Bu gün Sumqayıt şəhər təhsil işçilərinin sentyabr konfransı keçirilib. Konfransda Sumqayıt şəhər İcra Hakimiyyətinin Başçısı Zakir Fərəcov, Təhsil Nazirliyinin Məktəbəqədər və ümumi təhsil şöbəsinin müdiri Aydın Əhmədov, şəhərin pedaqoji ictimaiyyətinin nümayəndələri iştirak ediblər.

Dövlət Himninin səsləndirilməsi ilə başlayan konfransda Sumqayıt şəhər Təhsil şöbəsinin Metodiki kabinetinin direktoru Sabuir Məmmədov məruzə ilə çıxış edib. S. Məmmədov "2014/2015-ci dərs ilinin yekunları və yeni dərs ilində qarşıda duran vəzifələr"dən bəhs edib. Bildirilib ki, ötən dərs ili şəhərimizin təhsil sisteminin ölkə rəhbərliyi, Təhsil Nazilriyi və Sumqayıt şəhər İcra Hakimiyyəti tərəfindən son illərdə ən güclü dəstək aldığı dövr kimi yadda qalıb. Qeyd olunub ki, ötən dərs ilində Sumqayıtın 3 məktəbində-,11 nömrəli və Orta ümumtəhsil məktəbində əsaslı təmir işlərinə başlanılıb. 11 nömrəli məktəbdə işlərin yekunlaşmaq üzrə olduğunu deyən S. Məmmədov 7 nömrəli və Orta ümumtəhsil internat məktəblərində işlərin davam etdiyini bildirib.

Bu işlər başa çatdıqdan sonra şəhər üzrə əsaslı təmir edilmiş məktəblərin sayı 16-ya çatacaq.

Vurğulanıb ki, şagirdlərin biliyinin yoxlanması və qiymətləndirilməsi ilə bağlı təhsil müəssisələrində ciddi iş aparılıb, bütün məktəblərdə monitorinqlər təşkil edilib və nəticələr təhlil olunub. Eyni zamanda, dərs ili ərzində 2015-ci ildə məzunların ali məktəblərə qəbul göstəriciləri şəhər üzrə geniş təhlil edilib, məktəblərin müxtəlif qəbul göstəriciləri üzrə reytinq cədvəlləri hazırlanıb. Buraxılış imtahanlarının nəticələrinə uyğun olaraq şəhər üzrə 5 nəfər təhsili xüsusi nailiyyətlərlə başa vurduqlarına görə qızıl medalla təltif edilib. Bu il qəbul imtahanlarında şəhər ümumtəhsil məktəblərinin 133 nəfər məzunu 600-dən çox bal toplayıb.

Qeyd olunub ki, ötən dərs ilində şəhər icra hakimiyyətinin təşəbbüsü və dəstəyi ilə şagirdlərin hərbi-vətənpərvərlik tərbiyəsinə həsr edilmiş tədbirlər, istedadlı şagirdlərin aşkar edilməsi ilə bağlı müxtəlif müsabiqələr, idman yarışları təşkil edilib.

S. Məmmədov onu da söyləyib ki, əldə edilən uğurlarla yanaşı, bir sıra problemlər də mövcuddur. O, bir sıra nöqsan və çatışmazlıqların olduğunu qeyd edərək yeni tədris ilində bu məsələlərin öz həllini tapacağını konfrans iştirakçılarının diqqətinə çatdırıb.

Sonra məruzə ətrafında çıxışlar olub. 11 saylı məktəbin direktoru Ofelya Babayeva, 18 saylı məktəbin direktoru Leyla Abdullayeva və digər çıxış edənlər ölkədə aparılan təhsil islahatlarından, təhsilin keyfiyyətinin yaxşılaşdırılması istiqamətində görüləcək işlərin zərurliyindən danışıblar.

Təhsil Nazirliyinin Məktəbəqədər və ümumi təhsil şöbəsinin müdiri Aydın Əhmədov isə çıxışında bildirib ki, yeni tədris ilində 141 adda 4 milyon ədəd dərslik çap olunub. Nazirlik rəsmisi təhsil sahəsində əldə edilən uğurlardan söz açıb, eyni zamanda çatışmazlıqların da olduğuna diqqət çəkib. A. Əhmədov bildirib ki, tədris planlarının hazırlanmasında, eləcə də təhsillə bağlı olan normativ aktlar məktəb rəhbərləri tərəfindən düzgün mənimsənilmir. O, bununla bağlı məktəb direktorlarını məsuliyyətli və diqqətli olmağa çağırıb.

Sumqayıt şəhər İcra Hakimiyyətinin Başçısı Zakir Fərəcov çıxış edərək pedaqoji kollektivi yeni tədris ilinin başlanması münasibəti ilə təbrik edərək gələcək fəaliyyətlərində uğurlar arzuladı. Z. Fərəcov Sumqayıtın ölkədə təhsil sahəsində bir sıra uğurlara imza atdığını və bu ənənələrin davam etdirilməli oilduğunu qeyd etdi.

Daha sonra ali məktəblərə 600-dən çox bal toplayaraq ali məktəblərə qəbul olan 39 tələbəyə qiymətli hədiyyələr və 50 müəllimə isə Sumqayıt İcra Hakimiyyətinin fəxri fərmanları ilə təltif edildi.

Tədbirdə həmçinin, 1, 11 nömrəli məktəblərə və "Təfəkkür" liseyinə Təhsil Nazilriyinin fəxri fərmanları, "İlin ən yaxşı müəllimi" adına layiq görülmüş Təbiət elmləri təmayüllü gimnaziyanın müəllimləri Ulduz Quliyeva, Səbinə Orucova, İlahə Şəfiyeva və Həqiqət Abbasovaya vəsiqələr təqdim olundu.