Xidmət Sahələri üzrə Sumqayıt Dövlət Peşə Təhsil Mərkəzi və Sumqayıt şəhər Heydər Əliyev Mərkəzinin birgə təşkilatçılığı ilə İsveçdə yaşayan yazar Eluca Atalı ilə tələbələrin onlayn görüşü keçirilib.
Görüşü giriş sözü ilə Xidmət Sahələri üzrə Sumqayıt Dövlət Peşə Təhsil Mərkəzinin direktoru Gülşən Ömərova açaraq tədbir iştirakçılarını və qonaqları salamlayaraq, görüşün məqsədi və mövzusu haqqında məlumat verdi. O, Azərbaycanın əzəli torpağı olan Laçın şəhərinə qayıtmağımız münasibətilə sevincini bölüşərək, hər kəsi təbrik etdi.
Qonaq qismində iştirak edən Dagtəkin Mütləqçi, Saratov Universitetinin professoru Rafail Qəribov, İstambuldakı Ümit Oyunçular teatrının rəhbəri Ayan Ünlü, Bakı Beynəlxalq Multikulturalizm mərkəzinin Türkiyə təmsilçisi Oktay Hacımusalı dəvətə görə öz təşəkkürlərini bildirdilər.
Tədbirdə Yazarın "Ənqa quşu" əsəri müzakirə olunaraq yazıçı Eluca Atalı yaradıcılığı , gələcək planları haqqında müxtəlif suallar verildi. Tələbələrin ifasında yazarın "Nal şəkilli mühasirə " pyesindən bir hissə nümayiş olundu.
Maraqlı və yadda qalan fikir mübadiləsi şəraitində keçən görüşdə çıxış edən qonaqlar yazarın Azərbaycan və Azərbaycançılıq ruhunda ərsəyə gətirdiyi əsərləri haqqında ətraflı məlumat verdilər.
Sonda Heydər Əliyev Mərkəzinin direktoru çıxış edərək, maraqlı görüş üçün iştirakçılara və yazara öz təşəkkürünü bildirdi.
Qeyd edək ki, Eluca Atalı (Hüseynova Mədinə İxtiyar qızı) 1966-cı il oktyabrın 19-da Neftçala rayonunun Xolqaraqaşlı kəndində anadan olub. İlk şerini 12 yaşında yazıb. İsveçdə yaşayır.
30 kitab müəllifidir. Ədəbiyyata yeni fəlsəfi bədii miniatür janrımı gətirib. Əsərləri müxtəlif ölkələrdə və müxtəlif dillərdə nəşr olunub.
AYB-nin üzvüdür.
Xəbərdən istifadə edərkən istinad etmək vacibdir.
