Bakı şəhərindəki təhsil müəssisələrində çalışan müəllimlərin bilik və səriştəsilə bağlı aparılacaq sınaq qiymətləndirilməsinin başlama tarixi məlum olub.
Modern.az saytının məlumatına görə, Bakı Şəhəri üzrə Təhsil İdarəsindən əldə etdiyi məlumata görə, müəllimlərin sınaq qiymətləndirilməsinə iyunun 9-də start veriləcək. Bu prosesin təxminən 10 gün davam edəcəyi bildirilir. 
Təhsil naziri Mikayıl Cabbarov məllimlərin bilik və səriştəsinin sınaq qiymətləndirilməsi barədə bir müddət öncə müvafiq əmr imzalayıb. Əmrə əsasən, 2014-cü ilin iyun ayında aparılacaq sınaq qiymətləndirilməsi üçün Bakı şəhərinin ümumi təhsil müəssisələrində işləyən müəllimlərin  ixtisaslar üzrə siyahıları hazırlanıb.
Sınaq Qiymətləndirilməsi 3 istiqamətdə - fənn, metodika, kommunikativ qabiliyyətə dair sorğu əsasında aparılacaq. Müəllimlər 2 saat ərzində 80 sualı cavablandırmalıdırlar. İmtahanda 40 sual ixtisas fənni, 20 sual metodika, 20 sual isə müəyyən kommunikativ qabiliyyətlərin ölçülməsi ilə bağlıdır. 
Qiymətləndirmə keçirildikdən təxminən 1 həftə-10 gün sonra nəticələr bilinəcək.
Sınaq qiymətləndirmə zamanı zəif nəticə göstərən müəllimlərin fəaliyyətindəki boşluqları aradan qaldırmaq üçün təlimlər, yenidənhazırlıq, ixtisasartırma kursları təlimləri təşkil ediləcək və müəllimlər bu təlimlərə cəlb olunacaq.
Qiymətləndirmədə yüksək nəticə göstərən müəllimlər üçün isə həvəsləndirici tədbirlərin tətbiq olunacağı bildirilir.