Eyruz Məmmədovun bu günlərdə yeni romanı çapdan çıxıb

 Respublikanın əməkdar jurnalisti Eyruz Məmmədovun bu yaxınlarda “Bilik” nəşriyyatında “P.S.” adlı romanı çapdan çıxıb. Mövzusu məhəbbətdən ibarət olan əsərin qəhrəmanı Çingiz bir müddət işsiz qalır. Sonra onu böyük bir şirkətə işə dəvət edirlər. Burada o, Həmidə adlı bir qıza aşiq olur və könlünü ona bağlayır. Lakin şirkətin prezidenti Əflatun bu məhəbbətin ona uğur gətirməyəcəyini söyləyir. Çingizə elə gəlir ki, Əflatun onun məhəbbətinə qısqanır, əslində isə belə deyilmiş...

Qeyd edək ki, Eyruz Məmmədov uzun illərdir ki, bədii yaradıcılıqla da məşğuldur. Onun publisistika janrından savayı, indiyə kimi 15-ə yaxın tarixi, bədii kitabları çapdan çıxıb. Romanların əsas qayəsi gənclərin həyatından, məhəbbətindən, sevgisindən, sədaqətindən və xəyanətindən bəhs olunur. Əsərləri rus, alman və ingilis.dillərinə tərcümə olunub.

Eyruz Məmmədov bu yaxınlarda yeni bədii romanını nəşriyyata təhvil verməyə hazırlaşır.