Xəbər verildiyi kimi, Sumqayıt şəhərinin 8-ci mikrorayon ərazisində yerləşən kənd təsərrüfatı yarmarkası ləğv edilib. Yarmarkanın ləğv edilməsinin səbəbi ərazinin meyvə-tərəvəz məhsullarının satışı üçün münasib yer olmadığı və antisanitariya vəziyyətinin hökm sürdüyü göstərilib. Bunun üçün həmin yerdə təmir işlərinin aparılacağı bildirilib. Ərazidə əsaslı təmir işləri başa çatanadək kənd təsərrüfatı yarmarkasının şəhərin hansı yerinə köçürüləcəyi ilə bağlı dəqiq məlumat əldə etməyə çalışdıq.
Məsələ ilə əlaqədar Sumqayıt şəhər icra hakiminin müavini Akif Zeynalovla əlaqə yaratmaq istədik. Amma cəhdimiz heç bir nəticə vermədi.
Əldə etdiyimiz məlumata görə, kənd təsərrüfatı yarmarkası bağlandıqdan sonra Sumqayıtın mərkəzi bazarında qiymətlər şəhər icra başçısı Zakir Fərəcovun göstərişi ilə tənzimlənib. Mərkəzi bazarda olarkən buna biz də şahid olduq. Bütün məhsulların üzərində qiymətlərin xüsusi olaraq qeyd edilməsi də diqqətimizdən yayınmadı. Demək olar ki, meyvə-tərəvəz məhsullarının qiyməti iki–üç dəfə ucuzlaşıb. Məsələn, 1.50 manata satılan alma 50 qəpiyə satılırdı artıq. Üzümün sortlarından asılı olmayaraq, kilosu 60 qəpik olub. Bir neçə tərəzidə çəkinin doğru olmasını da yoxladıq, hər şey dəqiq idi. Amma əvvəllər burada çəkidə aldatma hallarına çox rast gəlinirdi. Bazara şəhər icra hakimiyyətinin nümyəndələri tərəfindən xüsusi nəzarət edildiyinə də şahid olduq.
Aytən Əli
Xeberle.com