi adın,

Tuş edib həmləsinə, gör neçə min dərdi adın.

Günəşin zərrəsisən, atəşi-odərdi adın,

Ucalıb kürreyi-ərzə beləcə, toy büsatım,

Ay ömür pasibanım, göz bəbəyim, Sumqayıtım!

Mərdliyinlə, sərtliyinlə adın hər vaxt qoşadır,

Sevgini, şöhrətini səcdə qılıb el yaşadır.

Vətən oğlanları qartala dönüb, baş-başadır,

Düşmənə toy tutası var Buğacım, var Basatım,

Ay ömür pasibanım, göz bəbəyim, Sumqayıtım!

Qurtulub çıxmısan zülmətlər içindən günə sən,

Boyanıbsan qızılı al şəfəqə, al günə sən,

Müstəqil himnimizin dönmüsən ahənginə sən.

Nur saçır, nur çiləyir hüsnünə bu kainatım,

Ay ömür pasibanım, göz bəbəyim, Sumqayıtım!

Ey şəhərlər şəhəri, sevgi dolu var baxışın,

Sənət, elm aləminə möcüzədir hər naxışın,

Yada yadsan həmişə, dosta açıqdır ağuşun.

Səni vəsf eyləməyə sərf olunub hər saatım,

Ay ömür pasibanım, göz bəbəyim, Sumqayıtım!

Vətən çarpan ürəyim, sən də onun parəsisən,

Saflığın, hürriyyətin simvolu, işarəsisən.

Asifin ömrü-günü, dərdlərinin çarəsisən.

Ümidimsən, inamımsan, sənsiz heçdir həyatım,

Ay ömür pasibanım, göz bəbəyim, Sumqayıtım!