Yeni Azərbaycan Partiyası (YAP) Siyasi Şurasının üzvü, deputat Aydın Mirzəzadə mətbuatda Müdafiə Nazirliyi ilə bağlı yazılan məlumatlara münasibət bildirib.

Virtualaz.org-un məlumatına görə, deputat Müdafiə Nazirliyi ilə bağlı bütün məlumatların mətbuata çıxarlmasından narahat olduğunu bildirib. O, bu fikirlərini sosial şəbəkədə paylaşıb.

A.Mirzəzadənin sözlərinə görə, Azərbaycan cəmiyyətində silahlı qüvvələr sektorunda baş verən dəyişikliklər həmişə maraqlıdır: “Bunu ilk növbədə ölkəmizin Ermənistanla müharibə vəziyyətində olması ilə izah etmək olar. Bu baxımdan Azərbaycan mətbuatında müntəzəm olaraq hərbi ilə, ilk növbədə Müdafiə Nazirliyi ilə bağlı materiallar verilir. Bu da təqdirəlayiq bir məsələdir və jurnalistlərin fədakarlığı qiymətləndirilməlidir. Ancaq bununla belə mətbuatımızda Müdafiə Nazirliyi ilə bağlı bütün informasiyanın verilməsi böyük narahatlıq doğurur”.

Mətbuatın nazirliyin verdiyi rəsmi məlumatlarla yanaşı kənardan alınan məlumatları açıqlamağa çox meylli olduğunu deyən A.Mirzəzadə xüsusilə də yeni müdafiə naziri Zakir Həsənovun bütün yeni təyinatlarının bir anda yayımlanmasının doğru olmadığını düşünür: “Azərbaycanda açıq şəkildə bütün hərbi hissə komandirlərinin, müavinlərinin, qərargah rəislərinin adı mətbuatda bilinir və onların xarakteristikası da verilir.

Bunu təhlükəli hal hesab edirəm. Ermənistanın mətbuatımızı daima izlədiyinin və ordumuzla bağlı məlumatların bir hissəsinin məhz mətbuatımızdan aldığının fərqinə varmalıyıq. Silahlı Qüvvələrimizlə bağlı hər informasiyanın, xüsusilə də kadr təyinatı məlumatlarının yayılmasına ehtiyac yoxdur. Bu məsələlər hər birimizi dərindən düşündürməlidir”.