Bu gün Xidmət Sahələri üzrə Sumqayıt Dövlət Peşə Təhsil Mərkəzində "Zəfər Gününə Qarabağ Mətbəxi İlə" adlı sərgi təşkil edilib.
Sərgidə Mənsum İbrahimovun müğam ifasının sədaları altında Aşpaz ixtisası üzrə təhsil alan tələbələrin hazırladığı Qarabağ mətbəxinin yeməkləri təqdim olunub. Süfrəyə müxtəlif çeşidli plovlar, dolmalar, qovurma, dovğa, basdırma və sair yeməklər düzülüb. Şəhidlərin ruhu bir dəqiqəlik sükutla yad edildikdən sonra mərkəzin direktoru Gülşən Ömərova Zəfər Gününə həsr edilmiş layihənin həyata keçirilməsinin məqsədi barədə iştirkçılara məlumat verərək, bu layihələrin əhəmiyyətli olduğunu, gənclərin milli-mənəvi keyfiyyətlərinin inkişafında mühüm rola malik olduğunu qeyd edib. Direktor layihədə əməyi keçən əməkdaşlara təşəkkürünü bildirib, gələcəkdə də belə layihələrin inkişaf etdirilməsinə yüksək dəstək veriləcəyini vurğulayaraq, sözü sərgiyə dəvət alan tərəfdaş təşkilat Turan Restoranlar Şəbəkəsinin baş aşpazı Rasim Rzayevə verib.
R. Rzayev ixtisasından asılı olmayaraq hər peşə sahibinin bu Zəfərə töhvəsini verməli olduğunu bildirərək, belə həssas mövzuya toxunduqları üçün tələbələrə təşəkkür edib. O, tələbələrlə bərabər, onları milli ruhda böyüdən valideynlərə, onların təlim-tədrisi ilə məşğul olan müəllimlərə də təşəkkür edərək, tələbələrə uğurlar arzu edib.
Tədbir Xudayar Təsnifi ilə sona yetib.
Xəbərdən istifadə edərkən istinad etmək vacibdir.
